ފަތުރުވެރިކަމާ ތިމާވެއްޓާބެހޭ ވުޒާރައިގެ ވަޒީރު ޠާރިޤު އިބްރާހީމް، އޯޒޯން ދުވަސް 2025ގެ މުނާސަބަތުގައި ހުޅުމާލޭ ސެންޓްރަލް ޕާކުގައި ކުރިއަށްގެންދިޔަ ޚާއްސަ ހަރަކާތްތަކަށް ޒިޔާރަތްކުރައްވައިފިއެވެ. މި ޒިޔާރަތުގައި، މިނިސްޓަރު ވަނީ އޯޒޯން ފަށަލަ ރައްކާތެރިކުރުމުގެ މުހިންމުކަމާއި، ދިވެހިރާއްޖޭގެ ދެމެހެއްޓެނިވި ފިނިކުރުމުގެ ނިޒާމުތަކާއި މޫސުމީ ބަދަލުތަކާ ގުޅުންހުރި ކަންކަމަށް އަލިއަޅުއްވައިލައްވާފައެވެ.
މި ހަރަކާތްތަކުގެ ތެރެއިން، މިނިސްޓަރު ޠާރިޤު އިބްރާހީމް ވަނީ، މަޢުލޫމާތު ދިނުމަށް ޚާއްސަ ކުރެވިފައިވާ އިންޓަރެކްޓިވް ކިޔެވުމުގެ ކަންކޮޅުތަކަށާއި، އަމަލީ ގޮތުން ބައިވެރިވެވޭ ތަފާތު ސްޓޭޝަންތަކަށް ވަޑައިގެންފައެވެ. އަދި، ހުރިހާ އުމުރުފުރައެއްގެ ބައިވެރިންނާއެކު ވާހަކަފުޅުދައްކަވައި، އޯޒޯން ފަށަލަ ރައްކާތެރިކުރުމުގެ މުހިންމުކަމާއި، ތިމާވެއްޓާ ރައްޓެހި ގޮތްތަކަށް އަމަލުކުރުމުގެ ބޭނުންތެރިކަން ފާހަގަކުރެއްވިއެވެ.
މިނިސްޓަރު ޠާރިޤު އިބްރާހީމް، މި ހަރަކާތްތަކުގައި ބައިވެރިވެވަޑައިގެންނެވުމުގެ ބޭނުމަކީ، އޯޒޯން ފަށަލަ ދިފާޢުކުރުމަކީ ދެމެހެއްޓެނިވި ގޮތަކަށް ތިމާވެށި ރައްކާތެރިކުރުމާއި، ދިވެހިރާއްޖޭގެ މޫސުމީ ބަދަލުތަކާބެހޭ ސިޔާސަތުތަކުގެ މުހިންމު ބައެއްކަން އަންގައިދިނުމެވެ. މިފަދަ ހަރަކާތްތަކަކީ އާންމުންގެ ހޭލުންތެރިކަން އިތުރުކޮށް، ތިމާވެށި ރައްކާތެރިކުރުމަށް އެންމެން ގުޅިގެން މަސައްކަތްކުރުމަށް ބާރުއަޅާ ކަންކަމެވެ.
