ކެނެޑާގެ ބޮޑުވަޒީރު ޖަސްޓިން ޓްރޫޑޯ ލިބަރަލް ޕާޓީގެ ލީޑަރުކަމުން އިސްތިއުފާދިނުމަށް ތައްޔާރުވަމުންދާ ކަމުގެ ޚަބަރު ބޭރުގެ ބައެއް ނޫސްތަކުން ރިޕޯޓުކޮށްފިއެވެ.
ދަ ގްލޯބް އެންޑް މެއިލްގައި ޝާއިޢުކޮށްފައިވާ ރިޕޯޓެއްގައި ތިން މަސްދަރަކާއި ހަވާލާދީ ބުނެފައިވާ ގޮތުގައި ކެނެޑާގެ ބޮޑުވަޒީރު ޖަސްޓިން ޓްރޫޑޯ ވަނީ 6 ޖަނަވަރީ ގައި ލިބަރަލް ޕާޓީގެ ލީޑަރުކަމުން އިސްތިއުފާދޭން ނިންމާފައެވެ. އޭނާގެ އިޢުލާނުގެ ވަގުތު އަދި ކަށަވަރު ނުވިނަމަވެސް، ބުދަ ދުވަހު ބޭއްވުމަށް ހަމަޖެހިފައިވާ މުހިންމު ގައުމީ ކޯކަސް ބައްދަލުވުމުގެ ކުރިން މިކަން އިޢުލާނު ކޮށްފާނެކަމަށް ގިނަ ނޫސްތަކުން ވަނީ ރިޕޯޓުކޮށްފައެވެ.
މިކަމާ ގުޅިގެން ކެނެޑާގެ ބޮޑުވަޒީރުގެ އޮފީހުން އެއްވެސް ކޮމެންޓެއް ދީފައެއް ނުވެއެވެ.
ޓްރޫޑޯ ވަގުތުން އިސްތިއުފާދޭނީތޯ ނުވަތް މީހަކު ހޮވެންދެން މަޤާމުގައި ހުންނާނީ ކަމެއް އަދި ސާފެއް ނުވެއެވެ. ޓްރޫޑޯ ލިބަރަލް ޕާޓީގެ ލީޑަރުކަމާ ހަވާލުވީ 2013 ވަނަ އަހަރުއެވެ. އެދުވަސްވަރަކީ ލިބަރަލް ޕާޓީ، ހައުސް އޮފް ކޮމަންސްގައި ތިންވަނަ ދަރަޖައަށް ވެއްޓި، ވަރަށް ނާޒުކު ހާލަތެއްގައި އޮތް ދުވަސްވަރެކެވެ.
އޭނާ އިސްތިއުފާދީފިނަމަ، މިހާރު ކުރިމަތިވެފައިވާ ނާޒުކު ދަނޑިވަޅުގައި ޕާޓީގައި ދާއިމީ ލީޑަރަކު ނެތި ހުސްވެގެންދާނެއެވެ. ސަރވޭތަކުން ދައްކާ ގޮތުގައި އޮކްޓޯބަރު މަހުގެ ފަހުކޮޅަށް ބާއްވަންޖެހޭ ކުރިއަށް އޮތް އިންތިޚާބުގައި ލިބަރަލުންނަށް ބޮޑު ބަލިކަށިކަމެއް ކުރިމަތިވާނެ ކަމަށް ލަފާކުރެވެއެވެ. މި އިސްތިއުފާއާ ގުޅިގެން، ޑޮނަލްޑް ޓްރަމްޕްގެ ރިޔާސަތުގެ ކަންކަން ކުރިއަށް އޮތް ހަތަރު އަހަރު ބެލެހެއްޓޭނެ ސަރުކާރެއް ޤާއިމުކުރުމަށްޓަކައި އަވަސް އިންތިޚާބަކަށް ދިއުމަށް ޕްރެޝަރތަކާއި ކުރިމަތި ވެދާނެ ކަމަށް ލަފާކުރެވެއެވެ.
ޓްރޫޑޯ ވަނީ މާލިއްޔަތު ވަޒީރު ޑޮމިނިކް ލެބްލާންކާއެކު، ލެބްލާންކް ވަގުތީ ލީޑަރަކަށާއި ބޮޑުވަޒީރަކަށް ވުމާމެދު މަޝްވަރާކޮށްފައި ކަމަށް ބުނެވެއެވެ. ނަމަވެސް، ލެބްލާންކް އަމިއްލައަށް ޕާޓީގެ ލީޑަރުކަމަށް ކުރިމަތިލާން ގަސްދުކުރާނަމަ މި ޕްލޭން ތަންފީޒުކުރުމަކީ ވެދާނެ ކަމެއް ނޫނެވެ.
މި ލިޔުން ކިޔާލުމުން
