ބާރުގަދަ، ނުރައްކާތެރި ތޫފާން "މިލްޓަން" އެމެރިކާގެ ފްލޮރިޑާގެ ސިއެސްޓާ ކީ އަށް އަރައިފިއެވެ. މިއީ މިއަހަރު އެމެރިކާ އަށް އެރި ފަސްވަނަ އަދި ފްލޮރިޑާ އަށް އެރި 3 ވަނަ ތޫފާނެވެ.
ކެޓަގަރީ 3 ގެ ބާރުގަދަ މި ތޫފާނުގައި ބޯކޮށް ވާރޭވެހި ޓާމްޕާ ބޭ ސަރަހައްދުވަނީ ވަރަށް ބޮޑަށް ފެންބޮޑުވެފައެވެ. ތޫފާން މިލްޓަންގެ ސަބަބުން މިލިއަނަކަށް ވުރެ ގިނަ ގެއިން ވަނީ ކަރަންޓް ކެނޑިފަ އެވެ.
ފްލޮރިޑާގެ މާޓިން ކައުންޓީގެ އޮފިޝަލުން ބުނާ ގޮތުގައި ވައި ގަދަވެ، ރާޅު އަރައި، ފެން ބޮޑުވެ އެތައް ބަޔަކަށް އަނިޔާވެ،އެތައް ގެއަކަށް ވަނީ ގެއްލުން ލިބިފައެވެ. ކައުންޓީއިން ވަނީ ގެއިން ބޭރަށް ނުނިކުންނަން އެ ސަރަހައްދުގެ ރައްޔިތުންނަށް އިލްތިމާސް ކޮށްފައެވެ. އަދި ރޭގަނޑު 9 އިން ހެނދުނު 6 އަށް ވަނީ ކާފިއު ވެސް އިއުލާން ކޮށްފައެވެ.
ތޫފާން ގައި ގަޑިއަކު 105 މޭލުގެ ބާރުމިނުގައި ވައިޖެހި މިހާތަން ވަނީ ދެމީހުން މަރުވެފައެވެ. އަދި މި އަދަދު އިތުރުވެދާނެ ކަމަށް ބުނެ އޮފިޝަލުން ވަނީ ރައްޔިތުންނަށް ރައްކާތެރިކަމުގެ ހިސާބުތަކަށް ބަދަލުވުމަށް އަންގައިފައެވެ.
އެމެރިކާގެ ރައީސް ޖޯ ބައިޑަން ވެސް ވަނީ ގައުމާ މުހާތަބުކުރައްވައި، މީ މިގަރުނުގެ ތެރޭގައި ފްލޮރިޑާއަށް އައި އެންމެ ނުރައްކާތެރި ތޫފާންކަމަށް ވިދާޅުވެފައެވެ. އަދި ލޯކަލް އޮތޯރިޓީތަކުގެ ވާހަކަ އަޑު އަހާ ރައްކާތެރި ސަރަހައްދު ތަކަށް ދިޔުމަށް ރައްޔިތުންނަށް އިލްތިމާސް ކުރައްވާފައެވެ.
20 މިލިއަން މީހުންގެ ކެއުމާއި 40 މިލިއަން ލީޓަރުގެ ފެން ހަމަޖައްސަވައި، ރައީސް ވަނީ ރައްޔިތުންނަށް ކެތްތެރިވުމަށާއި މި ދަނޑިވަޅުގައި އެކަކު އަނެކަކަށް އެހީތެރިވުމަށް ވެސް އިލްތިމާސް ކުރައްވާފައެވެ.
މި ލިޔުން ކިޔާލުމުން
