މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން އިންތިޒާމްކޮށްގެން މި ހުކުރު ދުވަހު އެކްސްޕޯއެއް ވަނީ ފަށާފައެވެ. މިރޭ ގެ 10 ޖެހުމާއި ހަމައަށް ކުރިޔަށްދާނެ މި އެކްސްޕޯއަކީ "ދާލަން : ނޭޝަނަލް ސްކިލްސް އެންޑް ކެރިއަރ އެކްސްޕޯ 2024" ގެ ނަމުގައި ބާއްވާ އެކްސްޕޯއެކެވެ. އިއްޔެ (15 ނޮވެންބަރ) ހަވީރު 16:00 ގައި ފެށި މި އެކްސްޕޯގައި ރާއްޖޭގެ ޔުނިވާސިޓީތަކާއި ކޮލެޖް އަދި އިންސްޓިޓިއުޓްތަކުގެ އިތުރުން ސަރުކާރުގެ ކުންފުނިތަކާއި އިދާރާތަކާއި އަމިއްލަ ކުންފުނިތަކުން ވަނީ ބައިވެރިވެފައެެވެ. އެގޮތުން މި އެކްސްޕޯގައި 40 ށް ވުރެ ގިނަ ސްޓޯލް ވަނީ ތައްޔާޜުކޮށްފައެވެ.
އިއްޔެ 16:00 ން 18:00 ށް އަދި 20:00 ން 22:00 ށް ފުރަތަމަ ދުވަހުގެ ސެޝަންތައް ކުރިޔަށް ގެންގޮސްފައިވާއިރު ވަރަށް ބޮޑުތަރުހީބެއް ވަނީ ލިބިފައެވެ. އެގޮތުން ހާހަކަށްވުރެ ގިނަމީހުން މި އެކްސްޕޯއަށް ޒިޔާރަތް ކުރައްވާ، ރަޖިސްޓްރީކޮށްފައިވެއެވެ.
މި އެކްސްޕޯއިން ވަޒީފާގެ ފުރުސަތުތަކާއި މަތީތައުލީމުގެ ފުރުސަތުތަކުގެ އިތުރުން ޒުވާނުންނަށްނަށް ކުރިޔަށްދެވޭނެ އެކި ދާއިރާތަކާއިގުޅޭ މުހިންމު މައުލޫމާތުތައް ފޯރުކޮށްދެއެވެ. އޭގެ އިތުރުން ތަފާތުއެކި ލަކީޑްރޯތަކުން އަގުހުރި އިނާމްތައް ހޯދުމުގެ ފުރުސަތުވެސް ވަނީ ހުޅުވާލެވިފައެވެ. އެގޮތުން ލަކީ ޑްރޯގެ ދަށުން، ގުރުއަތުން ހޮވޭ 5 ފަރާތަކަށް، މެލޭޝިޔާގެ ޒިއަމެން ޔުނިވާސިޓީގައި، ބެޗްލަރސް އިން ޖަރނަލިޒަމް، ބެޗްލަރސް އިން އަރޓިފިޝަލް އިންޓެލިޖެންސް، ބެޗްލަރސް އިން މެރިން ބަޔޯޓެކްނޮލޮޖީ، ބެޗްލަރސް އިން ޑިޖިޓަލް މީޑިޔާ ޓެކްނޮލޮޖީ އަދި ބެޗްލަރސް އިން ސޮފްޓްވެއަރ އިންޖީނިއަރިންގ ކިޔެވުމުގެ ފުރުޞަތު ފާހަގަކޮސްލެވެއެވެ.
މީގެ އިތުރުންވެސް އެކި ސްޓޯލްތަކުން ތަފާތު ލަކީޑްރޯތަކުން ގިނަ އިނާމްތައް ލިބޭއިރު، މި އިވެންޓްގެ ޕާޓްނާރސް އަދި ސްޕޮންސަރސް ގެ ފަރާތުން ވެސް ވަނީ އަގުހުރި އިނާމްތައް ހުށަހަޅާފައެވެ.
"ދާލަން : ނޭޝަނަލް ސްކިލްސް އެންޑް ކެރިއަރ އެކްސްޕޯ 2024" މިއަދުވެސް 16:00 ން 18:00 ށް އަދި 20:00 ން 22:00 ށް ކުރިޔަށް ދާނެއެވެ.
މި ލިޔުން ކިޔާލުމުން
