މޯލްޑިވްސް ގުޑް އެގްރިކަލްޗަރަލް ޕްރެކްޓިސަސް (އެމްގެޕް) ސެޓްފިކެޓް ހަސިލް ކުރުމާއެކު ށ. ގޮއިދޫ މިވެގެންދަނީ ޒަމާނީ އީޖާދުތަކާއި ދިރިއުޅުމުގެ އާދަކާދައާ ދެމެދު ހަރުދަނާ ބެލެންސެއް ޤާއިމުކުރުމުގެ ނަމޫނާ މިސާލަކަށް ކަމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު، ޑރ. މަރްޔަމް މާރިޔާ ވިދާޅުވެއްޖެއެވެ.
އެކަމަނާ މިހެން ވިދާޅުވީ، ގޮއިދޫގެ ދަނޑުވެރިންނަށް މޯލްޑިވްސް ގުޑް އެގްރިކަލްޗަރަލް ޕްރެކްޓިސަސް (އެމްގެޕް) ސެޓްފިކެޓް ހަވާލުކުރުމުގެ ރަސްމިއްޔާތު ގައި ދެއްކެވި ވާހަކަފުޅުގައެވެ.
ވަޒީރު ވިދާޅުވީ އެމްގެޕް ސެޓްފިކެޓަކީ ދަނޑުވެރިންގެ ހުނަރުވެރިކަމާއި ފެންވަރު މަތިކޮށް، ދިވެހިރާއްޖޭގެ ދަނޑުވެރިކަން ކުރިއެރުވުމަށް އެޅޭ މުހިންމު ފިޔަވަޅެއްޅެއް ކަމަށެވެ. އަދި ޤައުމީ ފެންވަރުގައި ފާހަގަކުރެވޭ ފަޚުރުވެރި މި ކާމިޔާބީއަށްޓަކައި ގޮއިދޫ އެންމެހައި ފަރާތްތަކަށް ތަޙްނިޔާ ވިދާޅުވިއެވެ
ސަރުކާރުގެ ހައިސިއްޔަތުން، ދަނޑުވެރިކަމުގެ ވުޒާރާއިން ވަނީ އިމްޕޯޓަށް ބަރޯސާވުން މަދުކުރުމަށާއި، ދެމެހެއްޓެނިވި ކާބޯތަކެތީގެ ނިޒާމުތައް ޤާއިމުކުރުމަށާއި، އަދި ދަނޑުވެރިކަމުގެ ދާއިރާގައި ޒުވާނުންނާއި އަންހެނުންނަށް އިތުރު ފުރުޞަތުތައް ފަހިކޮށްދިނުމަށް ޢަޒުމު ކަނޑައަޅާފަކަމަށެވެ.
އެމްގެޕް ސެޓިފައިކުރެވިފައިވާ އުފެއްދުންތައް ކުރިއެރުވުމުގެ ސަބަބުން، ދިވެހި ރައްޔިތުންނަށް ކާބޯތަކެތީގެ ރައްކާތެރިކަން ކަށަވަރުކޮށްދިނުމުގެ އިތުރުން، ސަރަޙައްދީ އަދި ބައިނަލްއަޤްވާމީ މާކެޓްތަކުގައި މުސްތަޤުބަލުގައި ލިބިދާނެ ފުރުޞަތުތަކަށް މަގުފަހިވެގެންދާނެކަމަށެވެ.
ވަޒީރު ވިދާޅުވީ މިއަދުގެ މި ކާމިޔާބީއަކީ ގޮއިދޫގެ ދަނޑުވެރިންގެ ޤާބިލުކަމާއި ހުނަރުވެރިކަމުގެ ހެއްކެއްކަމަށެވެ. މިއީ އެ ދަނޑުވެރިން ބަދަލުތަކަށް ހޭލުންތެރިކުރުމާއި، އީޖާދީ ގޮތްތައް އުފެއްދުމާއި، އަދި ދަނޑުވެރިކަން ފައިދާހުރި އަދި ދެމެހެއްޓެނިވި ގޮތެއްގައި ކުރެވޭނެ މުސްތަޤުބަލަކަށް ދިވެހިރާއްޖެ ވާޞިލުކުރުވުމުގައި އިސްނެގުމުގެ ޤާބިލުކަން ހުރިކަމުގެ ދަލީލެއްކަމަށެވެ. އަދި ދަނޑުވެރިން ހިތްވަރާއި މަސައްކަތައްކަތްތެރިކަމަކީ އަޅުގަނޑުމެންގެ ޤައުމުގެ ކާބޯތަކޯތަކެތީގެ ރައްކާތެރިކަމާއި އިޤްތިޞާދީ ކުރިއެރުމުގެ މައިގަނޑު ބިންގާކަމަށެވެ.
މިއަދު، ގޮއިދޫ މިވެގެންދަނީ ޒަމާނީ އީޖާދުތަކާއި ދިރިއުޅުމުގެ އާދަކާދައާ ދެމެދު ހަރުދަނާ ބެލެންސެއް ޤާއިމުކުރުމުގެ ނަމޫނާ މިސާލަކަށް. މި ރަށުގެ ހުނަރުވެރި ދަނޑުވެރިން ވަނީ ކާބޯތަކެތީގެ ރައްކާތެރިކަމާއި ދެމެހެއްޓެނިވި ތިމާވެށި ޙިމާޔަތްކުރުމުގެ މިންގަނޑުތަކަށް ފެތޭގޮތަށް މަސައްކަތްކުރުމުގައި ހިތްވަރު ދައްކުވާފަ.
ވަޒީރު އިތުރަށް ވިދާޅުވީ މި ސެޓިފިކޭޝަނަކީ ގޮއިދޫގެ ތާރީޚުގައި އައު ޞަފްޙާއެއް ފެށުމުގެ މުހިންމު ފާލެއްކަމުގައި ދެކޭކަމަށާއި މިއީ ދަނޑުވެރިކަމުގެ ދާއިރާ ކުރިއަރުވައި، ޒުވާނުން ފަޚުރުވެރިކަމާއެކު މި ދާއިރާއަށް ނުކުތުމަށް ހިތްވަރު ލިބޭނެ، އަދި މުޅި ޤައުމަށް ދެމެހެއްޓެނިވި ތަރައްޤީގެ ނަމޫނާއެއްގެ ގޮތުގައި ގޮއިދޫ ފާހަގަކުރެވޭނެ އައު ދައުރެއްގެ ފެށުންކަމަށެވެ.
އެމްގެޕް ސެޓްފިކެޓަކީ ޤައުމީ ފެންވަރުގައި ކާބޯތަކެތީގެ ރައްކާތެރިކަން ހަރުދަނާކުރުމަށާއި، ދެމެހެއްޓެނިވި ދަނޑުވެރިކަމުގެ އުސޫލުތައް ކުރިއެރުވުމަށް، އަދި އުފައްދާ ކާބޯތަކެތީގެ ރައްކާތެރިކަމާއި، ފައިދާތަކާއި، ތިމާވެއްޓާ ރައްޓެހި ގޮތުގައި އުފެއްދޭކަން ކަށަވަރުކުރުމަށްޓަކައި ތަޢާރަފުކުރެވުނު މުހިންމު ސްކީމެކެވެ. މި ސްކީމްގެ ދަށުން ދަނޑުވެރިކަން ކުރުމުގައި ވަށައިގެންވާ މާޙައުލާއި، އަމިއްލަ ސިއްޙަތު އަދި އުފައްދާ ތެކެތީގެ ފެންވަރު ރަގަޅުވާނެކަން ކަށަވަރުކޮށްދެއެވެ.
މިގޮތުން އެމްގެޕް ލިބިފައިވާ ދަނޑުވެރިން ދަނޑު ހެއްދުމުގައި ގަސްކާނާއާއި ކެމިކަލް ބޭނުންކުރާނީ ވަކި މިންގަނޑުތަކަކަށް، ފެންބޭނުންކުރުމުގައި އިސްރާފުވުން މަދުވާނެއެވެ. އަދި ވެށީގެ ރައްކާތެރިކަމަށާއި ތިމާގެ ރައްކާތެރިކަމަށް އަޅަންޖެހޭ ފިޔަވަޅުތައް އަޅާނެއެވެ. ހަމަމިއާއެކު ހުރިހާ މަރުހަލާއެއްގައިވެސް ލިޔެކިއުން ބަހައްޓާނެއެވެ. ވީމާ ޖުމްލަ ގޮތެއްގައި އެމް.ގެޕް ސަރޓިފައިޑް ދަނޑުވެރިން އުފައްދާ ތަކެއްޗަކީ ތިމާވެއްޓާރައްޓެހި، ކާނާ އާއި ބޭސްބޭނުންކުރުމުގައި ބޭނުންކުރަންޖެހޭ މިންގަނޑުތަކަށް ތަބާވެ، ދެމެހެއްޓެނިވި އުސޫލުތަކުން އުފައްދާފައިވާ ތަކެއްޗަށް ވާނެ ކަމުގެ ޔަޤީކަން ގަންނަ ފަރާތްތަކަށް އޮންނާނެއެވެ.
މި ލިޔުން ކިޔާލުމުން
