ބްރެޒިލްގެ ފޯވާޑް ނޭމާ ވަނީ 2026 ވަނަ އަހަރުގެ ފީފާ ވޯލްޑް ކަޕަކީ އޭނާގެ އެންމެ ފަހުގެ ވޯލްޑް ކަޕް ކަމުގައި އިޢުލާނުކޮށްފައެވެ.
އަދި މި މުބާރާތަށް ބްރެޒިލް ކޮލިފައިވާނެ ކަމުގެ ޔަޤީންކަން އޮތް ކަމަށް ވެސް އޭނާ ވަނީ ބުނެފައެވެ.
ފުޓުބޯޅައިގެ އެންމެ ވަރުގަދަ އެއް ފޯވާޑުންގެ ތެރޭގައި ހިމެނިފައިވާ ނޭމާ މިހާރު ކްލަބް ފުޓްބޯޅަ ކުޅެނީ ސަޢޫދީ ޕްރޯ ލީގުގެ ޓީމު އަލް ހިލާލް އަށެވެ. ނަމަވެސް ތަކުރާރުކޮށް ދިމާވަމުންދާ އަނިޔާތަކުގެ ސަބަބުން ގިނަ ދުވަސްތަކެއް ވަނީ ދަނޑުން ބޭރުގައި ހޭދަކުރަން ޖެހިފައެވެ.
އުމުރުން 32 އަހަރުގެ ނޭމާ ބުނެފައިވަނީ މި މުބާރާތުގައި ބައިވެރިވުމަށް އޭނާއަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. ނޭމާ ވަނީ ބްރެޒިލްގެ ފުރަތަމަ ހަތަރު ކޮލިފައިންގ މެޗުގައި ކުޅެފައެވެ. ނަމަވެސް އަނިޔާގެ ސަބަބުން ބްރެޒިލްއަށް އޭނާ ނުކުޅޭތާ މިހާރު ވަނީ އެއް އަހަރަށްވުރެ ގިނަ ދުވަސް ވެފައެވެ.
ބްރެޒިލް ވަނީ ވޯލްޑް ކަޕް ކޮލިފައިން މެޗުތަކުގައި ގިނަ ދަތިތަކާ ކުރިމަތިލާފައެވެ.
އެގޮތުން, މުބާރާތުގެ 18 ބުރުތަކުގެ ތެރެއިން 12 ބުރު ނިމިފައިވާއިރު، 10 ގައުމު ހިމެނޭ މި ގްރޫޕްގައި ބްރެޒިލް އޮތީ ފަސްވަނަ ޖާގައިގައެވެ.
ވޯލްޑް ކަޕްގެ ޖާގަ ކަށަވަރު ވަނީ ފުރަތަމަ މަތީ ހަ ޖާގައިގައި ހިމެނޭ ޓީމުތަކަށެވެ.
މި ލިޔުން ކިޔާލުމުން
