ދެކުނު އެފްރިކާގެ ސަރަހައްދުތަކަށް ބޯކޮށް ވާރޭވެހި، ފެންބޮޑުވުމުގެ ސަބަބުން 100 އަށްވުރެ ގިނަ މީހުން މަރުވެއްޖެއެވެ. މި ހާދިސާތަކާ ގުޅިގެން ގިނަ ބަޔަކު ރައްކާތެރި ހިސާބުތަކަށް ބަދަލުކުރުމާއި، މީހުން ސަލާމަތްކުރުގެ ބޮޑު އޮޕަރޭޝަނެއް ދަނީ ހިންގަމުންނެވެ. ކަމާބެހޭ އިދާރާތަކުން އިންޒާރު ދޭ ގޮތުގައި، ކުރިއަށް އޮތް ތަނުގައި މޫސުން އިތުރަށް ގޯސްވެ، ގެއްލުންތައް އިތުރުވުމުގެ ފުރުސަތު އެބައޮތެވެ.
ފާއިތުވި ހަފުތާތަކުގައި ދެކުނު އެފްރިކާ، މޮޒަމްބީކް އަދި ޒިމްބާބުވޭއަށް މެދުނުކެނޑި ބޯކޮށް ވާރޭވެހުމުގެ ސަބަބުން ކޯރުތައް ފުރި ބަންޑުންވެ، އުމްރާނީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ. މީގެ ސަބަބުން ބައެއް އަވަށްތައް މުޅިން އެކަހެރިވެފައިވާއިރު، އެ ސަރަހައްދުގެ މޫސުމާ ބެހޭ އިދާރާތަކުން ވަނީ ފެންބޮޑުވެދާނެކަމުގެ އިތުރު އިންޒާރުތައް ނެރެފައެވެ.
ދެކުނު އެފްރިކާގެ އޮފިޝަލުން ހުކުރު ދުވަހު ހާމަކުރި ގޮތުގައި، އެ ގައުމުގެ އުތުރުގެ ޕްރޮވިންސްތައް ކަމަށްވާ ލިމްޕޯޕޯ އަދި އެމްޕުމަލަންގާގައި ފެންބޮޑުވުމުގެ ސަބަބުން މަދުވެގެން 30 މީހުން ވަނީ މަރުވެފައެވެ.
ކޯރުތަކުގެ ފެންގަނޑު ބޮޑުވެ، ރަށްތަކާއި އަވަށްތަކުގެ ތެރެއަށް ފެންގަނޑު ވަދެފައިވާއިރު، ގޭގޭގެ ފުރާޅުމަތީގައާއި ގަސްގަހަށް އަރައި ތިބި މީހުން ސަލާމަތްކުރުމަށް އަސްކަރީ ހެލިކޮޕްޓަރުތައް ދަނީ ހަރަކާތްތެރިވަމުންނެވެ. މީގެ އިތުރުން، ޒިމްބާބުވޭގެ ބޯޑަރު ސަރަހައްދުގައި ފެންބޮޑުވެ ވަށައިގެން ބަންދުވުމުގެ ސަބަބުން، އެ ސަރަހައްދުގައި ތިބި ސަލާމަތީ ބާރުތަކުގެ މީހުން ވެސް ވަނީ އެ ސަރަހައްދުން ރައްކާތެރި ހިސާބުތަކަށް ބަދަލުކޮށްފައެވެ.
ރައީސް ސައިރިލް ރާމަފޯސާ ބުރާސްފަތި ދުވަހު ލިމްޕޯޕޯގެ ހާލަތު ބައްލަވާލެއްވުމަށްފަހު ވިދާޅުވީ، އެއް ހަފުތާއަށްވުރެ ކުރު މުއްދަތެއްގެ ތެރޭގައި އެ ސަރަހައްދަށް 400 މިލިމީޓަރު (16 އިންޗި) ގެ ވާރޭ ވެހިފައިވާ ކަމަށެވެ. އަދި އެއް އަވަށަކުން އެކަނިވެސް 36 ގެއެއް އެއްކޮށް ހަލާކުވެފައިވާ ކަމަށް އޭނާ ފާހަގަކުރެއްވިއެވެ.
ލިމްޕޯޕޯގެ ޕްރިމިއާ ފޯފީ ރަމަޗޫބާ ވިދާޅުވި ގޮތުގައި، މުޅި ޕްރޮވިންސްގައި 1,000 އަށްވުރެ ގިނަ ގެއަށް ވަނީ އެކިވަރުގެ ގެއްލުންތައް ލިބިފައެވެ.