އިސްލާމީ ކަންތައްތަކާ ބެހޭ ވަޒީރު ޑރ. ޝަހީމް، ހައްޖު ކޯޕަރޭޝަންއަށް އަލަށް އައްޔަންކުރެއްވި މެނޭޖިންގ ޑިރެކްޓަރ އުސްތާޛު މުހައްމަދު ފިރޫޒުލް އަބްދުﷲ ޚަލީލްއާ ބައްދަލުކުރައްވައިފިއެވެ.
މި ބައްދަލުކުރެއްވުމުގައި ވަޒީރު ވަނީ ހައްޖު ކޯޕަރޭޝަންގެ މެނޭޖިންގ ޑިރެކްޓަރުގެ މުހިންމު މަގާމަށް ފިރޫޒުލް އައްޔަންކުރެއްވުމާ ގުޅިގެން އޭނާއަށް ވަރަށް އިޚްލާޞްތެރިކަމާއެކު މަރުޙަބާ ދަންނަވާފައެވެ. މީގެއިތުރުން، ދިވެހި ހައްޖުވެރިންނަށް ޚިދުމަތްކުރުމުގެ މި މާތް އަދި ބޮޑު މަސްއޫލިއްޔަތު އަމާނާތްތެރިކަމާއި، ފަންނީ ފެންވަރުގައާއި، އިޚްލާޞްތެރިކަމާއެކު އަދާކުރެއްވުމުގައި ފިރޫޒުލްއަށް ފުރިހަމަ ކާމިޔާބީއަށް އެދިވަޑައިގަންނަވާ ކަމަށް ވަޒީރު ޑރ. ޝަހީމް ވިދާޅުވިއެވެ.
Honoured to meet Utz. Mohamed Firuzul Abdulla Khaleel, Managing Director of Maldives Hajj Corporation Limited.
I extend my sincere congratulations on his appointment to this important position and wish him every success in carrying out this noble responsibility of serving… pic.twitter.com/LPuHTwCTWj
— Mohamed Shaheem Ali Saeed (@Mohamedshaheem1) July 2, 2026
ހައްޖު ކޯޕަރޭޝަންގެ މެނޭޖިންގ ޑިރެކްޓަރުގެ މަގާމަށް އުސްތާޛު މުހައްމަދު ފިރޫޒުލް އައްޔަންކުރައްވާފައިވަނީ 01 ޖުލައި 2026 ގައެވެ. ފިރޫޒުލް އަކީ މިސްރުގެ އަލް-އަޒްހަރު ޔުނިވަރސިޓީން ޝަރީޢާ އެންޑް ލޯ އިން ބެޗްލާސް ޑިގްރީ ހާސިލްކުރައްވާފައިވާ ބޭފުޅެކެވެ. އަދި އޭނާއަކީ ކީރިތި ޤުރުއާން ހިތުދަސް ހާފިޒެއްވެސް މެއެވެ.
ހައްޖު ކޯޕަރޭޝަންގެ ހިންގުމާ ހަވާލުވެވަޑައިގަތުމުގެ ކުރިން ފިރޫޒުލް ހުންނެވީ ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓަރީ ފޯ ޕަބްލިކް ޕޮލިސީގެ މަގާމުގައެވެ. މީގެއިތުރުން، މިހާރުގެ ސަރުކާރު ބަދަލުވުމުގެ އިންތިގާލީ މަރުހަލާގައި ސަރުކާރުގެ ތަރުޖަމާނެއްގެ ގޮތުންނާއި، ވެރިކަންކުރާ ޕީއެންސީގެ ތަރުޖަމާނެއްގެ ގޮތުގައިވެސް އޭނާ ވަނީ މުހިންމު މަސައްކަތްތަކެއް ކުރައްވާފައެވެ.