ލުބުނާނުގައި ޕޭޖަރުތައް ގޮވައިގެން ނުވަ މީހުން މަރުވެ ގާތްގަނޑަކަށް 2،750 މީހުން ޒަޚަމްވެއްޖެ އެވެ.
ލުބުނާނުގެ ހެލްތް މިނިސްޓަރު ފިރާސް އަބިއާދު ނޫސްވެރިންނަށް މައުލޫމާތު ދެއްވަމުން ވިދާޅުވީ މަރުވި މީހުންގެ ތެރޭގައި އަށް އަހަރުގެ އަންހެން ކުއްޖަކުވެސް ހިމެނޭ ކަމަށެވެ. އަންގާރަ ދުވަހު މުޅި ލުބުނާނުގައި އެއްފަހަރާ އެތައް ހާސް ޕޭޖަރުތައް ގޮވުމުން 200 އަށް ވުރެ ގިނަ މީހުންނަށް ސީރިއަސް ޒަހަމްތައް ލިބިފައިވާކަމަށް ވެއެވެ.
އީރާނުގެ ތާއީދު އޮންނަ ހިޒްބުﷲ ޖަމާއަތުން ނެރުނު ބަޔާނެއްގައި ބުނެފައި ވަނީ ޕޭޖަރ ތައް ގޮއްވާލުމުގެ ފަހަތުގައި ވަނީ އިސްރާއީލް ކަމަށާއި ބަދަލު ހިފާނެކަމަށްބުނެ އެވެ.
މި މި ހާދިސާތަކާ ގުޅޭ ގޮތުން އިސްރާއީލުގެ އަސްކަރިއްޔާގެ ފަރާތުން މިހާތަނަށް އެއްވެސް ބަހެއް ނުބުނެ އެވެ.
އެއްފަހަރާ އެތައް ހާސް ޕޭޖަރު ގޮއްވާލީ ކިހިނެއްކަން ރަސްމީ އެއްވެސް ފަރާތަކުން މިހާތަނަށް ސާފުކޮށްދީފައި ނުވިނަމަވެސް އިސްރާއީލުން މި ޕޭޖަރުތަކަށް ގޮވާތަކެތި ލާފައިވާކަމަށް ބައެއް ފަރާތްތަކުން ވަނީ ރިޕޯޓު ކޮށްފައެވެ.
ޕޭޖަރުތަކަކީ މުއާސަލާތުގައި ތަންކޮޅެއް ކުރީގެ ޓެކްނޮލޮޖީއެއް ކަމަށް ވީނަމަވެސް ލުބުނާނުގެ ހިޒްބުﷲ އިން މުއާސަލާތުކުރުމުގައި މި ވަސީލަތް ވަރަށްބޮޑަށް ބޭނުންކުރެއެވެ. ސަބަބަކީ މިޒަމާނުގެ މޮބައިލްފޯނު ފަދަ ވަސީލަތްތައް އިސްރާއީލުން ފަސޭހައިން ހެކްކޮށް ޖާސޫސް ކުރާތީ ކަމަށް ބެލެވެއެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުން ލުބުނާނަށް އިމްޕޯޓުކުރަން ތައްޔާރުވެފައިހުރި އެތައް ހާސް ޕޭޖަރު ހުރިކަން އިސްރާއީލުގެ ޖާސޫސީ އިދާރާތަކަށް ވަނީ މާ ކުރިން މައުލޫމާތު ލިބިފައެވެ. އެހެންކަމުން އިސްރާއީލުގެ ޖާސޫސީ މައި އިދާރާ މޮސާޑުން އެއިން ކޮންމެ ޕޭޖަރަކަށް ގޮވާތަކެތި ލެވޭނެ އިންތިޒާމު ވަނީ ހަމަޖައްސާފައެވެ. އަދި އެއްފަހަރާ ހުރިހާ ޕޭޖަރުތައް މިހާރުވަނީ ގޮއްވާލާފައެވެ.
މި ލިޔުން ކިޔާލުމުން
