ޗައިނާގެ އަސްކަރިއްޔާއާއި ކޯސްޓްގާޑު ގުޅިގެން ދެކުނު ޗައިނާ ކަނޑުގެ ސްކާބަރޯ ޝޯލް (ހުއަންޔަން ޑާއޯ) ސަރަހައްދުގައި ވައިގެ އަދި ކަނޑުގެ އަސްކަރީ ކުއްލި ތަމްރީނުތަކެއް ކުރިއަށް ގެންގޮސްފިއެވެ. މި ތަމްރީނުތަކަކީ އެ ސަރަހައްދުގެ މިލްކުވެރިކަމާ މެދު ބައިނަލްއަޤުވާމީ މަސްރަޙުގައި ޚިލާފު އުފެދިފައިވާ ދަނޑިވަޅެއްގައި ހިންގުނު މުހިންމު ހަރަކާތްތަކެކެވެ.
ސްކާބަރޯ ޝޯލް ސަރަހައްދަކީ މިހާރު ޗައިނާއިން ކޮންޓްރޯލް ކުރަމުންދާ ސަރަހައްދެއް ނަމަވެސް، ފިލިޕީންސުން ވެސް ގެންދަނީ އެ ސަރަހައްދުގެ މައްޗަށް މިލްކުވެރިކަމުގެ ދަޢުވާ ކުރަމުންނެވެ. މިކަމާ ގުޅިގެން ޗައިނާގެ އަސްކަރިއްޔާއިން ބުނެފައިވަނީ ފިލިޕީންސުން ކަނޑައަޅާފައިވާ ސަރަހައްދީ ރޮނގުތަކަކީ ޤާނޫނާ ޚިލާފު ބާޠިލު އެއްޗެއް ކަމަށެވެ.
ޗައިނާއިން ކުރިއަށްގެންދާ އަސްކަރީ ތަމްރީނުތަކުގެ މައިގަނޑު ބޭނުމަކީ ސަރަހައްދީ ހަމަޖެހުމަށް ބުރޫއަރާ ފަދަ ޢަމަލުތައް ހިންގާ ބައެއް ޤައުމުތަކަށް ރައްދުދިނުމެވެ. މީގެ އިތުރުން، ޤައުމުގެ ސިޔާދަތު ދެމެހެއްޓުމާއި ކަނޑުގެ ސަރަހައްދީ ޙައްޤުތައް ޙިމާޔަތްކުރުމުގެ ފަންނީ އަދި އަސްކަރީ ޤާބިލުކަން އިތުރުކުރުމަކީ ވެސް މި ތަމްރީނުތަކުގެ މުހިންމު މަޤްޞަދެއްގެ ގޮތުގައި އެ ޤައުމުން ފާހަގަކުރެއެވެ.
މި ތަމްރީނުތަކާ އެކު ޗައިނާއިން ވަނީ "ހުއަންޔަން އައިލެންޑް ނޭޝަނަލް ނޭޗަރ ރިޒާވް" ހިންގުމާ ބެހޭގޮތުން އައު ސިޔާސަތެއް ވެސް އާންމުކޮށްފައެވެ. މި ސިޔާސަތުގެ ދަށުން އެ ސަރަހައްދުގައި ހުއްދަ ނެތި މަސްވެރިކަން ކުރުމާއި، ކޮނެގެން ތަކެތި ނެގުމާއި، މައިނިންގް ކުރުން ފަދަ ތިމާވެއްޓަށް ގެއްލުންދެނިވި ހުރިހާ ޢަމަލުތަކެއް ވަނީ މަނާކޮށްފައެވެ.
ޒިންހުއާ ނޫސް އޭޖެންސީން ރިޕޯޓުކޮށްފައިވާ ގޮތުގައި، މި އައު އުޞޫލުތަކާ ޚިލާފުވާ ފަރާތްތަކާމެދު ޤާނޫނީ ހަރުކަށި ފިޔަވަޅު އަޅާނެއެވެ. މީގެ އިތުރުން ޗައިނާ ކޯސްޓްގާޑުން އެ ސަރަހައްދުގައި ގަވާއިދުން ޕެޓްރޯލްކޮށް، ޤާނޫނީ ބާރު ހިންގުން އިތުރަށް ވަރުގަދަކުރާނެ ކަމަށް ވެސް އެ ޤައުމުން ވަނީ އިޢުލާނުކޮށްފައެވެ.