ޕްރިމިއާ ލީގުގައި ރޭ އާސެނަލް އާއި ފުލަމް ކުޅުނު މެޗު އެއްވަރުވިއިރު، ޓޮޓެންހަމް ހޮޓްސްޕާސް އާއި ޗެލްސީ މެޗުން، ޗެލްސީން ފަހަތުން އަރައި މޮޅުވެއްޖެ އެވެ.
އާސެނަލް އާއި ފުލަމް ކުޅުނު މެޗު އެއްވަރުވީ 1-1ގެ ނަތީޖާ އަކުންނެވެ. ޓޮޓެންހަމް ހޮޓްސްޕާސް އާއި ޗެލްސީ މެޗުން، ޗެލްސީ މޮޅުވީ 3-4 ގެ ނަތީޖާއިންނެވެ.
ފުލަމްގެ އަމިއްލަ ދަނޑުގައި ކުޅުނު މި މެޗުގައި ލީޑު ނަގާ ލަނޑު ޖެހީ ފުލަމުންނެވެ. މި ލަނޑު ޖެހީ ރައުލް ހިމެނޭޒް އެވެ. ނަމަވެސް އާސެނަލުން ދެ ވަނަ ހާފުގެ ކުރީކޮޅުގައި ލަނޑެއް ޖަހާ ނަތީޖާ އެއްވަރުކުރިއެވެ.
ޓޮޓެންހަމްގެ އަމިއްލަ ދަނޑުގައި ކުޅުނު މި މެޗުގައި ޗެލްސީ ކޮޅަށް ޓޮޓެންހަމް އިން ފުރަތަމަ ދެ ލަނޑު ޖެހި އެވެ. ފުރަތަމަ ލަނޑު ޖެހީ ޑޮމިނިކް ސޮލާންކޭ އެވެ. އަދި އޭގެ ފަހުން، ޑޭޖާން ކުލުސެވްސްކީ ވަނީ ޓޮޓެންހަމްގެ ލީޑުފުޅާކޮށްދީފަ އެވެ.
ޓޮޓެންހަމް އިން ދެ ވަނަ ލަނޑު ޖެހިތާ ލަސްތަކެއް ނުވެ، ޗެލްސީގެ ފުރަތަމަ ލަނޑު ޖެހީ، ޖޭޑަން ސަންޗޯ އެވެ.
ކޯލް ޕާމާގެ ޕެނަލްޓީން ޗެލްސީން ނަތީޖާ ހަމަހަމަކުރިއިރު، އެ ޓީމުން ލީޑުނެގީ ކެޕްޓަން، އެންޒޯ ފެނާންޑޭޒް ޖެހި ލަނޑުންނެވެ. އަދި ޕާމާ ވަނީ އިތުރު ޕެނަލްޓީއެއް ޖަހައި، ޗެލްސީގެ ލީޑު ފުޅާކޮށްދީފަ އެވެ. މެޗުގެ އިތުރު ވަގުތުގައި ޓޮޓެންހަމްގެ ސަން ހެއުން މިން ލަނޑެއް ޖެހި ނަމަވެސް މޮޅުވާން ފުރުސަތެއް ނުލިބުނެވެ.
ކުޅުނު 15 މެޗުން ލިބުނު 31 ޕޮއިންޓާއިއެކު ތާވަލުގެ ދެވަނައިގައި ޗެލްސީ އޮތްއިރު، ޓޮޓެންހަމް އޮތީ 15 މެޗު ކުޅެގެން 12 ޕޮއިންޓާއިއެކު ތާވަލުގެ 11 ވަނައިގައެވެ.
މި ލިޔުން ކިޔާލުމުން
