މާލޭ ސިޓީ ގެ މޭޔަރުގެ މަގާމަށް ޕީއެންސީގެ ޓިކެޓުގައި ވާދަކުރައްވާ މޫސާ އަލީ ޖަލީލަކީ މާލޭގެ ރަށްވެހިންގެ މެދުގައި ތަފާތުކުރުމެއް ނެތި ރައްޔިތުންނަށް ހިދުމަތްކުރައްވާނެ ހިންގުންތެރިއެއްކަމަށް ކޮންގުރެސް ޕާޓީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ފަލާހު ވިދާޅުވެއްޖެއެވެ.
މޫސާ އަލީ ޖަލީލުގެ ކެމްޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ފަލާހު ވިދާޅުވީ ޖަލީލުގެ މާޒީއާއި ހިދުމަތަށް ބައްލަވައި، މާލެ ސިޓީގެ މޭޔަރުކަމަށް ވާދަކުރައްވާ އެހެން ކެންޑިޑޭޓުންނާ އަޅައިކިޔުމުން އޭނާ އަށްވުރެ ވަކި ރަނގަޅު ކެންޑިޑޭޓެއް ނެތް ކަމަށެވެ.
ފަލާހު ފާހަގަކުރެއްވި ގޮތުގައި މޫސާ އަލީ ޖަލީލަކީވެސް މާލޭ ރައްޔިތުންނަށް ހިދުމަތްކުރެއްވުމަށް ނުކުމެވަޑައިގެން ހުންނެވި އިހުލާސްތެރި ތެދުވެރި ބޭފުޅެކެވެ. ޖަލީލް އަކީ މާލޭ ސިޓީ ރައްޔިތުންނަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެވަޑައިގެންފައިވާ ވައުދުފުޅުތައް ފުއްދުމުގައި ސަރުކާރަށް ފުރިހަމަ އެއްބާރުލުން ދެއްވާނެ ބޭފުޅެއް ކަމަށްވެސް ވިދާޅުވިއެވެ.
"މޫސާ އަލީ ޖަލީލަކީ އިއްޒަތްތެރި ރައީސުލްޖުމްހޫރިއްޔާ، މި ސަރުކާރުން ވެވަޑައިގެންފައިވާ ވައުދުފުޅުތައް ފުއްދުމަށް ރަނުން ރަނަށް ސަރުކާރަށް އެހީތެރިވެދޭނެ، މާލޭގެ އެއްވެސް ރައްޔިތަކު ތަފާތުނުކުރައްވައި، މާލޭގައި ދިރިއުޅުއްވާ ރާއްޖޭގެ އެހެން ރަށްރަށުގެ ރައްޔިތުންނާމެދު ތަފާތުނުކުރައްވާނެ ބޭފުޅެއް،" ފަލާހު ވިދާޅުވިއެވެ.
ޖަލީލަކީ ޒުވާން އުމުރުފުޅުން ފެށިގެން ދައުލަތަށް ހިދުމަތްކުރައްވައި، މަތީ ފަންތީގެ އެކި މަގާމުތައް އަދާކުރެއްވި ބޭފުޅެއްކަމަށާއި، ހިދުމަތް ކުރެއްވި އެއްވެސް ދާއިރާއެއްގައި ގައުމަށް ނުވަތަ ރައްޔިތުންނަށް ގެއްލުންވާނެ ކަމެއް ކުރެއްވިކަމުގެ އަޑެއް ނީވޭކަން ފަލާހު ފާހަގަކުރެއްވިއެވެ.