ބަންގްލަދޭޝްގެ ރައީސް މުޙައްމަދު ޝަހާބުއްދީން، އެމަނިކުފާނުގެ ރިޔާސީ ދައުރުގެ މެދުތެރެއިން އިސްތިއުފާ ދެއްވުމަށް ނިންމަވައިފިއެވެ. ރައީސް ޝަހާބުއްދީން މަޤާމުން އިސްތިއުފާ ދެއްވަން ނިންމެވީ އެމަނިކުފާނަށް ސަރުކާރުގެ ފަރާތުން ބޮޑެތި ފިއްތުންތަކެއް ކުރިމަތިވެފައިވާ ދަނޑިވަޅެއްގައެވެ.
ރިޕޯޓުތައް ބުނާގޮތުން ސަރުކާރުން ރައީސް ޝަހާބުއްދީނަށް އިސްތިއުފާ ދެއްވުމަށް ބާރުއަޅާފައިވަނީ، ކުރީގެ ބޮޑުވަޒީރު ޝެއިޚް ޙަސީނާއާ އެމަނިކުފާނާ އޮތް ބަދަހި ގުޅުމުގެ ސަބަބުންނެވެ. މި މައްސަލަ ބޮޑުވެފައިވަނީ ޝެއިޚް ޙަސީނާ އަނބުރާ ޤައުމަށް ވަޑައިގަންނަވާނެކަން އިޢުލާން ކުރެއްވުމާ ގުޅިގެންނެވެ.
2024 ވަނަ އަހަރުގެ އުތުރިއަރައިގަތުމުގައި ސަރުކާރު ވައްޓާލުމުން އިންޑިއާއަށް ފިއްލެވި ޝެއިޚް ޙަސީނާ ވަނީ، އޭނާގެ މައްޗަށް އިއްވާފައިވާ މަރުގެ ޙުކުމް ތަންފީޒުކުރުމަށް އަމިއްލައަށް އަމާންދެއްވުމަށް ޑިސެމްބަރު މަހު އެނބުރި ބަންގްލަދޭޝްއަށް ވަޑައިގަންނަވާނެކަން ހާމަކުރައްވާފައެވެ.ޝައިޚް ޙަސީނާގެ ސިޔާސީ ޕާޓީ ކަމަށްވާ އަވާމީ ލީގު އެ ޤައުމުގައި މިހާރު ވަނީ މަނާކޮށްފައެވެ.
ޤާނޫނީ އިޖުރާއަތުތައް ހަމަޖެހިފައިވާ ގޮތުން، ރައީސްގެ އިސްތިއުފާގެ ސިޓީ މަޖިލީހުގެ ރައީސަށް އަރުވައިފިނަމަ އިސްތިއުފާ އަމަލީވާނެއެވެ. އެއަށްފަހު، އާ ރައީސަކު އިންތިޚާބުކުރެވެންދެން ވަގުތީ ގޮތުން ރައީސްކަމުގެ މަސްއޫލިއްޔަތުތަކާ ހަވާލުވެވަޑައިގަންނަވާނީ މަޖިލީހުގެ ރައީސް ހާފިޒުއްދީން އަޙްމަދެވެ.
ބަންގްލަދޭޝްގެ ސިޔާސީ މަޝްރަޙު މިހާރު އޮތްގޮތުން، ފެބްރުއަރީ މަހުގެ އިންތިޚާބު ކާމިޔާބު ކުރެއްވި ބޮޑުވަޒީރު ތާރިޤް ރަޙްމާންގެ ސަރުކާރަށް ވަނީ އާންމުންގެ ބޮޑު ޕްރެޝަރެއް ކުރިމަތިވެފައެވެ. އާންމުން ދަނީ ސަރުކާރުގެ މަތީ މަޤާމުތަކުގައި ތިއްބެވި ޙަސީނާގެ ބައިވެރިން ވަކިކުރުމަށް ގޮވާލާ މުޒާހަރާ ކުރަމުންނެވެ.