މިއަހަރުގެ މިނިވަން ދުވަހުގެ ރަސްމީ ހަރަކާތްތައް އަމާންކަމާއި އޮމާންކަމާއެކު ކުރިއަށް ގެންދިއުމަށްޓަކައި، މާލޭގެ ޢިއްޒުއްދީން ފާލަމާއި ޖުމްހޫރީ މައިދާން ހިމެނޭ ސަރަހައްދުގެ ފަޅު ހުސްކޮށްދިނުމަށް މާލޭ ސިޓީ ކައުންސިލުން ވަނީ އެދިފައެވެ.
26 ޖުލައި 2026 ގައި ބޭއްވުމަށް ހަމަޖެހިފައިވާ މިނިވަން ދުވަހުގެ ހަރަކާތްތަކާ ގުޅިގެން، 25 ޖުލައި 2026 ވާ ހޮނިހިރު ދުވަހުގެ އިރުއޮއްސި 18:00 އިން ފެށިގެން 27 ޖުލައި 2026 ވާ ހޯމަ ދުވަހުގެ ރޭގަނޑު 00:00 އާ ހަމައަށް އެ ސަރަހައްދުގެ ފަޅު ހުސްކުރުމަށް ސިޓީ ކައުންސިލުން އަންގައެވެ.
މި މުއްދަތުގެ ތެރޭގައި ޢިއްޒުއްދީން ފާލަމުގެ ހުޅަނގުން އޮންނަ ސަރަހައްދަށް ވަދެނުކުންނަ އުޅަނދުފަހަރާއި، އެ ސަރަހައްދުގައި އަޅާފައިވާ ހުރިހާ އުޅަނދެއް ނެގުމަށް ސިޓީ ކައުންސިލުން އިލްތިމާސްކުރެއެވެ. އަދި އެ ސަރަހައްދު ބޭނުންކުރާ ފަރާތްތަކުންނާއި އޮޑިދޯނިފަހަރުގެ ވެރިންގެ ފުރިހަމަ އެއްބާރުލުން ދިނުމަށް ވަނީ އެދިފައެވެ.
މާލޭ ސިޓީ ކައުންސިލްގެ އިޢުލާނުގައި ބުނެފައިވަނީ، މިކަމުގައި މިސަރަހައްދު ބޭނުން ކުރައްވާ ހުރިހާ ފަރާތްތަކުން ވެސް އެއްބާރުލުން ދެއްވާ، މިސަރަހައްދުގައި އޮޑިދޯނި ފަހަރު ގެންގުޅުއްވާ ފަރާތްތަކުން ޢަމަލީގޮތުން ބައިވެރިވެލެއްވުމަކީ ކައުންސިލްގެ އެދުމެއް ކަމަށެވެ.
އަދި މީގެ ކުރިންވެސް މިފަދަ ޤައުމީ މުނާސަބަތުތަކުގައި އެ ސަރަހައްދު ބޭނުންކުރާ ފަރާތްތަކުން ދެއްވާފައިވާ ތަރުހީބާއި އެއްބާރުލުން ފާހަގަކޮށް، ކައުންސިލުން ވަނީ އެފަރާތްތަކަށް ޝުކުރު އަދާކޮށްފައެވެ. ކޮންމެ އަހަރަކުވެސް މިނިވަން ދުވަހުގެ މުނާސަބަތުގައި ޖުމްހޫރީ މައިދާން ސަރަހައްދުގައި ކުލަގަދަ ރަސްމީ ހަރަކާތްތަކެއް ބާއްވަމުން އަންނަކަން ފާހަގަކޮށްލެވެއެވެ.