ފާއިތުވި އެއް އަހަަރު މި ވުޒާރައިން ވަނީ ރައްޔިތުން ބަލައިގަންނަ، ކާމިޔާބު މަސައްކަތްތަކެއް ކޮށްފަ ކަމަށް ސިޓީސް، ލޯކަލް ގަވަރމަންޓް އެންޑް ޕަބްލިކް ވޯކްސް ގެ މިނިސްޓަރު އާދަމް ޝަރީފް ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ޒައާމަތަށް އެއް އަހަރު ފުރުމާ ގުޅިގެން ދެއްވި ހިތާބުގަ އެވެ.
މިނިސްޓަރު ވަނީ ރައީސުލްޖުމްހޫރިއްޔާގެ ދެކަނބަލުންނަށާއި، އަދި އެމިނިސްޓްރީގެ ހުރިހާ މުވައްޒަފުންނަށާއި، ހުރިހާ ކައުންސިލްތަކަށާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް ދުވަހުގެ ތަހުނިޔާއާއި މުބާރިކްބާދި އަރިސް ކޮށްފައެވެ.
މިނިސްޓަރު ވިދާޅުވީ މިއަދަކީ މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވޯކްސްގެ މުވައްޒަފުންނަށް އާއި ހާއްސަ ދުވަހެއް ކަމަށެވެ. މީ އެވުޒާރާ އަށްވެސް އެއް އަހަރު ފުރުނު ދުވަސްކަމާއި، ހުރިހާ މުވައްޒަފުންނަށް ދުވަހުގެ ދުވަހުގެ ތަހުނިޔާ އަރިސްކުރާ ކަމަށެވެ.
މި ވުޒާރާ އުފައްދަވާފައި ވަނީ ދިވެހިރާއްޖޭގެ އިދާރީ ދާއިރާތަށް ތަރައްގީ ކުރުމަށާއި ލާމަރުކަޒީ އުސޫލުން ހިންގުމުގެ ސިޔާސަތު ކަނޑައަޅައި އިދާރީ ދާއިރާތަށް ހިންގައި، އާންމު މަސައްކަތުގެ ހިދުމަތް ދިނުމުގެ ސިޔާސަތު ކަނޑައެޅުމަށް ކަމަށާއި، އަދި ސަރުކާރާއި ކައުންސިލްތަކާއި ގުޅިގެން، ރައްޔިތުންނަށް ފޯރުކޮށްދޭންޖެހޭ ރަށްވެހި ކަމުގެ ހިދުމަތް ދިނުމުގައި އެއބާރުލުމާއި އެހީތެރިކަން ފޯރުކޮށްދެއްވުމުގެ ބޭނުމުގަ ކަމަށް މިނިސްޓަރު ވިދާޅުވެފައި ވެއެވެ.
މިނިސްޓަރު ވިދާޅުވީ ލާމަރުކަޒީ ނިޒާމު ހަރުދަނާ ކުރުމަށްޓަކައި ގައުމީ ޔުނިވާރސިޓީގެ އެހީތެރި ކަމާއެކު އިލްމީ ދިރާސާއެއް ވަނީ ކުރެވިފައި ކަމަށެވެ.
އަދި އިދާރީ ދާއިރާތަށް ހިންގުމުގައި ހުރި ގޮންޖެހުންތަށް ދެނެގަނެެ ކަންކަން ހައްލު ކުރުމާއި ބެހޭ މަޝްވަރާ ބައްދަލުވުންތަކެއް ރާއްޖޭގެ އުތުރާއި ދެކުނުގައި ވަނީ ބޭއްވިފައިކަމާއި، ކައުންސިލުތަށް ބާރުވެރިކުރުމުގެ ސިޔާސަތުތަށް ވަނީ ކަނޑައެޅިފައި ކަމަށެވެ. އިދާރީ ދާއިރާތަކަށް ވިލަރެސް ވެރިން ކަނޑައަޅައި ކައުންސިލުތަކާއި ސަރުކާރާއި ރައްޔިތުންނާއި ގުޅުވައި ދިނުމުގެ އެތައް މަސައްކަތްތަކެއް ކުރެވި އެތައް ހައްލުތަކެއް ވެސް ވަނީ ހޯދައިދެވިފައިކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ކައުންސިލް އިދާރާތަކުގެ ތެރޭގައި 55 ކައުންސިލް އިދާރާ ބިނާކުރުމުގެ މަސައްކަތް މިމަހު ތެރޭ ފެށުމަށް ވަނީ ތައްޔާރުވެފައި ކަމަށާއި، އަންނަ އަހަރުގައި އިތުރު 50 ކައުންސިލް އިދާރާއިގެ އިމާރާތް ކުރެވޭނެ ކަމުގެ ޔަގީންކަން މިހާރުވަނީ ލިބިފައިކަމަށް މިނިސްޓަރު ވިދާޅުވިއެވެ. އަދި ކައުންސިލްތަށް މާލީގޮތުން ބާރުވެރިކުރުމަށް ފަޅުރަށް ހޯދައިދިނުމުގެ ސިޔާސަތު ހާމަކޮށް، ފަތުރުވެރިކަމުން ލިބޭ ގްރީން ޓެކްސްގެ 10 އިން ސައްތަ ކައުންސިލްއަށް ލިބޭނެ ގޮތް ހެދުމަށް ގާނޫނަށް ގެންނަން ޖެހޭ ބަދަލުތަށް ގެނައުމުގެ މަސައްކަތް މިހާރު ދަނީ ކުރެވެމުން ކަމަށެވެ.
އެއް އަހަރު ތެރޭގައި މި ކާމިޔާބީތަށް ހާސިލް ކުރެވުނީ ރައީސުލްޖުމްހޫރިއްޔާ މި ވުޒާރާއަށް ދެއްވި ހާއްސަ ސަމާލުކަމާއި ލާމަރުކަޒީ ނިޒާމު ހަރުދަނާ ކުރުމަށް އެމަނިކުފާނު ދެއްވި އިސްކަމުގެ ސަބަބުން ކަމަށާއި، އެކަމަށްޓަކައި ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އިހުލާސްތެރި ޝުކުރު ދަންނާވާ ކަމަށް މިނިސްޓަރު އާދަމް ޝަރީފް ވިދާޅުވި އެވެ.
މި ލިޔުން ކިޔާލުމުން
