ކުރިއަށް އޮތީ ގެދޮރުވެރިކަމުގެ ދާއިރާއިން މ. ދިއްގަރުގެ ތަރައްޤީއަށް، އަދި އާބާދީ އެއްފަސްކުރުމަށްވެސް މުހިންމު ދުވަސްތަކެއްކަމުގައި ޤަބޫލުފުޅުކުރައްވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ ރާއްޖޭގެ ހަތަރު އަތޮޅެއްގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، މ. ދިއްގަރަށް މިއަދު ހެނދުނު ވަޑައިގެން، ރަށުގެ ރައްޔިތުންނާ ބައްދަލުކުރައްވައި، ވާހަކަފުޅުދައްކަވަމުންނެވެ.
މ. ދިއްގަރަށް ދިމާވެފައިވާ ގެދޮރުގެ ދަތިކަމުގެ މައްސަލަ ހައްލުކުރުމަށްޓަކައި ހިންގޭ ހައުސިންގް މަޝްރޫޢުތަކުގެ ތެރެއިން ފުރަތަމަ މަޝްރޫޢުގެ ގޮތުގައި، 75 ހައުސިންގް ޔުނިޓް އެޅުމުގެ އަމަލީ މަސައްކަތް މިއަހަރުގެ ތެރޭގައި ފެށިގެންދާނެ ކަމަށާ، މި މަޝްރޫޢު ނިމުމުގެ ކުރިން، އިތުރު 75 ޔުނިޓް އެޅުމުގެ މަސައްކަތް ފެށުމަށް ގަސްތުކުރައްވާނެ ކަމަށާ، އަދި އެކަމަށް ވާންޖެހޭ ތައްޔާރީތަކުގެ މަސައްކަތްތައް، ކަމާ ގުޅުންހުރި ފަރާތްތަކުން މިހާރުވެސް ކުރައްވަމުން ގެންދަވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
"މިއީ ރަށުގެ ބޯހިޔާވަހިކަމުގެ ފުރަތަމަ މަޝްރޫޢު. މިއީ ފެށުމެއް. މި 75 ޔުނިޓްގެ މަޝްރޫޢުގެ އިތުރުން، އިތުރު 75 ޔުނިޓް އެޅުމުގެ މަސައްކަތް މި މަޝްރޫއުއާ އެކުވެގެން ފައްޓާނަން. އާބާދީ އެއްފަސްކުރުމުގެ ސިޔާސަތަށްވެސް މިކަމުގެ އެބަ ފަހިގެންދޭ." ރައީސް ވިދާޅުވިއެވެ.
މީގެ އިތުރުން ދިއްގަރު ބަނދަރުގެ މައްސަލައަށްވެސް ރައީސުލްޖުމްހޫރިއްޔާގެ ވާހަކަފުޅުގައި ވަނީ އަލިއަޅުއްވާލައްވާފައެވެ. އެގޮތުން ޖާގައިގެ ގޮތުންނާއި، މަރާމާތުގެ ގޮތުން ބަނދަރު އަޕްގްރޭޑްކުރަންޖެހިފައި އޮތްކަން ފާހަގަކުރައްވައި، ވާހަކަފުޅުކުރިއަށް ގެންދަވަމުން ރައީސުލްޖުމްހޫރިއްޔާ ވަނީ، ކުރިއަށް އޮތް 2026 ވަނަ އަހަރުގެ ކުރީކޮޅު، ވަރަށް ބޮޑު އިސްކަމެއް ދެއްވައިގެން މިމަޝްރޫޢު ހިންގަވައިދެއްވާނެ ކަމުގައި ވިދާޅުވެފައެވެ.
ހަމަމިއާއެކު، ދިއްގަރު ސްކޫލަށް ދިމާވެފައިވާ ޖާގައިގެ ދަތިކަމަށް ހައްލު ހޯއްދަވައިދެއްވުމުގެ ގޮތުން، މަލްޓިޕަރޕަސްހޯލަކާއެކު 9 ކުލާސްރޫމް ހިމެނޭހެން އިތުރު އިމާރާތެއް ތަރައްޤީކުރުމުގެ މަސައްކަތް، 2026 ވަނަ އަހަރުގެ ބަޖެޓުގައި ހިމަނުއްވައިގެން ކުރިއަށްގެންގޮސްދެއްވާނެކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
ދިއްގަރަކީ މަސްވެރި ރަށެއްގެ ގޮތުގައި ސިފަކުރައްވަމުން ރައީސުލްޖުމްހޫރިއްޔާ ވަނީ، މުޅި ރާއްޖޭގެ މަސްވެރިކަމުގެ ސިނާއަތަށް ގެންނަ ކުރިއެރުންތަކުގެ ސަބަބުން، ރަށުގެ މަސްވެރިންނަށްވެސް ކުރިއެރުންތަކެއް ލިބިގެންދާނެކަން ފާހަގަކުރައްވާފައެވެ. ބައެއް ކަންކަމަކީ، ކުއްލިއަކަށް ކުރެވޭނެ ކަންކަމެއް ނޫން ކަމަށާ، އެއީ އެއްވެސް ހާލެއްގައި ވަޢުދު ނުފުއްދެވުމެއް ނޫންކަމުގައި ރައީސުލްޖުމްހޫރިއްޔާ ވިދާޅުވިއެވެ.
ތަޢުލީމީ ދާއިރާ، ޞިއްޙީ ދާއިރާ، ކުޅިވަރުގެ ދާއިރާ، އުމްރާނީ ވަސީލަތްތަކުގެ ދާއިރާ، ގެދޮރުވެރިކަމުގެ ދާއިރާ ހިމެނޭހެން، މިފަދަ ހުރިހާ ދާއިރާއަކުން، ކުރިއަށް އޮތް ދުވަސްތަކުގައި ފެނިގެންދާނީ އަމަލީ ގޮތުން ވަރަށް ގިނަ ކަންތައްތައް ހިނގާ، އަދި ނިމެމުންދާ މަންޒަރުކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ދެއްވާފައެވެ.
ރައީސް ވިދާޅުވީ ދިއްގަރާ، އަދި މުލަކަތޮޅަކީ މަސްވެރިކަމުގެ ސިނާއަތް ފުޅާ ސަރަޙައްދަކަށްވުމާއެކު، މަސްވެރިންނަށް ފަސޭހަ ގޮތްތަކެއް ހޯއްދަވައިދެއްވާނެކަމުގެ ޔަގީންކަން ދެއްވާކަމަށެވެ. އެގޮތުން ހެޔޮ އަގުގައި ތެލާ އައިސް ފޯރުކޮށްދިނުމުގެ މަސައްކަތްތައް އެކި މަރުހަލާގައި ކުރިއަށްދާކަންވެސް ރައީސް ފާހަގަކުރެއްވިއެވެ. އަދި މަސްވެރިންގެ ދަފްތަރާ، ލޯނަކީވެސް އެ ދާއިރާއި، ރާއްޖޭގެ ހުރިހާ މަސްވެރިންނަށް ސަރުކާރުން ފަހިކޮށްދޭ ވަރަށް މުހިންމު ފުރުޞަތެއްކަމަށްވެސް ރައީސް ވިދާޅުވިއެވެ.
ދިއްގަރު ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވަނީ މ.ދިއްގަރު ހިއްކި ބިމުގެ ގޮނޑުދޮށް ހިމާޔަތްކުރުމުގެ މަޝްރޫޢުގެ ޢަމަލީ މަސައްކަތުގެ ނިމުން ފާހަގަކުރައްވާފައެވެ. އަދި 30 އެނދުގެ ހޮސްޕިޓަލެއް ތަރައްޤީކުރުމަށް އެމްޓީސީސީއާ ވަނީ ހަވާލުކުރައްވާފައެވެ.
