ހުރިހާ އިދާރާތަކަކަށް އެއް ނަންބަރަކުން ގުޅޭގޮތް ހަމަޖެއްސުމަށްޓަކައި އެމަރޖެންސީ ސަރވިސް ހޮޓްލައިން "911" އިފްތިތާޙްކޮށްފިއެވެ.
މިގޮތުން ރޭ ބޭއްވި ޚާއްޞަ ރަސްމިއްޔާތެއްގައި އެމަރޖެންސީ ކޯލް ސެންޓަރު އިފްތިތާޙްކޮށްދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، ޢަލީ އިހުސާނެވެ.
މި ރަސްމިއްޔާތުގައި ވާހަކަފުޅުއްދަކަވަމުން ވަޒީރު ވިދާޅުވީ 911އަށް ހުށައަޅާ މައްސަލަތައް ކަމާގުޅުން ހުރި ހުރިހާ އިދާރާތަކަށް ވަގުތުން އެ މަޢުލޫމާތު ފޯރުކޮށްދެވޭނެ ކަމަށެވެ. އަދި ރައީސް ޑރ. މުޙައްމަދު މުޢިއްޒުގެ ވެރިކަމުގެ ވަރަށް ކުރީކޮޅުގައި މިފަދަ ނޭޝަނަލް އެމަޖެންސީ ކޯލް ސެންޓަރެއްގެ މުހިންމުކަން އެނގިވަޑައިގަތް ކަމަށާއި، އެވަގުތުން ފެށިގެން މި ޚިދުމަތް އެއް ނަންބަރެއްގެ ޒަރިއްޔާއިން ރައްޔިތުންނަށް ދިނުމަށް ރައީސް ނިންމެވިކަން ފާހަގަކުރައްވާ މިނިސްޓަރ ވިދާޅުވީ ކެބިނެޓުން މި މަސައްކަތް ކުރުމަށް ނިންމުމުން ރައީސް ވަނީ ސަލާމަތީ ޚިދުމަތްދޭ މުއައްސަސާތަކާއި ހަވާލުވެތިބި ވުޒާރާތަކަށް މި ޚިދުމަތް ތަޢާރަފްކުރުމަށް ރައީސް އިރުޝާދު ދެއްވި ކަމަށެވެ.
މީގެ އިތުރުން ވަޒީރު ވިދާޅުވީ، މި ޚިދުމަތްދޭން ނިންމީ ފުލުހުންގެ މުއައްސަސާގައި މި ޚިދުމަތް ގާއިމްކޮށް، އަދި މި ޚިދުމަތް ގާއިމްކުރެވިގެން އަންނައިރު ފުލުހުންގެ ޚިދުމަތާއި، އެމްބިއުލާންސްގެ ޚިދުމަތުގެ އިތުރުން ކޯސްޓްގާޑް، ފަޔަރ އެންޑް ރެސްކިޔު ސަރވިސްގެ ޚިދުމަތްވެސް 911 ނަންބަރުގެ ތެރެއިން ރައްޔިތުންނަށް ލިބިގެންދާ ގޮތަށް ކަމަށެވެ.
911 އިޚްތިޔާރުކުރެއްވި ސަބަބާމެދު ވާހަކަދައްކަވަމުން ވަޒީރު ވިދާޅުވީ، އޭގެ ޒާތުގަ ޕްރޮމޯޓްވަމުން ކުރިއަށްއޮތް ތަނުގަވެސް އަންނާނެ ނަންބަރެއް ސެލެކްޓްކުރުމަށް ބެލި ކަމަށާއި، އެގޮތުން އެކިއެކި މީޑިއާތަކުގެ ޒަރިއްޔާއިންވެސް ފެންނަ އެއް ނަންބަރަކީ 911 ކަމަށާއި، އެހެންކަމުން އަޅުގަނޑުމެން ނިންމީ އެންމެ ފަސޭހަ ގޮތަކީ އަދި ގިނަ ރައްޔިތުންނަށް ހަނދާނުގައި ބަހައްޓަންވެސް ފަސޭހަވާނީ މިފަދަ ނަންބަރަކާއިގެން ކުރިއަށްދިއުން ކަމުގައެވެ.
މިއަދު މި ޚިދުމަތް ތަޢާރަފްވެގެން މިއައީ އެންމެ ބޭނުންވާ ފުރިހަމަ ފެންވަރެއްގައި ނޫން ކަމަށާއި އެހެންނަމަވެސް ރައްޔިތުންނަށް ބޭނުންވާ ފެންވަރަށް މިޚިދުމަތް މިއޮތީ ފެށިފައި ކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ ކަމާގުޅޭ ހުރިހާ އިދާރާއެއް ގުޅިގެން މި ޚިދުމަތް އިތުރަށް ފުޅާކޮށް ރައްޔިތުންނަށް މިއައްވުރެ ފުރިހަމަ ޚިދުމަތްތަކެއް ފޯރުކޮށްދިނުމުގެ މަގު ހޯއްދަވައިދެއްވާނެ ކަމަށެވެ. އެގޮތުން ކޮމިއުނިކޭޝަން ސިސްޓަމްތައް އެޑްވާންސްކޮށް ޖީއައިއެސް މެޕްކުރެވޭނެ ނިޒާމަކަށް ބަދަލުކޮށް ޑިސްޕެޗް ސިންކްނޮރައިޒް ވާގޮތަށް ކުރިއަށް އޮތްތަނުގައި ހައްދަވައިދެއްވާނެ ކަމަށްވެސް ވަޒީރު ވިދާޅުވިއެވެ.
911 ކޯލް ސެންޓަރުގެ ކެޕޭސިޓީ އިތުރުކުރައްވާނެކަން ފާހަގަކުރައްވާ ވަޒީރު ވަނީ ރާއްޖެއިންނާއި އަދި ރާއްޖެއިން ބޭރުން ތަމްރީނުގެ ފުރުސަތުތައް މުވައްޒަފުންނަށް ފަހިކޮށްދެއްވާނެ ކަމަށް ވިދާޅުވެފައެވެ.
ވަޒީރު ވިދާޅުވީ ބޮޑު ހާދިސާއެއް މެދުވެރިވެއްޖެނަމަ އެކަމަށް ޖަވާބުދާރީވާ ފަރާތަކީ ލޯއެންފޯސްމެންޓްގެ ފަރާތުން އެ ކޯލް ނަގާ ފަރާތްކަމުން އެ ފަރާތަކަށް އިތުރަށް ދޭންޖެހޭ ޓެކްނިކަލް ތަމްރީނުތައްވެސް ކުރިއަށް އޮތްތަނުގަ ދެމުންގެންދާނެ ކަމަށެވެ.
ވަޒީރު ވަނީ 911ގެ ޚިދުމަތުގެ ފެންވަރު ދާނީ ދުވަހެއް ދުވަހަކަށް ރަނގަޅުވަމުން ކަމަށާއި ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން މި ޚިދުމަތް ލިބިގެން އަންނައިރު މި ޚިދުމަތް ރައްޔިތުންނަށް ލިބޭނީ ފުރިހަމައަށްކަން ފާހަގަކުރައްވާފައެވެ.
މީގެ އިތުރުން ވަޒީރު ވަނީ، އާއްމުންނާއި ގުޅިފައިވާ މިފަދަ މުހިންމު ޚިދުމަތެއް، ނަހަމަ ގޮތުގައި ބޭނުން ނުކުރުމަށް އިލްތިމާސްކުރައްވާފައެވެ.
މި ލިޔުން ކިޔާލުމުން
