އާ އަހަރުގެ ބަންދާ ދިމާކޮށް ދިވެހި ފުލުހުންގެ ހިދުމަތުން އިސްނަގައިގެން ކުރިއަށްގެންދިޔަ "އޮޕަރޭޝަން ރިވެލި" ގެ ދަށުން މިހާތަނަށް 7803 ސަރަހައްދު ބަލައި ފާސްކޮށް، 29 މީހަކު ހައްޔަރުކޮށްފިއެވެ.
ފުލުހުން ހާމަކުރި ތަފާސްހިސާބުތަކަށް ބަލާއިރު، ޑިސެމްބަރު 24 އިން 28 އާ ދެމެދު ޖުމްލަ 3845 މީހުން ހުއްޓުވައި ސުވާލުކޮށްފައިވެއެވެ. އެގޮތުން މާލެ ސަރަހައްދުގައި ހިންގި ހަރަކާތްތަކުގެ ތެރެއިން 1598 މީހުންނާ ސުވާލުކޮށް، 26 މީހަކު ހައްޔަރުކުރެވިފައިވެއެވެ. ސުވލުކުރެވުނު މީހުންގެ ތެރޭގައި 95 ބިދޭސީން ހިމެނޭކަން ފުލުހުން ފާހަގަކުރެއެވެ.
އައު އަހަރާ ދިމާކޮށް ފުލުހުން ކުރިއަށް ގެންދާ އޮޕަރޭޝަން "ރިވެލި" ގައި މާލެ އާއި ހުޅުމާލޭގައި ފުލުހުން ކުރަމުންދާ މަސައްކަތްތަކުގެ ތަފާސް ހިސާބު | 24-28 ޑިސެންބަރު 2025 pic.twitter.com/1MqItZdIrT
— Maldives Police (@PoliceMv) December 29, 2025
މީގެއިތުރުން، މާލޭގައި 1954 އުޅަނދު ޗެކްކޮށް، 397 ފަރާތެއް ވަނީ ޖޫރިމަނާކޮފައެވެ.
ހުޅުމާލޭގެ ތަފާސްހިސާބުތަކަށް ބަލާއިރު، 2247 މީހުންނާ ސުވާލުކޮށް، ތިން މީހަކު ހައްޔަރުކުރެވިފައިވެއެވެ. ހައްޔަރުކުރެވުނު މީހުންގެ ތެރޭގައި 46 ބިދޭސީން ހިމެނެއެވެ. ހުޅުމާލޭގައި 1879 އުޅަނދު ބަލައި ފާސްކޮށްފައިވާއިރު، 28 ފަރާތެއް ޖޫރިމަނާކޮށްފައިވެއެވެ.
މި އޮޕަރޭޝަން ކުރިއަށްދާނީ ރައްޔިތުންނަށް އަމާން، ހަމަޖެހޭ މާހައުލެއް ގާއިމުކުރުމަށް ކަމަށް ފުލުހުން ބުނެއެވެ.