އެމެރިކާއަށް 11 ސެޕްޓެމްބަރު 2001 ގައި ދިން ޓެރަރިސްޓް ހަމަލާތައް ރޭވި ކަމަށް ތުހުމަތުކުރެވޭ ޚާލިދު ޝައިޚް މުޙައްމަދާއި އިތުރު ތިން މީހެއްގެ ޝަރީޢަތް އަސްކަރީ ޓްރައިބިއުނަލެއްގައި 5 ޖޫން 2028 ގައި ފެށުމަށް އެމެރިކާގެ އަސްކަރީ ފަނޑިޔާރަކު އަމުރުކުރައްވައިފިއެވެ. ގާތްގަނޑަކަށް 3،000 މީހުން މަރުވި މި ހާދިސާއާ ގުޅިގެން ގުއަންޓަނާމޯ ބޭގައި ކުރިއަށްދާ މި މައްސަލައިގެ ޝަރީޢަތް ފެށޭނީ، އަސްކަރިއްޔާގެ މެންބަރުންގެ މައްޗަށް އެކުލެވޭ ޖޫރީ ޕެނަލެއް ހޮވުމަށްފަހުގައެވެ.
ޝަރީއަތުގައި އިބްތިދާއީ ބަޔާންތައް ދޭން ފަށާނީ ޕެނަލް އެކުލަވާލާތާ 30 ދުވަސް ފަހުންނެވެ. އެއަށްފަހު ޕްރޮސެކިއުޝަނުން ހެކި ހުށަހަޅައި ނިމުމުން، ދިފާއީ ފަރާތުން މައިގަނޑު ހެކިތައް ހުށަހަޅަން ފަށާނީ 60 ދުވަސް ފަހުންނެވެ.
ޖެނުއަރީ 2027 ގައި ޝަރީއަތް ފެށުމަށް ޕްރޮސެކިއުޓަރުން ހުށަހެޅި ނަމަވެސް، ޝަރީއަތުގެ ކުރިން ހުށަހަޅަންޖެހޭ ހެކިތަކާއި އަމުރުތަކަށް ތަބާވުމާ ގުޅޭ މައްސަލަތައް ހައްލުކުރުމަށް އެއީ އެކަށީގެންވާ ވަގުތެއް ނޫން ކަމަށް ބަޔާންކޮށް ފަނޑިޔާރު ވަނީ އެ ހުށަހެޅުން ބޭރުކޮށްލައްވާފައެވެ.
މަރުގެ އަދަބުން ސަލާމަތްވާނެ ފަދަ އެއްބަސްވުންތަކެއްގެ ދަށުން ކުށަށް އިއުތިރާފުވުމަށް ޚާލިދު ޝައިޚް މުޙައްމަދާއި އިތުރު ދެ މީހަކަށް ހުއްދަ ދިނުމަށް އެމެރިކާގެ އިސްތިއުނާފީ ކޯޓުން ވަނީ ދެކޮޅު ހަދައި، އެ އެއްބަސްވުމަށް ކުރިން ތާއީދުކޮށް ނިންމާފައިވާ ނިންމުންތައް ބާތިލުކޮށްފައެވެ.
ޕެންޓަގަންގެ އޮފިޝަލަކު މިދިޔަ އަހަރު ބަލައިގަތް މި އެއްބަސްވުން ރިޕަބްލިކަން މެންބަރުންގެ ފާޑުކިޔުންތަކާ ގުޅިގެން ޑިފެންސް ސެކްރެޓަރީ ބާތިލުކުރައްވާފައިވާއިރު، ގުއަންޓަނާމޯ ޖަލުގައި ހުރި ޚާލިދު ޝައިޚްގެ މައްޗަށް ތުހުމަތުކުރެވެނީ 9/11 ގެ ހަމަލާތައް ރޭވި ކަމަށެވެ.
މި ލިޔުން ކިޔާލުމުން
