ދެކުނު ކޮރެއާގެ ރައީސް، ޔޫން ސުކް ޔެއޯލް އިމްޕީޗްކުރުމަށް އިދިކޮޅު ފަރާތްތަކުން ކުރި މަސައްކަތުން އެނާ ސަލާމަތްވެއްޖެއެވެ.
ދެކުނު ކޮރެއާގެ އިދިކޮޅު ފަރާތްތަކުން ޔޫން ސުކް ޔެއޯލް އިމްޕީޗް ކުރުމުގެ މަސައްކަތް ފެށީ އެނާ ކުރު މުއްދަތަކަށް މާޝަލް ލޯ ތަންފީޒުކުރުމާއި ގުޅިގެންނެވެ. އޭނާ ސަލާމަތްވީ ހޮނިހިރު ދުވަހު ޕާލިމެންޓުގައި ނެގުނު ވޯޓު ވެރިކަން ކުރާ ޕާޓީގެ ގިނަ މެންބަރުން ބޮއިކޮޓްކުރުމާ ގުޅިގެން ރައީސްގެ ބާރުތައް ހިފެހެއްޓުމަށް ބޭނުންވާ ތިންބައިކުޅަ ދެބައިގެ އަޣުލަބިއްޔަތު ނުލިބުމުގެ ސަބަބުންނެވެ.
މި މައްސަލަ ނިމުމަކަށް އައުމާއެކު، ޔޫން ވަކިކުރުމަށް ގޮވާލާ އިހުތިޖާޖުތައް އިތުރުވެ، ދެކުނު ކޮރެއާގެ ސިޔާސީ ހަލަބޮލިކަން އިތުރުވާނެ ކަމަށް ބެލެވެއެވެ. ސަރވޭތަކުން ދައްކާގޮތުން ދެކުނު ކޮރެއާގެ ގިނަ ރައްޔިތުން ރައީސް އިމްޕީޗްކުރުމަށް ތާއީދުކުރެއެވެ. ޔޫން މާޝަލް ލޯ އިޢުލާނުކުރުމާ ގުޅިގެން އޭނާ ނިސްބަތްވާ ވެރިކަންކުރާ ކޮންސަވޭޓިވް ޕީޕަލްސް ޕަވަރ ޕާޓީ (ޕީޕީޕީ) އިން ވެސް އެކަމަށް ފާޑުކިޔާފައިވެއެވެ.
ނަމަވެސް ޕާޓީން ޔޫން އިމްޕީޗްކުރުމަށް ދެކޮޅު ހަދަނީ ރިޔާސަތު ލިބަރަލުންނަށް ގެއްލިދާނެކަމުގެ ބިރު އޮތީމާ ކަމަށް ބެލެވެއެވެ.
މި މައްސަލަ ޕާލިމެންޓުން ނިންމި ފަހުންވެސް ލިބަރަލް އިދިކޮޅު ޑިމޮކްރެޓިކް ޕާޓީގެ މެންބަރުން ނެޝަނަލް އެސެމްބްލީގައި އެއްވެ، ޔޫން އިމްޕީޗްކުރުމަށް ނުވަތަ އިސްތިއުފާދިނުމަށް ގޮވާލާ ޝުޢޫރު ފާޅުކޮށްފައިވެއެވެ.
އަދި އިދިކޮޅު ލީޑަރުން ދަނީ އައު އިމްޕީޗްމަންޓް މޯޝަނަކަށް ވަރަށް އަވަހަށް ތައްޔާރުވާނެ ކަމަށް ވެސް ބުނަމުންނެވެ. އިދިކޮޅު ޕާޓީތަކަށް އައު އިމްޕީޗްމަންޓް މޯޝަނެއް ހުށަހެޅޭނީ އަންނަ ބުދަ ދުވަހު އާ ޕާލިމެންޓަރީ ސެޝަނެއް ފަށާ ފަހުންނެވެ.
މަސްރަހު ދިރާސާ ކުރާ ގިނަ މާހިރުން ދަނީ ޔޫންއަށް އޭނާގެ ދައުރުގެ ބާކީ އޮތް 2 އަހަރާއި 6 މަސް ފުރިހަމަ ނުކުރެވިދާނެ ކަމަށް ބުނަމުންނެވެ. އެ ފަރާތްތަކުން ބުނާ ގޮތުގައި އާންމުންގެ ފަރާތުން އިމްޕީޗްކުރުމަށް އިތުރަށް ގޮވާލަން ފަށައިފިނަމަ، ބައެއް ޕީޕީޕީ މެންބަރުން ވެސް އިދިކޮޅު ޕާޓީތަކާ ގުޅިގެން ޔޫން އިމްޕީޗްކުރުމަށް މަސައްކަތްކޮށްފާނެއެވެ.
ޕީޕީޕީގެ ޗެއަރ ހަން ދޮންގް-ހުން ވިދާޅުވީ އެ ޕާޓީން ޔޫންގެ "ހަމަޖެހޭ" އަވަސް ވަކިވުމަކަށް މަސައްކަތްކުރާނެ ކަމަށެވެ. ނަމަވެސް އެކަން ކުރާނެ ގޮތަކާއި ވަގުތެއް ބަޔާންކޮށްފައެއް ނުވެއެވެ.
މި ލިޔުން ކިޔާލުމުން
