ރާއްޖޭގައި ދުއްވާ އުޅަނދުތަކުގެ ރައްކާތެރިކަން އިތުރުކުރުމަށް އާރްއެފްއައިޑީ ޓެކްނޮލޮޖީ ތައާރަފްކުރުމުގެ މަސައްކަތް ސަރުކާރުން ފަށާފައިވާކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުހައްމަދު އަމީން ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ހާއްސަ އިންޓަވިއުއެއްގައި ވަޒީރު އަމީން ފާހަގަކުރެއްވި ގޮތުގައި، ރާއްޖޭގައި ގިނަ އަދަދެއްގެ އުޅަނދުތައް ބޭނުންކުރަމުންދިޔަ ނަމަވެސް، މި އުޅަނދުތަކަށް އެކަށީގެންވާ ރައްކާތެރިކަމެއް ފޯރުކޮށްދެވިފައި ނުވެއެވެ. މިކަން ހައްލުކުރުމަށްޓަކައި އާރްއެފްއައިޑީ ނިޒާމު ތައާރަފްކުރުމަށް ނިންމާފައިވާ ކަމަށް ވަޒީރު ވިދާޅުވިއެވެ.
މި އައު ނިޒާމުގެ ސަބަބުން ވަގު ނަންބަރު ޕްލޭޓް ބޭނުންކުރުން ހުއްޓުވި، އުޅަނދުތަކާ އެހެން ފަރާތްތަކުން ބެހުމުން އެލާޓް ކުރެވި، ބާރު ސްޕީޑްގައި ދުއްވާ އުޅަނދުތައް ދެނެގަނެވޭނެއެވެ. އަދި އުޅަނދު ވަގަށް ނެގުމުގެ މައްސަލަތައް މަދުވެ، ތަންފީޒީ އިދާރާތަކަށް މަސައްކަތް ފަސޭހަވާނެ ކަމަށް ވަޒީރު ވިދާޅުވިއެވެ.
ސަރުކާރުގެ ތަފާސްހިސާބުތަކުން ދައްކާ ގޮތުގައި މާލެ ސަރަހައްދުގައި އެކަނިވެސް 118,000 އަށްވުރެ ގިނަ އުޅަނދު ރަޖިސްޓްރީ ކުރެވިފައިވެއެވެ. މީގެ ތެރެއިން 70 ޕަސެންޓަކީ ދެފުރޮޅުލީ އުޅަނދުތަކެވެ. މި މައްސަލަ ހައްލުކުރުމަށް ސަރުކާރުން ވަނީ "މާލެފަހި" ނަމުގައި ހާއްސަ ޕްރޮގްރާމެއް ވެސް ފަށާފައެވެ.
ވަޒީރު އަމީން ވިދާޅުވި ގޮތުގައި، މި ޓެކްނޮލޮޖީ ރާއްޖެއަށް ތައާރަފްކުރުމުގެ މަސައްކަތް ވަރަށް އަވަހަށް ފެށިގެންދާނެއެވެ. އަދި މި ނިޒާމު ތައާރަފްކުރުމުން ރައްޔިތުންގެ މުދަލުގެ ރައްކާތެރިކަން އިތުރުވެ، ތަންފީޒީ އިދާރާތަކަށް މަސައްކަތްތައް ފަސޭހަވެގެންދާނެ ކަމަށް މިނިސްޓަރު ފާހަގަކުރެއްވިއެވެ.
މި ނިޒާމަކީ ދުނިޔޭގެ އެހެން ގައުމުތަކުގައި ވެސް ކާމިޔާބުކަމާއެކު ބޭނުންކުރަމުންދާ ނިޒާމެއްކަން ފާހަގަކުރައްވަމުން، ރާއްޖޭގެ ދަތުރުފަތުރުގެ ނިޒާމު އިތުރަށް ހަރުދަނާކުރުމަށް މިފަދަ ޓެކްނޮލޮޖީތައް ބޭނުންކުރުމަކީ މުހިންމު ކަމެއްކަމުގައި ވަޒީރު ވަނީ ފާހަގަކުރައްވާފައެވެ.
