ސީރިއާގައި ކޯލިޝަނެއް ހަދަައިގެން ހަނގުރާމަ ކުރަމުންދާ އިދިކޮޅު ހަނގުރާމަވެރިންގެ ގްރޫޕްތަކުގައި ހިމެނޭ ހަޔާތު ތަހްރީރު އަލް ޝާމްގެ ލީޑަރ އަބޫ މުޙައްމަދު އަލް ޖޯލާނީ ވަނީ ސީރިއާގެ ރައީސް ބައްޝާރުލް އަސަދުގެ ވެރިކަން ވައްޓާލައިފައިވާކަމަށް އިއުލާންކޮށްފައެވެ. ބައްޝާރުގެ ވެރިކަން ނިމުމަކަށް މިއައީ އޭނާ ވެރިކަމުގައި ހުންނަވާތާ 24 އަހަރު ފަހުންނެވެ.
ސީރިއާގެ ރައީސްކަމަށް ފުރަތަމަ ފަހަރަށް ބައްޝާރު އިންތިޚާބު ވެވަޑައިގަތީ އޭނާގެ ބައްޕާފުޅު ހާފިޒުލް އަސަދު 2000 ވަނަ އަހަރު އަވަހާރަވުމާއި ގުޅިގެން ސީރިއާގެ ގާނޫނުއަސާސީއަށް ގެނައި އިސްލާހަކަށްފަހު އޭނާ އެކަނި ވާދަކުރައްވައި އިންތިޚާބެއް ކާމިޔާބު ކުރައްވައިގެންނެވެ. މިގޮތަށް ގާނޫނުއަސާސީ އިސްލާހުކުރީ އޭރު ވެރިކަމަށް ވަޑައިގަތުމަށް ބައްޝާރުގެ އުމުރު ހަމަނުވާތީ ވެރިކަމަށް ވަޑަިއގަތުމަަށް ބޭނުންވާ އުމުރު ދަށްކުރުމުގެ ބޭނުމުގައެވެ. އެގޮތުން ވެރިކަމަށް ވަޑައިގަންނަވާ ބޭފުޅެއްގެ އުމުރަކީ 34 އަހަރުކަމަށް ބަދަލުުކޮށް އިސްލާހުވަނީ ގެނެސްފައެވެ.
24 އަހަރު ވަންދެން ވެރިކަން ކުރެއްވުމަށްފަހު ވެރިކަން ނިމިގެން ދިޔައިރު ގައުމު ދޫކުރައްވާ ބައްޝާރު ފިއްލަވާފައިވާ ކަމަށް ބޭރުގެ ނޫސްތަކުން ރިޕޯޓްކޮށްފައިވެއެވެ. ބައްޝާރުގެ ވެރިކަން ނިމުމާއެކު އަސަދު އާއިލާއިން ސީރިއާގައި ބައިގަރުނު ވަންދެން ކުރަމުން ދިޔަ ވެރިކަމަށްވެސް ވަނީ ނިމުމެއް އައިސްފައެވެ.
ހަޔާތު ތަހްރީރުގެ އަލް ޝާމްގެ ލީޑަރު އަބޫ މުޙައްމަދު އަލް ޖޯލާނީ ވަނީ އެމީހުންގެ ބެލުމުގެ ދަށަށް ސީރިއާގެ މުހިއްމު ސިޓީތަކާއި ވެރިރަށް ދިމިޝްގު ގެނެސްފައެވެ. ނަމަވެސް ސީރިއާގެ ސަރުކާރުގެ އިދާރާތައް ރަސްމީކޮށް އެމީހުންނާ ހަވާލުކުރަންދެން އެެއްވެސް އިދާރާއަކަށް ހަނގުރާމަވެރިން ނުވަނުމަށް ވަނީ އަންގަވާފައެވެ. ބޭރުގެ ޚަބަރުތައް ބުނާ ގޮތުން ދިމިޝްގުގެ މައި އެއާޕޯޓްވެސް ވަނީ ހަނގުރާމަވެރިންގެ އަތްދަށުގައެވެ. ހަނގުރާމަވެރިންނަށް ސަރުކާރުގެ ބާރުތައް ހާވާލުކުރުމަށް ސީރިއާގެ ބޮޑުވަޒީރު މުޙައްމަދު އަލް ޖަލާލީއަށް ވަނީ އަންގަވާފައެވެ. އަދި މިކަމާ އޭނާ ދެކޮޅު ނުހައްދަވާކަމަށް ވެސް ވަނީ ޚަބަރު ފެތުރިފައެވެ.
ސީރިއާގައި އެންމެ ފުރަތަމަ ދާހިލީ ހަނގުރާމަ ފެށުނީ 2011 ވަނަ އަހަރުއެވެ. އޭރުއްސުރެން ސީރިއާގެ ރައްޔިތުން ދަނީ ބައްޝާރުގެ ވެރިކަމާއި ދެކޮޅަށް މުޒާހަރާކޮށް އޭނާ ވެރިކަމުން ބޭލުމަށް ހަނގުރާމަ ކުރަމުންނެވެ. އަދި ބައްޝާރުގެ ވެރިކަން ވައްޓާލުމަށް ރައްޔިތުން ކުރަމުން ދިޔަ މަސައްކަތް ހުއްޓުވުމަށް ބައްޝާރުގެ ސިފައިން ބާރުގެ ބޭނުންކުރުމުން ސީރިއާގެ ގިނަ އާއްމު ރައްޔިތުން ވަނީ މަރުވެފައެވެ. އެގޮތުން ސީރިއާގެ 500،000 އަށް ވުރެ ގިނަ އާއްމު ރައްޔިތުން މަރުވެެފައިވާކަމަށް ޚަބަރުތައް ފެތުރިފައިވެއެވެ.
މި ލިޔުން ކިޔާލުމުން
