"ސައުތު އޭޝިއާ ރީޖަނަލް މީޓީންގ އޮން ދަ ޕްރޮޓެކްޝަން އޮފް ވިކްޓިމްސް އެންޑް ވިކްޓިމް ވިޓްނެސަސް އޮފް ހިއުމަން ޓްރެފިކިންގ ވިތްއިން ކްރިމިނަލް ޖަސްޓިްސް ޕްރޮސެސަސް" ގައި ދިވެހި ދެފުލުހަކު ބައިވެރިވެއްޖެއެވެ.
މޭ 21 އިން 22 އަށް ނޭޕާލްގެ ކަތަމަންޑޫގައި ބޭއްވި މި ބައްދަލުވުމުގައި ދިވެހި ފުލުހުންގެ ޚިދުމަތުގެ ފަރާތުން ބައިވެރިވެފައިވަނީ ޗީފް އިންސްޕެކްޓަރ އޮފް ޕޮލިސް ވަސީމާ ޙަސަންއާއި، ސަބް އިންސްޕެކްޓަރ އޮފް ޕޮލިސް ޙަަސަން ރަޝީދުއެވެ.
ފުލުހުން ބުނީ މި ބައްދަލުވުމުގެ މައިގަނޑު އަމާޒަކީ ދެކުނު އޭޝިއާގެ ގައުމުތަކުގައި އިންސާނީ ވަގުފާރީގެ ޝިކާރައަކަށްވާ ފަރާތްތައް ޖިނާއީ މަރުހަލާތަކުގައި ބައިވެރިވާއިރު، އެ ފަރާތްތަކުގެ ހައްގުތަކަށް އިސްކަންދީ ރައްކާތެރިކަން ކަށަވަރުކޮށްދިނުން ކަމަށެވެ.
އަދި މި ބައްދަލުވުމުގައި، ޖިނާއީ އަދުލުގެ ނިޒާމުގައި މަސައްކަތްކުރާ ފަރާތްތަކަށް އެހީތެރިކަން ފޯރުކޮށްދިނުމާއި، މައްސަލަތައް ތަހުގީގުކުރުމުގައާއި، އިންސާނީ ވަގުފާރީގެ ޝިކާރައަކަށްވާ ފަރާތްތަކަށް ޝަރީއަތުގެ މަރުހަލާގައި ފުރިހަމަ ރައްކާތެރިކަމާއި ގާނޫނީ އެހީތެރިކަން ލިބޭނެކަން ކަށަވަރުކުރުމާއި އަދި އެ ފަރާތްތަކުން އެއްވެސް ބިރުވެރިކަމެއް ނެތި، އަމިއްލަ އިހުތިޔާރުގައި މި މަރުހަލާތަކުގައި ބައިވެރިވުމަށް ބާރުއަޅާފައިވާ ކަމަށްވެސް ފުލުހުން ބުންޏެވެ.