ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ) އިން އެ ކޯޕަރޭޝަންގެ ދެމެހެއްޓެނިވި، ޒަމާނީ ދިރިއުޅުމުގެ ތަޞައްވުރުގެ ތެރެއިން 15 ބިޔަ މަޝްރޫޢު ރޭ އިފްތިތާޙްކޮށްފިއެވެ.
މިގޮތުން "ޓްރާންސްފޯމިންގް ޓުމޯރޯ: ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ކީ ޕްރޮޖެކްޓްސް"ގެ ނަމުގައި ހުޅުމާލޭ ސެންޓްރަލް ޕާކުގައި ބޭއްވި ޚާއްޞަ ޙަފްލާއެއްގައި މި މަޝްރޫޢުތައް އިފްތިތާޙްކޮށްދެއްވީ އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު، މުޙައްމަދު ސައީދެވެ.
މި ޙަފްލާގައި ބައެއް މަޝްރޫޢުތަކުގެ މޮޑެލްތައްވެސް ވަނީ ދައްކާލައިފައެވެ. ރޭ އިފްތިތާޙްކުރި މަޝްރޫޢުތަކުގެ ތެރޭގައި އިއާދަކުރަނިވި ހަކަތައިގެ ނިޒާމުތަކާއި ސްމާޓް ޓެކްނޮލޮޖީ ބޭނުންކޮށްގެން ތަރައްޤީކުރާ ރަސްމާލެ ސިޓީ ހިމެނެއެވެ. މިގޮތުން 325،000 މީހުންނަށް ދިރިއުޅެވޭނެ ގޮތަށް ފަރުމާކުރާ ރަސްމާލެ ސިޓީގައި 65،000 ހައުސިންގ ޔުނިޓުގެ އިތުރުން އާންމު ޕާކުތަކާއި ވިޔަފާރި ބިންތައް ޤާއިމުކުރެވޭނެއެވެ.
މީގެ އިތުރުން، އިންޑޯ ސްޕޯޓްސް ކޮމްޕްލެކްސާއި، ލެޕް ޕޫލް، ކުލަބުހައުސް އަދި 5 ބުރީގެ ލަގްޒަރީ ހޮޓެލެއް ހިމެނޭ ގޮތަށް ރިސޯޓުތަކުން ފޯރުކޮށްދޭ ޚިދުމަތްތައް ލިބޭފަދަ ގޭޓެޑް ކޮމިއުނިޓީއެއް ގޮތުގައި ފަރުކޮޅުފުށި ތަރައްޤީކުރުމަށްވެސް ވަނީ ހަމަޖެހިފައެވެ. އަދި، ރޯހައުސްތަކުގެ އިތުރުން ބިންވެރިޔާ ސްކީމްގެ ދަށުން ބިން ލިބޭ ފަރާތްތަކަށް ޚާއްޞަ 'ޕްރީފެބް ހޯމްސް' މަޝްރޫއަކާއި، 1،700 ސޯޝަލް ހައުސިންގ ޔުނިޓާއި 400 ސޯޝަލް ހައުސިންގ ޔުނިޓުގެ މުޅިން އާ ދެ ހައުސިންގ މަޝްރޫޢުވެސް ވަނީ އިފްތިތާޙްކޮށްފައެވެ.
ހަމައެއާއެކު، ގްރޭޓަރ މާލެ ސަރަޙައްދުގައި ދިމާވެފައިވާ ޕާކިންގެ މައްސަލައަށް ހައްލެއް ހޯދައިދިނުމަށްޓަކައި، 15 މަލްޓ-ލެވެލް ޕާކިންގ އިމާރާތްތައްވެސް ހުޅުމާލޭގައި އެޅުމަށް ވަނީ ނިންމައިފައެވެ. މިގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް އިފްތިތާޙްކުރެވުނު މި މަޝްރޫޢުގެ ސަބަބުން ޓްރެފިކް ކުޑަވެ، ޕާކުކުރުމުގައި ދިމާވާ ދަތިތަކަށް ހައްލެއް ލިބިގެންދާނެއެވެ.
މީގެ އިތުރުން ރޭ އިފްތިތާޙްކުރެވުނު އެއް މަޝްރޫޢު ކަމަށްވާ އައިލް އެޑްވެންޗަރ ޕާކުގެ ޑިޒައިން ކޮންސަލްޓަންސީ އާއި ތަނުގެ ހިންގުމަށް ތަމްރީނުތައް ދިނުމާ ގުޅޭ އެމް.އޯ.ޔޫ އެއްގައިވެސް ވަނީ ސޮއިކޮށްފައެވެ. މި އެއްބަސްވުމުގައި އެޗް.ޑީ.ސިގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، ފަޒުލް ރަޝީދެވެ. އަދި ސިޓީ ޑިވެލޮޕްމަންޓްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ޑިރެކްޓަރ، ޑޭވިޑް ޕިއެރިސްއެވެ. މި އެޑްވެންޗަރ ޕާކުގައި ރޭސިންގ ޓްރެކްތަކާއި، ޑްރިފްޓް ޓްރެކްތަކާއި، ވޯޓަރ ތީމް ޕާކެއްވެސް ހިމެނޭނެއެވެ.
އެޗް.ޑީ.ސީން ރޭ އިފްތިތާޙްކުރި މަޝްރޫޢުތަކުގެ ތެރޭގައި ތާރީޚީ މަރުކަޒަކާއި، ނޮލެޖު ޕާކެއްގެ އިތުރުން ގަލުވަޅުގެ ފަޅު ތެރޭގައި ތަރައްޤީކުރާ ނޫވެލި އައިލެންޑް ރިޓްރީޓުގެ އިތުރުން ކިނާރިއާ ޕިކްނިކް އައިލެންޑްވެސް ހިމެނެއެވެ. އަދި، ކުދި އަދި މެދުފަންތީގެ ވިޔާފަރިތަކަށް އިމާރާތަކާއި، ސްމާޓް ވެއަރހައުސް ކޮމްޕްލެކްސް އަދި އެޗް.ޑީ.ސީގެ އައު އޮފީސް އިމާރާތްވެސް ހިމެނެއެވެ.
މި ލިޔުން ކިޔާލުމުން
