ތައިލެންޑުގެ ވެރިރަށް ބެންކޮކްގައި ހުރި ހޮޓަލެއްގައި ހިނގި އަލިފާނުގެ ހާދިސާއެއް ގައި 3 ފަތުރުވެރިން މަރުވެފައިވާ ކަމަށް އެ ޤައުމުގެ އިދާރާތަކުން ރިޕޯޓްކޮށްފިއެވެ.
މި ސަރަހައްދަކީ ގިނަ އަދަދެއްގެ ފަތުރުވެރިން ޒިޔާރަތްކުރާ، މަޤުބޫލު ސަރަހައްދެކެވެ.
ބެންކޮކްގެ ފަޔަރ އެންޑް ރެސްކިއު ޑިޕާޓްމަންޓުން މިއަދު ބުނި ގޮތުގައި، އެމްބަރ ހޮޓަލުގެ ފަސްވަނަ ފަންގިފިލާގައި އާދިއްތަ ދުވަހުގެ ރޭ އަލިފާނުގެ ހާދިސާއެއް ހިގައިފައިވާ ކަމަށެވެ.
އެ ޑިޕާޓްމަންޓުން އިތުރަށް ބުނި ގޮތުގައި، މަރުވި މީހުންގެ ތެރެއިން، އެއް އަންހެނަކު އަލިފާނުގެ ހާދިސާ ހިނގި ތަނުގައި މަރުވެފައި ވާކަމަށެވެ. އަދި ދެން މަރުވި ދެ ފިރިހެނުން، ހޮސްޕިޓަލުގައި ފަރުވާދެމުން ދަނިކޮށް މަރުވެފައިވާ ކަމަށެވެ.
ފަޔަރ އޮތޯރިޓީތަކުން ބުނާ ގޮތުގައި، މިހާދިސާއާއި ގުޅިގެން އިތުރު ހަތް މީހަކު ވެސް ހޮސްޕިޓަލުގައި ފަރުވާ ހޯދަމުންދާކަމަށެވެ.
މަރުވި މީހުންގެ ނަމާއި ޤައުމުތައް މިހާތަނަށް ހާމަކޮށްފައެއް ނުވެއެވެ.
މި ހޮޓަލަކީ ދުނިޔޭގެ އެކި ކަންކޮޅުތަކުން އަންނަ 'ބެކްޕެކަރުން' ގިނައިން ޒިޔާރަތްކުރާ މަޝްހޫރު ނައިޓްލައިފް ސަރަހައްދެއް ކަމަށްވާ ކާއޯ ސާން ރޯޑާ ކައިރީގައި ހުރި ހޮޓަލެކެވެ.
ބެންކޮކްގެ ގަވަރނަރު ޗަޑްޗަޓް ސިޓިޕަންޓް ނޫސްވެރިންނާ ވަހަކަ ދައްކަވަމުން ވިދާޅުވެފައިވަނީ، އަލިފާން ރޯވިއިރު ހޮޓަލުގައި 75 މީހުން ތިބިކަމަށާއި އަދި 34 މީހުން ސަލާމަތްކޮށްފައި ވަނީ ހޮޓަލުގެ ފުރާޅުން ނެރެގެން ކަމަށެވެ.
ޗަޑްޗަޓް ބުނި ގޮތުގައި، މި ހާދިސާއާ ގުޅިގެން އޭނާ ވަނީ ހޮޓާތަކާއި މުނިފޫހިފިލުވުމުގެ ތަންތަނުގައި ހުރި އަލިފާނުން ސަލާމަތްވުމަށް އަޅާފައިވާ ފިޔަވަޅުތައް ބަލައި ފާސްކުރުމަށް މުޅި ސިޓީ ޝާމިލުވާ ގޮތަށް އޮފިޝަލުންނަށް އަންގާފައެވެ.
"އަޅުގަނޑުމެން އެބަޖެހޭ އިތުބާރު އުފައްދައި، ފަތުރުވެރިންގެ ރައްކާތެރިކަމަށް ސަމާލުކަން ދޭން،" ޗަޑްޗަޓް ވިދާޅުވިއެވެ.
ދެކުނު އޭޝިއާގެ ދެވަނައަށް އެންމެ ބޮޑު އިގްތިސާދު ކަމަށްވާ ތައިލެންޑުގެ އިގްތިސާދަށް އެންމެ ބޮޑު ހިއްސާއެއް ކުރާ އެއް ދާއިރާ އަކީ ފަތުރުވެރިކަމެެވެ. އެ ގައުމުގެ ޖީ.ޑީ.ޕީގެ ގާތްގަނޑަކަށް ފަސްބައިކުޅަ އެއްބައި ހިއްސާކުރަނީ ފަތުރުވެރިކަމުގެ ދާއިރާއިންނެވެ.
މި އަހަރު އެކަނި ވެސް ތައިލެންޑަށް 32 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައި ވާއިރު، އެންމެ ގިނަ ފަތުރުވެރިން އައިސްފައި ވަނީ ޗައިނާ އިންނެވެ. މީގެ އިތުރުން، މެލޭޝިއާ، އިންޑިއާ އަދި ދެކުނު ކޮރެއާ އިން ވެސް ގިނަ އަދަދަކަށް ފަތުރުވެރިން ޒިޔާރަތްކޮށްފައިވެއެވެ.
މި ލިޔުން ކިޔާލުމުން
