މާލޭގެ އާންމު ތަންތަނުގައި ދުންފަތުގެ އިސްތިއުމާލުކުރުން ކޮންޓްރޯލްކުރުމުގެ ގޮތުން، ދުންފަތުގެ އިސްތިއުމާލުކުރާ މީހުންނަށް ޚާއްސަ ކިއޮސްކްތަކެއް މާލެ ސަރަހައްދުގައި ބެހެއްޓުމާ ގުޅޭގޮތުން މާލެ ސިޓީ ކައުންސިލާއި ހެލްތު ޕްރޮޓެކްޝަން އޭޖެންސީ އިން މަޝްވަރާކޮށްފިއެވެ.
މާލެ ސިޓީ ކައުންސިލުން 'އެކްސް' ގައި ހާމަކުރި ގޮތުގައި، ޑެޕިއުޓީ މޭޔަރު މީކާއީލް މުޙައްމަދު ރިޔާޒާއި ކައުންސިލަރުންގެ އިތުރުން އެޗްޕީއޭގެ ބޭފުޅުން ބައިވެރިވެވަޑައިގެންނެވި މި ބައްދަލުވުމުގެ މައިގަނޑު ބޭނުމަކީ، ވަކި ސަރަހައްދުތަކެއްގައި ކިއޮސްކްތައް ބަހައްޓައިގެން އާންމު ތަންތަނުގައި ދުންފަތުގެ އިސްތިއުމާލުކުރާ މިންވަރު މަދުކުރުމެވެ. އަދި މާލެއަކީ ސާފު، ސިއްހީގޮތުން އެކަށީގެންވާ ތަނަކަށް ހެދުމެވެ.
އާންމު ތަންތަނުގައި ދުންފަތުގެ އިސްތިއުމާލުކުރުން ހުއްޓުވުމަށް ކަމާބެހޭ އިދާރާތަކާ ގުޅިގެން މަސައްކަތްކުރަން ސިޓީ ކައުންސިލުން ނިންމީ މިދިޔަ އޮގަސްޓު މަހުގެ 12 ގައި ބޭއްވި ޖަލްސާއެއްގައެވެ. ހުޅުމާލޭ އުތުރު ދާއިރާގެ ކައުންސިލަރު ފާޠިމަތު ޒަޙިއްޔާ ހުށަހެޅުއްވި މި މައްސަލައިގައި، ޕާކުތަކާއި އާންމުން އެއްވާ ތަންތަނުގައި ކުޑަކުދިންނަށް އުނދަގޫވާ ގޮތަށް ދުންފަތުގެ އިސްތިއުމާލުކުރާ މީހުންނާމެދު ގާނޫނީ ފިޔަވަޅު އަޅަން ފުލުހުންނަށް އެންގުމަށް އެދިވަޑައިގެންފައިވެއެވެ. މަނާ ސަރަހައްދުތަކުގައި ދުންފަތުގެ އިސްތިއުމާލުކުރާ ފަރާތްތަކަށް މިހާތަނަށް ފިޔަވަޅު އަޅާފައިނުވާކަން ފާހަގަކުރެވެއެވެ.
ރާއްޖޭގައި ދުންފަތް ކޮންޓްރޯލްކުރުމަށް ސަރުކާރުން ވަނީ ދުންފަތުގެ ބާވަތްތަކުން ނަގާ ޑިއުޓީއަށް ބަދަލުތަކެއް ގެނެސްފައެވެ. އަދި 2007 ވަނަ އަހަރުން ފެށިގެން އުފަންވާ ކުދިންނަށް ދުންފަތް ބޭނުންކުރުން މަނާކުރާ 'ޖެނެރޭޝަނަލް ބޭން' އުސޫލެއްވެސް ވަނީ ތައާރަފުކޮށްފައެވެ.
މި ލިޔުން ކިޔާލުމުން
