މޯލްޑިވްސް ޙައްޖު ކޯޕަރޭޝަން ލިމިޓެޑުގެ "ނިޢަމް ރެސިޑެންސް" މަޝްރޫއުގެ ޑިޒައިން ޚިދުމަތްތައް ފޯރުކޮށްދިނުމަށް، ފަހި ދިރިއުޅުން ކޯޕަރޭޝަން (އެފްޑީސީ) އާ މިއަދު ހަވާލުކޮށްފިއެވެ.
މިއަދު ބޭއްވި ރަސްމިއްޔާތެއްގައި މިކަމާ ގުޅޭ އެއްބަސްވުމުގައި
އެފްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު ހަމްދާން ޝަކީލެވެ. އަދި ޙައްޖު ކޯޕަރޭޝަނުގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު މުޙައްމަދު ޝަކީލެވެ.
އެފްޑީސީން ބުނީ މި އެއްބަސްވުމުގެ މަގުސަދަކީ ނިޢަމް ރެސިޑެންސް މަޝްރޫއުއަށް ބޭނުންވާ އާކިޓެކްޗަރަލް، އިންޖިނިއަރިންގ އަދި ކުރެހުންތައް ފޯރުކޮށްދިނުމާއި، ކޮންސަލްޓެންސީގެ ޚިދުމަތް ފޯރުކޮށްދިނުން ކަމަށެވެ.
މި އެއްބަސްވުމުގެ އިތުރުން މިނިސްޓްރީ އޮފް އިސްލާމިކް އެފެއާޒާއި މޯލްޑިވް ގޭސް އާއެކުވެސް އެއްބަސްވުމެއްގެ ދަށުން، އެފްޑީސީން އަންނަނީ މިފަދަ ޚިދުމަތްތައް ފޯރުކޮށްދެމުންނެވެ.
އެފްޑީސީން ބުނީ އެ ކުންފުންޏަށް ފަސް އަހަރު ފުރުމުގެ މުނާސަބަތާ ގުޅިގެން ކުންފުނީގެ މެންޑޭޓަށް އައި ބަދަލާއެކު، އާމްދަނީ އިތުރުކުރުމުގެ ގިނަ މަސައްކަތްތަކެއް ވެސް ކުރަމުންދާ ކަމަށެވެ.
މި މަޝްރޫއުތައް ކާމިޔާބުކަމާއެކު ތަންފީޒުކުރުމަކީ މި ދާއިރާއިން އިތުރު ފުރުސަތުތައް ހުޅުވި، އެ ކުންފުންޏަކީ ފައިދާ ލިބޭ ކުންފުންޏަކަށް މަގުފަހިވެގެންދާނެ ކަމެއް ކަމަށްވާތީ، މި ލަނޑުދަނޑި ހާސިލުކުރުމަށްޓަކައި ކެނޑިނޭޅި އެ ކުންފުނިން މަސައްކަތް ކުރަމުންދާ ކަމަށް އެެފްޑީސީން ވަނީ ބުނެފައެވެ.
މި ލިޔުން ކިޔާލުމުން
