އަފްޣާނިސްތާނުގެ ވެރިރަށް ކާބުލްގައި ޗައިނާ މީހުން ހިންގާ ރެސްޓޯރެންޓެއްގައި އެއްޗެއް ގޮވައި، ޗައިނާގެ ރައްޔިތަކާއި އަފްޣާނިސްތާނުގެ ހަ މީހަކު މަރުވެއްޖެއެވެ. މި ހާދިސާގައި ކުޑަކުއްޖަކާ އެކު އިތުރު ބަޔަކަށް އެކިވަރުގެ އަނިޔާތައް ވަނީ ލިބިފައެވެ.
ފުލުހުންގެ ތަރުޖަމާނު ޚާލިދު ޒަދްރާން "އަލްޖަޒީރާ" އަށް މަޢުލޫމާތު ދެއްވި ގޮތުގައި، ހޯމަ ދުވަހު މި ގޮވުން ގޮވާފައިވަނީ ކާބުލްގެ ވިޔަފާރި މަރުކަޒުތަކާއި، އޮފީސް އިމާރާތްތަކާއި އަދި ބޭރުގެ އެމްބަސީތައް ހިމެނޭ "ޝަހްރޭ ނައު" އަވަށުގައެވެ. މި ސަރަޙައްދަކީ މުޅި ސިޓީގައި ވެސް އާންމުކޮށް އެންމެ އަމާން ސަރަޙައްދެއްގެ ގޮތުގައި ބެލެވޭ ތަނެކެވެ.
ޒަދްރާން ވިދާޅުވީ، މި ހަމަލާ އަމާޒުވި ޗައިނާގެ ނޫޑްލްސް ރެސްޓޯރެންޓަކީ ޗައިނާގެ މުސްލިމެއް ކަމަށްވާ ޢަބްދުލް މަޖީދާއި އޭނާގެ އަންހެނުންގެ އިތުރުން، އަފްޣާންގެ ރައްޔިތެއް ކަމަށްވާ ޢަބްދުލް ޖައްބާރު މަޙްމޫދު ގުޅިގެން ހިންގާ ތަނެކެވެ. އަދި މިއީ ޚާއްޞަކޮށް ޗައިނާގެ މުސްލިމުންނަށް ޚިދުމަތް ދިނުމަށް ހިންގާ ތަނެކެވެ.
މި ހާދިސާގައި މަރުވި ޗައިނާ މީހާއަކީ "އައްޔޫބު" ނަމަކަށް ކިޔާ މީހެކެވެ. ރެސްޓޯރެންޓްގެ ބަދިގެއާ ކައިރީގައި ހިނގި މި ގޮވުމުގައި ހަ އަފްޣާނުން ވެސް މަރުވެފައިވާއިރު، އިތުރު ބަޔަކަށް ވަނީ ބޮޑެތި އަނިޔާތަކެއް ލިބިފައެވެ.
އައި.އެސް.އައި.އެލް (އައިސިސް) ގެ އަފްޣާނިސްތާނު ގޮފިން ވަނީ މި ހަމަލާގެ ޒިންމާ އުފުލާފައެވެ. އެ ޖަމާޢަތުން ނެރުނު ބަޔާނެއްގައި ބުނެފައިވަނީ މިއީ އަމިއްލައަށް މަރުވެގެން ދިން ހަމަލާއެއް ކަމަށެވެ. އައިސިސްގެ އަމާޤް ނިއުސް އެޖެންސީން ބުނި ގޮތުގައި، ޗައިނާ ސަރުކާރުން އުއިގޫރު މުސްލިމުންނާ ދެކޮޅަށް ހިންގަމުންދާ ޖަރީމާތަކާ ގުޅިގެން، ޗައިނާގެ ރައްޔިތުންނަކީ އެ ޖަމާޢަތުގެ އަމާޒުފަތްގަނޑެއް ކަމުގައި މިހާރު ވަނީ ކަނޑައަޅާފައެވެ.
އިންސާނީ ޙައްޤުތަކަށް މަސައްކަތްކުރާ ޖަމާޢަތްތަކުން ވެސް ޗައިނާގެ ޝިންޖިއާން ސަރަޙައްދުގައި ދިރިއުޅޭ 10 މިލިއަނެއްހާ އުއިގޫރު މުސްލިމުންނަށް ޗައިނާ ސަރުކާރުން ބޮޑެތި އަނިޔާތަކެއް ދެމުންދާ ކަމަށް ތުހުމަތު ކުރެއެވެ. ނަމަވެސް، ޗައިނާއިން މި ތުހުމަތުތައް ދޮގުކުރެއެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ގޮވުމުގެ ބާރުގަދަކަމުން ރެސްޓޯރެންޓްގެ ކުރިމަތީ ފާރުން ބޮޑު ބައެއް ވެއްޓި، މަގުމައްޗަށް ގާކުނޑިތައް ބުރައިގެން ގޮސް، މުޅި ސަރަޙައްދުގައި ވަނީ ދުންބޮޑުވެފައެވެ.
އިޓަލީގެ އެހީދޭ ޖަމާޢަތެއް ކަމަށްވާ "އިމަޖެންސީ" އިން ބުނި ގޮތުގައި، އެ ޖަމާޢަތުން ކާބުލްގައި ހިންގާ ހޮސްޕިޓަލަށް މި ހާދިސާގައި އަނިޔާވި 20 މީހަކު ގެންދެވުނު އިރު، އޭގެ ތެރެއިން ހަތް މީހަކު ވަނީ ހޮސްޕިޓަލަށް ގެންދިޔަ އިރުވެސް މަރުވެފައެވެ. އަނިޔާވި މީހުންގެ ތެރޭގައި ހަތަރު އަންހެނުންނާއި ކުޑަކުއްޖަކު ހިމެނޭ ކަމަށް ވެސް އެ ޖަމުޢިއްޔާއިން މަޢުލޫމާތު ދެއެވެ.
2021 ވަނަ އަހަރު އެމެރިކާ ސިފައިން ފޭބުމަށްފަހު ތާލިބާނުން އަލުން ވެރިކަމާ ހަވާލުވި ފަހުން، ކާބުލް އާއި އަފްޣާނިސްތާނުގެ އެކި ސަރަޙައްދުތަކުގައި މިފަދަ ގޮވުންތައް ގޮވުން ވަނީ ނިސްބަތުން މަދުވެފައެވެ. އެހެންނަމަވެސް، އައިސިސްއާ ގުޅުންހުރި ޖަމާޢަތްތައް އަދިވެސް އެ ޤައުމުގައި ހަރަކާތްތެރިވަމުންދާއިރު، ދޭތެރެ ދޭތެރެއިން މިފަދަ ހަމަލާތައް ދަނީ ދެމުންނެވެ.