ރައީސް ޑރ. މުޙައްމަދު މުޢިއްޒު އިއުލާނުކުރެއްވި ފަދައިން އިތުރު 4 ރަށަކުން އެސްޓީއޯ ރޭޓްގައި ތެޔޮ ވިއްކަން މިހާރު ފަށާފައިވާ ކަމަށް އެސްޓީއޯއިން މިއަދު ބުނެފިއެވެ.
ކ.ގާފަރަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ ޑިސެމްބަރު 10 އިން ފެށިގެން ޅ.ފެލިވަރާއި، ކ.ހިންމަފުށްޓާއި، ގއ.ކޫއްޑުއާއި، ސ.ހުޅުމީދޫގައި ހުންނަ ފިއުލް ސަޕްލައި މޯލްޑިވްސް (އެފްއެސްއެމް) ގެ ސްޓޭޝަންތަކުން މަސްވެރިންނަށް އެސްޓީއޯ ރޭޓުގައި ތެޔޮ ގަންނަން ލިބޭނެ ކަމަށް ވިދާޅުވެފައެވެ.
ެއެސްޓީއޯއިން ނެރުނު ބަޔާނެއްގައި ބުނީ މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން، ރާއްޖޭގެ ކޮންމެ އަތޮޅެއްގެ މަދުވެގެން އެއް ރަށުން "އެސްޓީއޯ ރޭޓް" ގައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ "ފަހި ހަކަތަ" ޕޯޓަލް މެދުވެރިކޮށް މަސްވެރިންނަށް ތެޔޮ ލިބޭނެ އިންތިޒާމު އެ ކުންފުނިން ހަމަޖައްސަމުންދާ ކަމަށެވެ.
އެގޮތުން 10 ޑިސެމްބަރު ވީ އަންގާރަ ދުވަހު ފާހަގަކުރި ގައުމީ މަސްވެރިންގެ ދުވަހު ރައީސުލްޖުމްހޫރިއްޔާ އިއުލާން ކުރެއްވި ގޮތަށް، ހުޅުމާލެ ކަންނެލި ޖެޓީގެ އިތުރުން، ހިންމަފުށި، ފެލިވަރު، ކޫއްޑޫ، އަދި ހުޅުމީދޫއިން، އެސްޓީއޯ ރޭޓުގައި ތެޔޮ ވިއްކަން މިހާރު ފަށާފައިވާ ކަމަށެވެ.
2025 ގެ ނިޔަލަށް ރާއްޖޭގެ ކޮންމެ އަތޮޅެއްގައި ފިއުލް ސްޓޯރޭޖް ގާއިމުކޮށް، އެސްޓީއޯ ރޭޓްގައި ތެޔޮ ލިބޭނޭ އިންތިޒާމު ހަމަޖައްސުމަށް އެ ކުންފުނިން މަސައްކަތް ކުރަމުންދާ ކަމަށް ވެސް އެސްޓީއޯއިން ބުންޏެވެ.
ގާފަރުގައި ދެއްކެވި ވާހަކަފުޅުގައި ރައީސް ވަނީ ސަރުކާރުން މަސައްކަތް ކުރަމުން އަންނަނީ ކޫއްޑުއާއި ފެލިވަރުގައި އޮންނަ މިފްކޯގެ ބޯޓުތަކުން ހަމަ އެ ރޭޓުގައި މަސްވެރިންނަށް ތެޔޮ ދޫކުރަން ކަމަށް ވިދާޅުވެފައެވެ. އަދި ރާއްޖޭގެ އެހެން ސަރަހައްދުތަކުގައި ވެސް ކަނޑައެޅިފައިވާ ޕްލޭންގެ ތެރެއިން އިސްކަންދޭ ތަންތަނަށް ވިސްނައިގެން މަސްވެރިންނަށް ފަސޭހައިން ތެޔޮ ލިބޭނެ ގޮތް ހޯދައި ދިނުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވިއެވެ.
ރައީސް ވިދާޅުވީ މިގޮތަށް ގޮސް 2025 ނިމޭއިރުގައި މުޅި ރާއްޖޭގައި، ހަމަ ވައުދުވެވަޑައިގެންނެވި ގޮތަށް ކޮންމެ އަތޮޅެއްގައި އެސްޓީއޯ ރޭޓުގައި ތެޔޮ ލިބޭނެ ކަމަށާއި، ސަރުކާރުން ބަލަނީ މަސްވެރިންގެ އަޑު އަހައިގެން މަސްވެރިން އެދޭ ގޮތަށް ކަންތައްތައް ކުރެވޭތޯ ކަމަށެވެ. އަދި ހުވަދު އަތޮޅުން މާލެއަށް ދަތުރުކުރާ މަސްވެރިންނަށް އެ ދަތުރުގެ މެދުތެރެއިން (މ.އަތޮޅުން) ތެޔޮ ލިބޭނެ ގޮތް ހެދުމުގެ ވިސްނުން ގެންގުޅުއްވާ ކަމަށް ވެސް އެމަނިކުފާނު ވިދާޅުވެފައި ވެއެވެ.
މި ލިޔުން ކިޔާލުމުން
