ޖައްވުގެ އޯބިޓުގައި ހަތިޔާރު ރުކުރުވާލާފައިވާ ކަމަށް އެމެރިކާއިން އެއްބަސްވުމާ ގުޅިގެން، ބޭރު ޖައްވުގައި އަސްކަރީ ބާރު ވަރުގަދަކުރުމުގެ މަސައްކަތްތައް ހުއްޓާލުމަށް ޗައިނާއިން ވަނީ ގޮވާލާފައެވެ. އެމެރިކާގެ މި ފިޔަވަޅުގެ ސަބަބުން ދުނިޔޭގެ ފެންވަރުގައި ހަތިޔާރު އެޅުމުގެ އައު ވާދަވެރިކަމެއް އުފެދިގެން ހިނގައިދާނެ ކަމަށް ބުނެ ޗައިނާގެ ދައުލަތުގެ މީޑިއާއިން ވަނީ އިންޒާރު ދީފައެވެ.
ޗައިނާގެ ޚާރިޖީ ވުޒާރާގެ ތަރުޖަމާނު ގުއޯ ޖިއާކުން ވިދާޅުވީ، ބޭރު ޖައްވުގައި ހަތިޔާރު އެޅުވުމަށާއި، ޖައްވަކީ ހަނގުރާމައިގެ މައިދާނަކަށް ހެދުމަށް ބެއިޖިންގް ދެކޮޅު ހަދާ ކަމަށެވެ. އަދި "ބޭރު ޖައްވުގައި އަސްކަރީ ބާރު އިތުރަށް ފުޅާކުރުން ހުއްޓާލުމަށާއި، އަމަލީ ފިޔަވަޅުތަކާއެކު ދުނިޔޭގެ ސްޓްރެޓީޖިކް ހަމަޖެހުން ދެމެހެއްޓުމަށް އަޅުގަނޑުމެން އެމެރިކާއަށް ގޮވާލަން،" ކަމަށް އޭނާ ވިދާޅުވިއެވެ.
މި މައްސަލަ ފެންމަތިވީ އެމެރިކާގެ ވައިގެ ސިފައިންގެ ސެކްރެޓަރީ ޓްރޯއީ މެއިންކް، ދުޝްމަނުންގެ ނުރައްކާތަކުން ދިފާއުވުމުގެ ގާބިލުކަން ލިބިފައިވާ އޯބިޓް ސްޕޭސް ކޮންޓްރޯލް ހަތިޔާރު އެމެރިކާގައި ހުރިކަމަށް ހާމަކުރެއްވުމާ ގުޅިގެންނެވެ. މިއީ އޯބިޓުގައި އެމެރިކާގެ ހަތިޔާރު ހުރިކަމަށް ޕެންޓަގަންގެ އޮފިޝަލަކު މިހާތަނަށް އެންމެ ސާފުކޮށް އެއްބަސްވި ފަހަރެވެ.
ޗައިނާގެ ގްލޯބަލް ޓައިމްސް އިން ބުނެފައިވަނީ، މިކަމުގެ ސަބަބުން "ޖައްވީ ބާރުވެރިކަން" ހޯދުމުގެ ވާދަވެރިކަމެއް އުފެދޭނެ ކަމަށެވެ. އަދި މީގެ ސަބަބުން ސަލާމަތީ ދަތިކަމެއް އުފެދި، އެހެން ގައުމުތަކުން ވެސް ޖައްވީ ދިފާއީ ގާބިލުކަން އިތުރުކުރަން މަޖުބޫރުވާނެ ކަމަށް ޗައިނާގެ ދައުލަތުގެ މީޑިއާއިން ވަނީ ފާހަގަކޮށްފައެވެ.
މި ލިޔުން ކިޔާލުމުން
