ހުޅުމާލޭ ތިން ވަނަ ފިޔަވަހީގެ ބިން ހިއްކުމުގެ މަޝްރޫޢުގެ 47 ހެކްޓަރުގެ ބިންހިއްކާ ނިމިފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.
މި މަޝްރޫޢުގެ އަދާހަމަ ހާމަކޮށް މިއަދު އެކްސްގައި ކުރި ޕޯސްޓެއްގައި އެމްއޭސީއެލް އިން ބުނީ މިހާތަނަށް މި މަޝްރޫޢުގެ ދަށުން 47ހެކްޓަރުގެ ބިން ހިއްކާފައިވާ ކަމަށާއި، އެއާއެކު މަޝްރޫޢުގެ %74.6 މަސައްކަތް ނިމިފައިވާ ކަމަށެވެ.
އަދި މަސައްކަތް އަވަސްކުރުމަށްޓަކައި އިތުރު ޑްރެޖަރެއް މޮބިލައިޒްކުރެވިފައިވާ ކަމަށާއި، މިއާއެކު އެއް ފަހަރާ ދެ ޑްރެޖަރު ބޭނުންކޮށްގެން ބިން ހިއްކުމުގެ މަސައްކަތް ކުރަމުންދާ ކަމަށްވެސް އެމްއޭސީއެލް އިން ބުންޏެވެ.
Hulhumalé Phase 03 Update:
47 hectares reclaimed, with overall progress reaching 74.6%. Land reclamation works continue steadily with two dredgers actively operating on site. pic.twitter.com/7MVjHKPi20
— Maldives Airports Company Ltd (@MACLmedia) December 27, 2025
ހުޅުމާލޭ ފޭސް 3 ހިއްކުމަށް ބޭނުންވާ ޑްރެޖަރ، ޓީ.އެސް.އެޗް.ޑީ ޕްރިންސް ޑެއާ ނެޑަލެންޑެން ގެނެސްފައިވާކަން ރައީސް ޑރ. މުހައްމަދު މުޢިއްޒު އިޢުލާންކުރެއްވީ މިދިޔަ ނޮވެންބަރު މަހުގެ 25 ގައެވެ.
ޑްރެޖަރ ޓީ.އެސް.އެޗް.ޑީ ޕްރިންސް ޑެއާ ނެޑަލެންޑެން ގެ އިތުރުން ޓީ.އެސް.އެޗް.ޑީ އޮރަންޖީ ނަމަކަށް ކިޔާ ޑްރެޖަރުވެސް ބިންހިކުމުގެ މަސައްކަތުގައި ބޭނުންކުރެވޭނެ ކަމަށް އެމަނިކުފާނު ވިދާޅުވިއެވެ.
ހުޅުމާލޭ 3 ހިއްކުމުގެ މަސައްކަތް މި ޑިސެންބަރު މަހުގެ ނިޔަލަށް ނިންމައި، ދެން ދެ ޑްރަޖަރ ވެސް ގިރާވަރު ފަޅު ހިއްކުމަށް ގެންގޮސް ކުރިއަށް އޮތް ދެ ތިން މަސްދުވަހުގެ ތެރޭގައި ގިރާވަރު ފަޅު ހިއްކާ ނިމޭނެ ކަމަށް ރައީސް ވިދާޅުވިއެވެ.
މާލެ ސަރަހައްދުގެ ހައުސިން މައްސަލައަށް ހައްލުހޯދަވުމަށް ކުރައްވަމުން ގެންދަވާ މަސައްކަތުގެ ދަށުން، ހުޅުމާލޭ ފޭސް 3 ހިއްކުމާއި ގިރާވަރު ފަޅު ހިއްކުމަށް ބޭނުންވާ އިތުރު ޑްރެޖަރު ގެނެސް ބިންހިއްކުމުގެ މަސައްކަތް އަވަސް ކުރައްވާނޭ ކަމަށް ރައީސް މީގެކުރިން ވަނީ ހާމަކުރައްވާފައެވެ.