ވެނެޒުއޭލާގައި ސާބިތުވެފައިވާ ތެލުގެ ރިޒާވްގެ ތެރެއިން ގާތްގަނޑަކަށް 65 ބިލިއަން ފީފާ ތެލުގެ މެޖޯރިޓީ ކޮންޓްރޯލް އެމެރިކާއަށް ލިބޭނެ ގޮތަށް ތާރީޚީ އެއްބަސްވުމެއް ޤާއިމުކޮށްފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ އިޢުލާނުކުރައްވާފައެވެ. ރައީސް ޓްރަމްޕް ސިފަކުރެއްވި ގޮތުގައި މިއީ ދުނިޔޭގެ ތާރީޚުގައި ވެސް ހެދި އެންމެ ބޮޑު ތެލުގެ އެއްބަސްވުމެވެ. އަދި މި އެއްބަސްވުމަކީ އޯޕެކްގެ މެންބަރު ޤައުމެއް ކަމަށްވާ ވެނެޒުއޭލާގެ އަޑިއަޅާފައިވާ ހަކަތައިގެ ޞިނާޢަތް އަލުން ކޮޅަށް ޖެހުމަށް އެޅުނު ވަރަށް މުހިންމު ފިޔަވަޅެއް ކަމަށް ވެސް ވިދާޅުވިއެވެ.
މި މުޢާމަލާތުގެ ސަބަބުން އެމެރިކާގެ ތެލުގެ ރިޒާވް ދެގުނައަށް ވުރެ އިތުރުވެ، އެމެރިކާގެ ރައްޔިތުންނަށް ތެލުގެ އަގު ބޮޑުތަނުން ހެޔޮވެގެންދާނެ ކަމަށް ރައީސް ޓްރަމްޕް ވަނީ ވިދާޅުވެފައެވެ.
މީގެއިތުރުން، ސެކްރެޓަރީ އޮފް ސްޓޭޓް މާކޯ ރޫބިއޯ އާއި ސެކްރެޓަރީ އޮފް ވޯ ޕީޓް ހެގްސެތު، ވެނެޒުއޭލާގެ އިންތިޤާލީ ރައީސާ ޑެލްސީ ރޮޑްރިގޭޒްއާ ގުޅިގެން ކުރެއްވި މަސައްކަތުން މި ކާމިޔާބީ ހާސިލުކުރެވުނީ އެމެރިކާގެ ޓެކްސް ދައްކާ ފަރާތްތަކުގެ އެއްވެސް ޚަރަދަކާ ނުލައި ކަމަށް ވެސް ޓްރަމްޕް ފާހަގަކުރެއްވިއެވެ.
ވެނެޒުއޭލާގެ އިންތިޤާލީ ރައީސާ ޑެލްސީ ރޮޑްރިގޭޒް މަރުޙަބާ ވިދާޅުވި މި އެއްބަސްވުމުގެ ސަބަބުން، އެ ޤައުމުގެ ދައުލަތުގެ ޚަޒާނާއަށް ގާތްގަނޑަކަށް 209 ބިލިއަން ޑޮލަރު ލިބޭނެ ކަމަށް ލަފާކުރެވެއެވެ.
ސެކްރެޓަރީ އޮފް ސްޓޭޓް މާކޯ ރޫބިއޯ ފާހަގަކުރެއްވި ގޮތުގައި މިއީ ދެ ޤައުމަށް ވެސް ލިބުނު ކާމިޔާބީއެކެވެ. އަދި މި އެއްބަސްވުމުގެ ދަށުން އަމިއްލަ ފަރާތްތަކުގެ އިންވެސްޓްމަންޓްގެ ގޮތުގައި ވެނެޒުއޭލާއަށް 100 ބިލިއަން ޑޮލަރު ވަދެ، އެތައް ހާސް ވަޒީފާއެއް އުފެދިގެންދާނެއެވެ.
އެމެރިކާގެ ކުންފުނިތައް ހިމެނޭހެން ތެޔޮ ހޯދުމާއި އުފެއްދުމުގެ ޙައްޤުތައް ދިނުމުގެ އެއްބަސްވުންތަކުގައި އަންނަ ހަފުތާގައި ސޮއިކުރުމަށް ތައްޔާރުވަމުންދާއިރު، ތެލުގެ ޞިނާޢަތުގެ ކޮންޓްރޯލް ދައުލަތަށް އޮންނަ ގޮތަށް ޤާނޫނުއަސާސީ އޮތުމުން، ތެޔޮވަޅުތައް ކުއްޔަށް ދިނުމުގައި ޤާނޫނީ ގޮންޖެހުންތަކާ ކުރިމަތިލާން ޖެހިދާނެ ކަމަށް ބެލެވެއެވެ.