އަންނަ ފެބުރުވަރީ 08 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ބައި- އިލެކްޝަންތަކުގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓުތައް އާންމުކޮށްފިއެވެ.
ފެބްރުއަރީ މަހުގެ 8 ގައި ބާއްވަން ހަމަޖެހިފައިވަނީ ހދ. މަކުނުދޫ ކައުންސިލް މެންބަރު، ނ. ލަންދޫ ކައުންސިލުގެ އަންހެން މެންބަރު އިންތިޚާބު ކުރުމުގެ ބައި-އިލެކްޝަނުގެ އިތުރުން 10 ރަށެއްގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަުގެ ބައި-އިލެކްޝަންތަކެވެ.
އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތައް ބާއްވަން ހަމަޖެހިފައިވަނީ ގއ. ކަނޑުހުޅުދުއާއި، ލ. ގަމާއި، ނ. މިލަދުއާއި، ނ. ފޮއްދުއާއި، ދ. ހުޅުދެއްޔާއި، ރ. އިންނަމާދުއާއި، ތ. ބުރުންޏާއި، ބ. ގޮއިދުއާއި، އދ. ހަންޏާމީދުއާއި، ހދ. ހިރިމަރަދޫގައެވެ.
އިލެކްޝަންސް ކޮމިޝަން (އީސީ) އިން މިއަދު ވަނީ މި ބައި- އިލެކްޝަންތަކުގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓުތައް އާންމުކޮށްފައެވެ.
މި ލިސްޓުތައް ދިވެހި ސަރުކާރުގެ ގެޒެޓުގައި އަދި އިލެކްޝަންސް ކޮމިޝަނުގެ ވެބްސައިޓުގައި އާންމުކޮށް ފެންނަން ހުންނާނެއެވެ.
މި ބައި-އިލެކްޝަންތަކުގެ ވޯޓު ނެގުމަށް ހަމަޖެހިފައިވަނީ ފެބުރުވަރީ 08 ވާ ހޮނިހިރު ދުވަހުގެ 8:00 އިން 16:00 އަށެވެ. ވޯޓު ގުނަން ފަށާނީ ހަމަ އެ ދުވަހު ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށްފަހުއެވެ.
މި ބައި-އިލެކްޝަންތަކުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ ފެބްރުވަރީ 09 ވާ އާދީއްތަ ދުވަހުއެވެ.
މި ލިޔުން ކިޔާލުމުން
