އުތުރު ޣައްޒާގެ ބައިތު ލަހިޔާ ގައި ހުރި ކަމާލު އަދުވާން ހޮސްޕިޓަލަށް އިސްރާއީލުގެ ބާރުތަކުން ހަމަލާ ދިނުމުގެ ސަބަބުން ޚިދުމަތްތަކަށް ބުރޫ އަރާފައި ވާ ކަމަށް ފަލަސްތީނުގެ ސިއްޙީ އޮފިޝަލުން ބުނެފިއެވެ.
މި ހަމަލާގެ ސަބަބުން ކަރަންޓާއި، އޮކްސިޖަން ސިސްޓަމްތަކަށް ގެއްލުން ލިބި، ނާޒުކު ސަރޖަރީތައް ކުރުމަށް ދަތިތަކާ ކުރިމަތިވެފައިވާ ކަމަށް ވެސް ވަނީ ބުނެފައިވެއެވެ. ހޮސްޕިޓަލުގެ ޑައިރެކްޓަރު ހުސާމް އަބޫ ސަފިއްޔާ ބުނެފައިވަނީ، ގާތްގަނޑަކަށް 100 ޓޭންކް ޝެލްއާއި ބޮމުން ދިން މި ހަމަލާ ގައި ގިނަ އަދަދެއްގެ މުވައްޒަފުންނާއި ބަލިމީހުންނަށް އަނިޔާވެފައިވާ ކަމަށެވެ.
މިވަގުތު ހޮސްޕިޓަލުގައި 112 މީހުންނަށް ފަރުވާދެމުންދާ ކަމަށާއި، އޭގެ ތެރެއިން 6 މީހުން އިންޓެންސިވް ކެއަރ ޔުނިޓުގައި ތިބިކަން އޭނާ ފާހަގަކުރިއެވެ. އަބޫ ސަފިއްޔާގެ މި ބަޔާނާ ގުޅިގެން އިސްރާއީލުން ވަކި އެއްޗެއް އަދި ބުނެފައެއް ނުވެއެވެ.
ޣައްޒާގެ ސިއްޙީ މިނިސްޓްރީން ބުނެފައިވަނީ ކަމާލު އަދުވާން ހޮސްޕިޓަލާ ކައިރިއަށް އިސްރާއީލުން ދިން ވައިގެ ހަމަލާގައި ޑޮކްޓަރަކާއި އޭނާގެ މުޅި އާއިލާ ވެސް މަރުވެފައިވާ ކަމަށެވެ.
އާދީއްތަ ދުވަހު ޣައްޒާގެ މެދު އަދި ދެކުނު ސަރަޙައްދުތަކުގައި އިސްރާއީލުން ދިން ގިނަ އަދަދެއްގެ ވައިގެ ހަމަލާތަކުގެ ސަބަބުން މަދުވެގެން ފަލަސްތީނުގެ 6 މީހުން މަރުވެފައިވާ ކަމަށް ރިޕޯޓުތައް ބުނެއެވެ.
ޣައްޒާގެ ހަނގުރާމަ ފެށި 14 މަސް ފާއިތުވެފައި ވާއިރު އެ ސަރަޙައްދުގެ ބޮޑު ބައެއް ވަނީ ވީރާނާވެފައެވެ. ޣައްޒާގެ ސިއްޙީ އިދާރާތަކުން ބުނާ ގޮތުން 44،000 އަށްވުރެ ގިނަ ފަލަސްތީނު މީހުން މިހާތަނަށް މަރުވެފައިވެއެވެ.
މި ލިޔުން ކިޔާލުމުން
