ބޭރު ފައިސާއާ ބެހޭ ޤާނޫނަށް ދާދި ފަހުން ރައްޔިތުންގެ މަޖިލީހުން އިޞްލާޙު ގެނައި ނަމަވެސް، ރިސޯޓު މުވައްޒަފުންނަށް ޑޮލަރުން މުސާރަ ދިނުމަށް ޤާނޫނީ އެއްވެސް ހުރަހެއް ނެތް ކަމަށް މޯލްޑިވްސް މަނިޓަރީ އޮތޯރިޓީ އިން ހާމަކޮށްފިއެވެ.
ބޭރު ފައިސާއިން ލިބޭ އާމްދަނީގެ 40 އިންސައްތަ ކޮންމެ މަހަކު ބޭންކުތަކަށް މާރުކުރަން ލާޒިމުކުރާ ގޮތަށް ފާސްކުރި މި އިޞްލާޙަށް އަންނަ މަހުގެ ފުރަތަމަ ދުވަހުން ފެށިގެން ޢަމަލުކުރަން ފަށާނެއެވެ. މި ބަދަލާއެކު ރިސޯޓު މުވައްޒަފުންގެ މުސާރަ ރުފިޔާއިން ދޭން ފަށާފާނެ ކަމުގެ ކަންބޮޑުވުންތައް އުފެދިފައިވަނިކޮށް، އެމްއެމްއޭގެ އޮފިޝަލަކު ވިދާޅުވީ ޤާނޫނަށް ބަދަލު ގެނައި ނަމަވެސް ޑޮލަރުން މުސާރަ ދިނުމަށް އެއްވެސް ހުރަހެއް ނެތް ކަމަށެވެ. އަދި ފޮރެކްސް ޤާނޫނުގެ ދަށުން ފިޔަވަޅުތައް އަޅާފައިވަނީ ޑޮލަރުގެ ކަޅު ބާޒާރު ނައްތާލައި، ޑޮލަރު ލިބުން ދަތިވުމުގެ މައްސަލައަށް ޙައްލެއް ހޯދުމަށް ކަމަށް އޮފިޝަލް ފާހަގަކުރެއްވިއެވެ.
އެމްއެމްއޭއިން ބުނި ގޮތުގައި އެތެރޭގެ މުޢާމަލާތްތައް ދިވެހި ރުފިޔާއަށް ބަދަލުކުރާނީ އިޤުތިޞާދަށް އަންނަ ބަދަލުތައް ފުރިހަމައަށް ދިރާސާކުރުމަށްފަހުއެވެ. ގަވަރުނަރު އަޙްމަދު މުނައްވަރު ހާމަކުރެއްވި ގޮތުގައި، 2030 ވަނަ އަހަރާ ހަމައަށް ރުފިޔާގެ އަގު ހިފެހެއްޓުމާއި އިޤުތިޞާދުގައި ޑޮލަރު ބޭނުންކުރާ މިންވަރު މަދުކުރުމުގެ ދުރުރާސްތާ ތަސައްވުރެއް ވަނީ އެކުލަވައިލާފައެވެ.
މި ތަސައްވުރުގެ ދަށުން ރާއްޖޭގައި ވިއްކާ މުދަލާއި ޚިދުމަތުގެ އަގު ރުފިޔާއިން ކަނޑައެޅުމަކީ އަމާޒެއް ކަމަށްވާއިރު، ފަތުރުވެރިކަމުގެ ދާއިރާގެ އަގުތައް ރުފިޔާއަށް ބަދަލުކުރުމުގެ ކުރިން ސިޔާސަތުތަކަށް ބޮޑެތި ބަދަލުތަކެއް ގެންނަންޖެހެއެވެ. އެގޮތުން ދައުލަތަށް ޑޮލަރުން ދައްކާ ޓެކްސްތަކާއި ފީތައް ރުފިޔާއިން ބަލައިގަންނަ ގޮތް ހެދުމާއި، ބޭރު ފައިސާއިން މުސާރަ ދެވޭ އުޞޫލުތައް މުރާޖަޢާކުރުން ހިމެނޭކަމަށް ގަވަރުނަރު ވިދާޅުވިއެވެ.