އަމިއްލަ ގޯތީގައި ގެދޮރު އިމާރާތްކުރުމަށް ބޭންކުތަކުން ނަގާ ލޯނަށް ބޭނުންވާ އިކުއިޓީ ފައިސާ، ސަރުކާރުން އަނބުރާ ދައްކަން ނުޖެހޭ ގޮތަށް ހިލޭ އެހީގެ ގޮތުގައި ހަމަޖައްސައިދޭ އުސޫލެއްގެ ދަށުން، މާލީ ހަތަރު އިދާރާއަކާއެކު ފަހުމުނާމާ (އެމްއޯޔޫ) އެއްގައި މިއަދު ސޮއިކޮށްފިއެވެ.
ހައުސިން މިނިސްޓްރީން ބުނީ، މި އެމްއޯޔޫގައި ސޮއިކޮށްފައިވަނީ ބޭންކް އޮފް މޯލްޑިވްސް (ބީއެމްއެލް)، މޯލްޑިވްސް އިސްލާމިކް ބޭންކް (އެމްއައިބީ)، ހައުސިންގ ޑިވަލަޕްމަންޓް ފައިނޭންސިންގ ކޯޕަރޭޝަން (އެޗްޑީއެފްސީ) އަދި މޯލްޑިވްސް ފައިނޭންސް ލީސިންގ ކޮމްޕެނީ (އެމްއެފްއެލްސީ) އާ އެކު ކަމަށެވެ.
މިއީ ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ނެޝަނަލް ހޯމް އޯނާޝިޕް ޕްރަގްރާމް" ގެ އިކުއިޓީ އެހީތެރިކަން ދޭ "ހެލްޕް ޓު ބިލްޑް" އަދި "ހެލްޕް ޓު ބައި" ސްކީމްތައް ތަންފީޒު ކުރުމަށް ގާއިމުކޮށްފައިވާ އެއްބަސްވުމެކެވެ.
ސަރުކާރުން ބުނެފައިވަނީ، ވޯލްޑް ބޭންކު ގުރޫޕްގެ ފަންނީ އެހީތެރިކަމާއެކު ނިންމި މޯލްޑިވްސް އާބަން ޑިވެލޮޕްމަންޓް އެންޑް ރީކޮންސްޓްރަކްޝަން ޕްރޮޖެކްޓް (އެމްޔޫޑީއާރުޕީ) ގެ ދިރާސާތަކުން ދައްކާފައިވާ ގޮތުގައި، ގިނަ އާއިލާތަކަށް ގެދޮރު އެޅުމަށާއި ގަތުމަށް ދިމާވާ އެންމެ ބޮޑު ހުރަހަކީ ބޭންކުތަކުން ކަނޑައަޅާ އިކުއިޓީ ޕޭމަންޓް ދެއްކުމުގައި ދިމާވާ ދަތިތައް ކަމަށެވެ.
ހެލްޕް ޓު ބިލްޑް ސްކީމުގެ ދަށުން، 1،000،000 ރުފިޔާގެ ލޯނެއްގެ އިކުއިޓީއަށް 200،000 ރުފިޔާއާ ހަމައަށް ސަރުކާރުން އެހީ ދޭނެ ކަމަށް ބުނެފައިވެއެވެ. މިއީ އަނބުރާ ދައްކަން ނުޖެހޭ އެހީއެއް؛ ނަމަވެސް ވަކި މުއްދަތެއްގެ ތެރޭގައި އެ އިމާރާތް ވިއްކާލައިފިނަމަ އެ ފައިސާ އަނބުރާ ސަރުކާރަށް ދައްކަން ޖެހޭނެ ކަމަށް ވެސް ބުނެފައިވެއެވެ.
މި ސްކީމްގެ ފުރަތަމަ ފިޔަވަހި ޚާއްސަކޮށްފައިވަނީ ފުރަމާލޭގައި އަމިއްލަ ބިން އޮވެ، އިކުއިޓީ ނުދެއްކިގެން އިމާރާތް ނުކުރެވިފައިވާ ފަރާތްތަކަށެވެ. ހުޅުމާލެ، ގިރާވަރު އަދި ގުޅިފަޅުގައި ހުރި ބިންތަކަށް މި ސްކީމް ފުޅާކުރުމަށް ހަމަޖެހިފައިވަނީ ކުރިއަށް އޮތް ފިޔަވަހިތަކުގައެވެ.
