ޤައުމީ އެއާލައިން، މޯލްޑިވިއަނުން އެ އެއާލައިންގެ ފުރަތަމަ ވައިޑް-ބޮޑީ އެއާކްރާފްޓަށް މަރުޙަބާ ކިޔުމަށް ބާއްވާ އެއާޝޯގެ ވީޑިއޯ އަދި ފޮޓޯގްރަފީ މުބާރާތުގައި ޑްރޯން ބޭނުން ނުކުރެވޭނެ ކަމަށް އެ އެއާލައިނުން ބުނެފިއެވެ.
މޯލްޑިވިއަންގެ މި އެއާޝޯގައި އެ އެއާލައިންގެ ޑީއެޗްސީ-8، ޑީއެޗްސީ-6 (ޓްވިން އޮޓަރ) އަދި އޭޓީއާރު ފްލައިޓުތައް ބައިވެރިވާނެއެވެ. ފްލައިޓުތައް އެންމެ ފުރަތަމަ މާލެއާ ކައިރިކުރާނީ އިރުމަތީ ފަރާތުން ކަމަށާއި، އެއަށްފަހު ވިލިމާލެ ކައިރިން އަނބުރާލުމަށްފަހު ހުޅަނގު ފަރާތުން މާލެއާ ކައިރިކުރާނެ ކަމަށާއި، އެއަށްފަހު މިސްރާބު ޖަހާނީ ހުޅުމާލޭ ފޭސް 2 އަށް ކަމަށް މޯލްޑިވިއަނުން ބުންޏެވެ. އެއާކްރާފްޓްތައް ދަތުރުކުރާނީ 100 - 200 ފޫޓާ ދެމެދުގެ އުސްމިނުގައެވެ.
މި އެއާޝޯގެ ފޮޓޯއާއި ވީޑިއޯ ނަގައިގެން އަގުހުރި އިނާމުތަކެއް ހޯދުމުގެ ފުރުޞަތު ހުޅުވާލާފައިވާއިރު، މި މުބާރާތުގައި ބައިވެރިވުމަށް، އެއާޝޯގެ ވީޑިއޯއެއް ނުވަތަ ފޮޓޯއެއް ނެގުމަށްފަހު އިންސްޓަގްރާމް، ފޭސްބުކް ނުވަތަ ޓްވިޓާ/އެކްސް އަށް ޕޯސްޓްކުރުމަށްފަހު މޯލްޑިވިއަންގެ މީސްމީޑިއާ ހޭންޑަލް ޓެގްކުރަންވާނެއެވެ. އަދި، MaldivianAeroAirshow# ހޭޝްޓެގްވެސް ޕޯސްޓުގައި ބޭނުންކުރަންވާނެއެވެ. މި މުބާރާތުގައި ބައިވެރިވެވޭނީ ޕްރޮފައިލް ޕަބްލިކް ކޮށްގެންނެވެ.
މޯލްޑިވިއަނުން ބުނީ ކޮންމެ އެކައުންޓަކަށްވެސް އެއް ފޮޓޯ/ވީޑިއޯ އަށްވުރެ ގިނައިން ޕޯސްޓުކުރެވޭނެ ކަމަށާއި، ފޮޓޯތައް ނުވަތަ ވީޑިއޯތައް ވާންޖެހޭނީ އެފަރާތެއްގެ އަމިއްލަ އުފެއްދުމަކަށް ކަމަށާއި، ފޮޓޯ އާއި ވީޑިއޯ އަކީ އެއާޝޯގެ ތެރެއިން ނަގާފައިވާ ތަކެއްޗަށް ވާންޖެހޭނެ ކަމަށެވެ.
މި މުބާރާތުން ވަނަވަނައަށް ދާ ފަރާތްތަކަށް ކަނޑައަޅާފައިވާ އިނާމުތައް ތިރީގައި އެވަނީއެވެ.
- ދެ މީހަކަށް ފަސް ތަރީގެ ރިސޯޓެއްގައި ދެ ރޭގެ ފުލް ބޯޑުކޮށް ހުރުން، އެއާބަސް އޭ330-200 އެއާކްރާފްޓުގައި ދެކޮޅު ދަތުރާއެކު.
- ދެ މީހަކަށް އިންޑިއާ (ޓްރިވެންޑްރަމް ނުވަތަ ކޮޗިން) އަށް ދެކޮޅު ޓިކެޓު، އެއާބަސް އޭ330-200 އެއާކްރާފްޓުގައި.
- ދެ މީހަކަށް ރާއްޖޭގެ ބޭނުން ކޮންމެ މަންޒިލަކަށް ދިއުމުގެ ދެކޮޅު ޓިކެޓު، އެއާބަސް އޭ330-200 އެއާކްރާފްޓުގައި.
މޯލްޑިވިއަންގެ އެއާޝޯ އޮންނާނީ 6 ޖަނަވަރީ 2025 ގެ 17:00 - 17:30 އަށެވެ. އަދި މުބާރާތުގައި ބައިވެރިކުރަން ބޭނުންވާ ފޮޓޯ އާއި ވީޑިއޯ ހުށަހެޅުމުގެ ސުންގަޑި ހަމަވާނީ 9 ޖަނަވަރީ 2025 ގެ 14:00 އަށް ކަމަށާއި، ވަނަވަނައަށް ދާ ފަރާތްތައް އިޢުލާންކުރާނީ 11 ޖަނަވަރީ 2025 ކަމަށް މޯލްޑިވިއަނުން ބުނެއެވެ. މި މުބާރާތުގެ ވަނަތައް ހޮވުމުގައި އެހެން ހުށަހެޅުންތަކާ އަޅާބަލާއިރު ތަފާތުވަރާއި، ޕޯސްޓަށް ލިބިފައިވާ ލައިކްސްގެ އަދަދަށް ބަލާނެއެވެ.
މި ލިޔުން ކިޔާލުމުން
