އައިޑެންޓިޓީ ތެފްޓް ފަދަ ޖަރީމާތަކަކީ ދައުލަތުގެ މުއައްސަސާތަކަށް ރައްޔިތުން ކުރާ އިތުބާރު ގެއްލޭ ކަމެއް ކަމުގައި ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ގެ ތަރުޖަމާނު، އަލްއުސްތާޛް އަނަސް ޢަބްދުއްސައްޠާރު ވިދާޅުވެއްޖެއެވެ.
އެމްޑީޕީގެ ޤާނޫނީ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަނަސް ވިދާޅުވީ، ޞައްޙަ ނޫން ފޯމުތަކެއް ހުށަހަޅާފައި ހުރެދާނެ ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ނެރުނު ނޫސްބަޔާނުގައިވެސް އިޢުތިރާފުވެފައިވާ ކަމަށެވެ.
"އެކަމަކު މިކަމުގައި އެންމެ އިސްކޮށް އުޅުއްވި އެއް މަޖިލިސް މެންބަރަކު އެބަ ވިދާޅުވޭ ތިމަންނަމެންގެ ޤާބިލުކަން އެބަހުއްޓޭ...ފިއްޓެގެ ފޯމަކީ ހަމަ ޞައްޙަ ފޯމެކޭ. ފިއްޓެ ނޫނަސް ދެން ހުރި މީހަކުވެސް ހުށަހަޅައިފިއްޔާ އެ މެންބަރޝިޕް ފޯމުވެސް ހުށަހަޅާނަމޭ. އެހެންވީމަ މި ދައްކަން އުޅޭ ވާހަކައެއް ޕާޓީ ތެރޭގެ އެކި ލެވެލްގެ ބޭފުޅުންގެ ވާހަކަތަކުންވެސް ދިމަލެއް ނުވޭ"، އަނަސް ވިދާޅުވިއެވެ.
އަނަސް ވިދާޅުވީ އެބޭފުޅުންގެ ޤާނޫނީ ޓީމުން ހުށަހެޅި އެއް ކަމަކީ ޕްރޮސިކިއުޓަރ ޖެނެރަލް (ޕީޖީ) ގެ އޮފީހުން މި މައްސަލަ ތަޙުޤީޤުކޮށްދެއްވުން ކަމަށެވެ. މީގެ އިތުރުން، ޕީޖީން މިފަދަ ކަމަކަށް އަމުރުކުރައްވަން ޖެހޭ ސަބަބަކީ ރައްޔިތުންގެ ޒާތީ މަޢުލޫމާތުތައް ނަހަމަ ގޮތުގައި ބޭނުންކޮށްގެން ވަކި ސިޔާސީ ޕާޓީއެއްގެ މެންބަރޝިޕް އިތުރުކުރުމަށް ކުރެވޭ މަސައްކަތެއްގެ ގޮތުގައި ދައުލަތުގެ ވަސީލަތްތައް ބޭނުންކުރުން ކަމަށް އަނަސް ވިދާޅުވިއެވެ.
އަދި އޭނާ ވިދާޅުވީ، މީހުންގެ ޒާތީ މަޢުލޫމާތު އޮޅުވާލައިގެން އައިޑެންޑިޓީ ތެފްޓްފަދަ ބޮޑެތި ޖަރީމާތައް ހިންގައިގެން މި ބާވަތުގެ މަސައްކަތް ކުރުމަކީ ދައުލަތުގެ މުއައްސަސާތަކަށް ރައްޔިތުން ކުރާ އިތުބާރު ގެއްލިގެންދާ ކަމެއް ކަމަށެވެ.
"އެހެންވީމާ އެ އިތުބާރު ނެގެހެއްޓުމަށްޓަކައި ނަމަވެސް ޕީޖީން އެބަޖެހޭ މި މައްސަލަ ތަޙުޤީޤުކޮށްދޭން އަވަސްކުރަން"، އަނަސް ވިދާޅުވިއެވެ.
އެމްޑީޕީން ވަނީ މިހާރު ޕީއެންސީގެ ދަފުތަރުގައި ހިމެނުމަށް އިލެކްޝަންސް ކޮމިޝަނަށް ހުށަހަޅާފައިވާ ގިނަ ފޯމުތަކަކީ ޞައްޙަ ނޫން ފޯމުތަކެއްކަން ސާފުވެފައިވާތީ ކަމަށް ބުނެ، އެ މައްސަލަ ބަލައި، އެކަމުގައި ގޮތެއް ނިމުމުގެ ކުރިން އެއިން އެއްވެސް ފޯމެއް ރަޖިސްޓްރީ ނުކުރުމަށް އިލެކްޝަންސް ކޮމިޝަން (އީސީ) އަށް ގޮވާލައިފައެވެ.
މި ލިޔުން ކިޔާލުމުން
