ސާފު ރީތި ގޮނޑުދޮށްތަކާއި ކަނޑުގެ ހިތްގައިމު ދިރުންތަކުގެ ސަބަބުން ރާއްޖެއަކީ މުޅި ދުނިޔޭގައިވެސް ނަންހިނގާ މަޝްހޫރު މަންޒިލެކެވެ. ރާއްޖޭގައި ހެދިފައި ހުރި ރިސޯޓުތަކުން ގުދުރަތީ ވެށީގެ ތަޖުރިބާ ކޮށްލުމަށް ފަތުރުވެރިންނަށް ގިނަ ހަރަކާތްތަކެއް ޒަމާނުއްސުރެ އޮންނަނީ ހުޅުވިފައެވެ. އެކި ބާވަތުގެ މަސްތަކާއި އެނޫންވެސް ކަނޑުގެ ދިރުންތައް ގޮނޑުދޮށަށް ތިލަކޮށް ކާންދިނުން ފަދަ އެތައް ކަމެއް މީގެތެރޭގައި ހިމެނެއެވެ.
މަތީ ފެންވަރުގެ މިފަދަ ރިސޯޓުތަކުގައި ފަތުރުވެރިން ހިތް އުފާކޮށްލަން ތަޖުރިބާ ކޮށްލާ މިބާވަތުގެ ކަންކަން ރާއްޖޭގެ މީހުން ދިރިއުޅޭ އާންމު ރަށްތަކުގައި ދާދިފަހަކާ ޖެހެންދެން ތައާރަފް ކުރެވިފައި ނެތެވެ. ނަމަވެސް ފުޅާވަމުން އަންނަ ލޯކަލް ޓުއަރިޒަމްގެ ސަބަބުން މިކަން މިވަނީ އެއްކޮށް ބަދަލުވެފައެވެ.
ބޭރުން ރަށަށް އަންނަ ފަރާތްތަކަށް ހާއްސަކޮށްގެން ވަރަށްގިނަ ރަށްތަކުގައި އެ ރަށެއްގެ ހިތްގައިމުކަން ތަޖުރިބާ ކޮށްލެވޭނެ ކަންކަން ދަނީ ތައާރަފް ކުރަމުންނެވެ. މީގެ ތެރެއިންވެސް މީހުންދިރިއުޅޭ ރަށްތަކުގައި ގިނަވަމުން އަންނަ ސްޓިންގް ރޭ ބީޗް ތައް ފާހަނގަކޮށްލެވެއެވެ.
ގިނަ ރަށްރަށުގައި މަޑި ތިލަކުރާ ގޮނޑުދޮށް ސަރަހައްދުތަކަށް ސްޓިންގް ރޭ ބީޗް ކިޔައި އުޅުނަސް، ސްޓިންގް ރޭ ގެ އިތުރުން އެހެން ވައްތަރުގެ މަޑީގެ ބާވަތްތަކާއި، ކަހަނބު އަދި މިޔަރުގެ ބާވަތްތައްވެސް މިފަދަ ސަރަހައްދުތަކަށް ތިލަވާތަން ފެނެއެވެ. ވަރަށް ގިނަ ރަށްރަށުން މިފަދަ ބީޗްތައް ކާމިޔާބުކަމާއެކު ބަލަހައްޓައި ރަށަށް ޒިޔާރަތްކުރާ ފަތުރުވެރިންނަށް ހިތްގައިމު ތަޖުރިބާއެއް ދިނުމަށް މަސައްކަތްކުރާއިރު ، މިފަދަ މަސައްކަތްތަކަކީ ރަށްރަށުގެ އާންމު ފަރުދުން އިސްނަގައިގެން ކުރަމުން އަންނަ މަސައްކަތްތަކެކެވެ.
މިފަދަ ބައެއް ބީޗް ތަކަކީ ރާއްޖެއަށް އަންނަ ފަތުރުވެރިންގެ މެދުގައި މިހާރު މަޝްހޫރު ތަންތަނެވެ. ގިނަ އަދަދަކަށް ނަރުނަގޫ މަޑި ނުވަތަ ސްޓިންގްރޭ ޖަމާވާ މި ގޮނޑުދޮށްތަކަކީ ފަތުރުވެރިން ޝައުގުވެރިކަމާއެކު ވަގުތު ހޭދަކުރާ ތަންތަނެވެ.
ފުލިދޫ ސްޓިންގް ރޭ ބީޗް
ފުލިދޫ ސްޓިންގް ރޭ ބީޗަކީ ރަށްރަށުގައި ޓްރެންޑް ވަމުން އަންނަ މިފަދަ ބީޗު ތަކުގެ ތެރެއިން އެންމެ ފާހަނގަކޮށްލެވޭ އެއް ތަނެވެ. މި ސަރަހައްދުގެ ހިތްގައިމު ފޮޓޯ ތަކާއި ވީޑިއޯތަކަށް ސޯޝަލް މީޑިއާގައި ދުނިޔޭގެ ނިސްބަތުންވެސް ބޮޑު ސަމާލުކަމެއް ލިބިފައިވާއިރު ، އެރަށަށް ޒިޔާރަތްކުރާ ފަތުރުވެރިންގެ ހާއްސަ މަންޒިލަކަށް މިތަންވަނީ ވެފައެވެ.
View this post on Instagram
ގިނަ އަދަދެއްގެ ނަރުނަގޫ މަޑި މިތަނަށް ތިލަވާއިރު މިއީ ގަވާއިދުން ކާނާ އަޅައިގެން މިތަނަށް ތިލަކޮށްފައިވާ ، މިހާރު ފުލިދޫގެ ރަށްވެހި ދިރުންތަކެކެވެ. އެކި ބާވަތުގެ ކުދި މަސްތަކާއި އެކު ގިނަ އަދަދެއްގެ މަޑި އެއްފަހަރާ ގޮނޑުދޮށުގެ ތިލަ ހިސާބުގައި އުޅޭ މަންޒަރުން ސިފަވަނީ ފުލިދޫއިން އެ ދިރުންތަކަށް ދޭ އަޅާލުން އުފާވެރިކަމާއެކު ބަލައިގަންނަ މަންޒަރެވެ. ރަށަށް ޒިޔާރަތްކުރާ ފަރާތްތައް ހިތްއުފާވާ ވަރުގެ ފޮޓޯތަކަށް މަޑިތައް އޮންނަނީ ކޮންމެ ދުވަހަކު ރުކުރުވާލާފައެވެ.
View this post on Instagram
އައްޑޫ މީދޫ ސްޓިންގެ ރޭ ބީޗް
މާލެ ސަރަހައްދުގެ ރަށްތަކާއި ހިލާފަށް ދެކުނުގެ ރަށްތަކަކީ ލޯކަލް ޓުއަރިޒަމް އެހާ ބޮޑަށް ފުޅާވެފައިވާ ސަރަހައްދެއް ނޫނެވެ. ހާއްސަކޮށް އައްޑޫ އަކީ ގިނަ ގޮންޖެހުންތަކަކާ އެކު ލޯކަލް ޓުއަރިޒަމް ފުޅާކުރުމަށް މަސައްކަތް ކުރަމުން އަންނަ ސަރަހައްދެކެވެ. މިގޮތުން އައްޑޫ މީދޫ އަކީ މިކަމުގައި މިސާލު ދައްކަމުން އަންނަ ރަށެކެވެ.
މިހާރުވެސް ފަތުރުވެރިންގެ ޝައުގުވެރިކަން ހޯދުމަށް ރަށުގެ އެކި ސަރަހައްދުތައް ރީތިކޮށް ބަލަހައްޓަމުން އަންނަ މީދޫގައި މިވަނީ ދާދިފަހުން ސްޓިންގްރޭ ބީޗެއް ހަދާފައެވެ. ރަށުގެ ޒުވާނުންތަކެއްގެ އިސްނެގުމަށް ފެށުނު މި މަސައްކަތުން މި ސަރަހައްދަށް މިވަނީ ގިނަ ބައެއްގެ ސަމާލުކަން ލިބިފައެވެ.
މީދޫއިން މި ނޫހަށް މައުލޫމާތު ހިއްސާކުރި ފަރާތަކުން މައުލޫމާތު ދިންގޮތުން މިހާރު ކޮންމެ ދުވަހަކު މީދޫ ސްޓިންގް ރޭ ބީޗަށް ގިނަ އަދަދެއްގެ މީހުން ޒިޔާރަތްކުރެއެވެ. މީގެ ތެރޭގައި ރަށުގެ އާންމުންނާއި ރަށުން ބޭރުން ޒިޔާރަތްކުރާ ފަރާތަތައްވެސް ހިމެނެއެވެ.
މުޅި ދެކުނު ސަރަހައްދުގައިވެސް އެންމެ ފުރަތަމަ ހެދުނު މި ސްޓިންގް ރޭ ބީޗަކީ މީދޫ މީހުން ފަތުރުވެރިކަން ގެނައުމަށް ހުރި ޝައުގުގެ ބޮޑުކަން ދައްކުވައިދޭ ކަމެއް ކަމަށްވެސް އެފަރާތުން ފާހަގަކުރިއެވެ.
ފަތުރުވެރިކަން ރާއްޖޭގައި ފުޅާވަމުން އަންނަ ވަރަކަށް ފަތުރުވެރިކަމާ ގުޅުންހުރި މިފަދަ ހަރަކާތްތައް ރަށްރަށުގައި އިތުރުވަމުން ދިއުމަކީ މި ސިނާއަތަށް އިތުރު ކުރިއެރުން ލިބިގެންދާނެ ކަމެއް ކަމަށް ގަބޫލުކުރެވެއެވެ. އަދި ފަތުރުވެރިކަން އެހާ ބޮޑަށް ފުޅާވެފައި ނެތް ސަރަހައްދުތަކުގައި މިފަދަ ހަރަކާތްތައް އިތުރު ވުމަކީ އެ ސަރަހައްދުތަކަށް ފަތުރުވެރިންގެ ޝައުގުއިތުރުވެގެން ދާނެ ކަމެއްކަމަށް މި ސިނާއަތުގެ ބޭފުޅުން ގަބޫލުކުރައްވައެވެ.
މި ލިޔުން ކިޔާލުމުން
2 ކޮމެންޓު
ވަރަަށް ރަނގަަޅު އަަރޓިކަލެއް.
މި ލިޔުން ކިޔާލުމުން
ސާބަސް މީދޫ ވަސީމް ފޯރ ޕްރެސިޑެންޓް
މި ލިޔުން ކިޔާލުމުން