ބޮލީވުޑްގެ މަޝްހޫރު އެކްޓަރު ޓައިގާ ޝްރޮފް ދަތުރުކުރަމުންދިޔަ ކާރަށް އަމާޒުކޮށް، އިންޑިއާގެ މުމްބާއީގެ ޖުހޫ ސަރަޙައްދުގައި ބަޔަކު ބަޑީގެ ނުރައްކާތެރި ހަމަލާއެއް ދީފިއެވެ.
މިއަދު ހިނގި މި ހާދިސާގައި ޓައިގާއަށް އެއްވެސް އަނިޔާއެއް ނުލިބި ސަލާމަތްވި ނަމަވެސް، ކާރު ދުއްވަމުން ދިޔަ އޭނާގެ ޑްރައިވަރަށް ވަނީ އަނިޔާ ލިބިފައެވެ.
ފުލުހުން ބުނާ ގޮތުގައި މި ހާދިސާ ހިނގާފައިވަނީ ޖުހޫ ޕޮލިސް ސްޓޭޝަންގެ ސަރަޙައްދުގައި ހިމެނޭ ޕުޝްޕާ ޕާކް ކައިރިން، ޓައިގާ އާއި އޭނާގެ ރަޙްމަތްތެރިއަކު ފުޓުބޯޅަ ދަނޑަކުން ނިކުމެގެން ދަނިކޮށެވެ. ސައިކަލެއްގައި އައި ތިން މީހަކު ކާރަށް ބަޑިޖަހާ މަންޒަރު ފެންނަ ވީޑިއޯއެއް ވެސް ވަނީ އާންމުވެފައެވެ.
ހާދިސާއަށް ފަހު އާންމުވި އޯޑިއޯ މެސެޖެއްގައި، އިންޑިއާގެ ޖަލުގައި ބަންދުކޮށްފައިވާ މަޝްހޫރު ގޭންގްސްޓާ ލޯރެންސް ބިޝްނޯއީގެ ގޭންގަށް ނިސްބަތްވާ އަނިލް ޕަންޑިތު ވަނީ މި ހަމަލާގެ ޒިންމާ އުފުލާފައެވެ. އެ އޯޑިއޯގައި ބުނެފައިވަނީ، ބިޝްނޯއީ ގޭންގުގެ އެންގުންތަކަށް ނުބަލައި ސަލްމާން ޚާނާއެކު ޓައިގާ މަސައްކަތްކުރާތީ ދިން އިންޒާރެއް ކަމަށާއި، ސަލްމާން ޚާނާ ގުޅުން ބާއްވާ ކޮންމެ މީހަކު ވެސް މަރާލާނެ ކަމަށެވެ.
ގުޖުރާތުގެ ޖަލެއްގައި ހުރި ލޯރެންސް ބިޝްނޯއީ އަކީ ސަލްމާން ޚާނަށް ތަކުރާރުކޮށް މަރުގެ އިންޒާރު ދެމުން އަންނަ މީހެކެވެ. މި ދުޝްމަންކަން ފެށިގެން އައީ 1998 ވަނަ އަހަރު ސަލްމާން ކުޅުނު "ހަމް ސާތު ސާތު ހޭ" ފިލްމުގެ ޝޫޓިންގް ކުރިއަށްދިޔަ ދުވަސްވަރު، ބިޝްނޯއީ ދަރިކޮޅުގެ މީހުން މާތްކޮށް ހިތާ "ބްލެކްބަކް" ޝިކާރަކުރި މައްސަލައިންނެވެ.
މި ހަމަލާއާ ގުޅިގެން މަހާރާޝްޓްރާގެ ޗީފް މިނިސްޓަރު ދެވޭންދުރަ ފަޑްނަވިސް ވަނީ މުމްބާއީގެ ޕޮލިސް ކޮމިޝަނަރާ ފޯނުން ގުޅުއްވައި، މައްސަލަ އެންމެ އަވަހަކަށް ތަޙުޤީޤުކޮށް، މިކަމުގައި ބައިވެރިވި ހުރިހާ ފަރާތްތަކަކާމެދު ހަރުކަށި ފިޔަވަޅު އެޅުމަށް އަމުރުކުރައްވާފައެވެ.
ހަމަލާ ދިން މީހުން ދެނެގަނެ ހޯދުމަށް ޚާއްޞަ 12 ޓީމެއް އެކުލަވާލައި، ހާދިސާ ހިނގި ސަރަހައްދުގެ ސީސީޓީވީ ފުޓޭޖުތައް ބަލަމުން މުމްބާއީ ފުލުހުން ވަނީ ބޮޑު އޮޕަރޭޝަނެއް ފަށާފައެވެ.
