އެމެރިކާގެ ޖުމްލަ ދަރަނި ތާރީޚުގައި ފުރަތަމަ ފަހަރަށް 40 ޓްރިލިއަން ޑޮލަރަށް ވުރެ މައްޗަށް އަރާފައިވާ ކަމަށް އެ ޤައުމުގެ ޓްރެޜަރީ ޑިޕާޓްމަންޓުން ހާމަކޮށްފިއެވެ. ޓެކްސް ކުޑަކުރުމުގެ ސަބަބުން ދައުލަތަށް ލިބޭ އާމްދަނީ ދަށްވެފައިވާ ދަނޑިވަޅެއްގައި، އިޖުތިމާއީ ރައްކާތެރިކަމުގެ ޕްރޮގްރާމްތަކަށާއި އިންޓްރެސްޓް ދެއްކުމަށް ކުރަންޖެހޭ ހޭދަ އިންތިހާއަށް އިތުރުވެ، މާލީ ބޮޑު ކާރިސާއެއް ކުރިމަތިވެދާނެ ކަމުގެ އިންޒާރުތައް މިހާރު ވަނީ ފެންމަތިވެފައެވެ. އެންމެ ފަހުގެ ހިސާބުތައް ދައްކާގޮތުން ދައުލަތުގެ ޖުމްލަ ދަރަނި މިހާރު ހުރީ 40.047 ޓްރިލިއަން ޑޮލަރުގައެވެ.
ޖެނުއަރީ 2017 ގައި ރައީސް ޑޮނަލްޑް ޓްރަމްޕް ފުރަތަމަ ފަހަރަށް ވެރިކަމާ ހަވާލުވެވަޑައިގެންނެވި އިރު 19.95 ޓްރިލިއަން ޑޮލަރުގައި ހުރި ފެޑެރަލް ދަރަނި، ދިހަ އަހަރަށް ވުރެ ކުރު މުއްދަތެއްގެ ތެރޭގައި މިވަނީ ދެގުނައަށް ވުރެ އިތުރުވެފައެވެ. މި އިތުރުވުމުގެ ބޮޑު ބައެއް ހިއްސާކުރަނީ ކޮވިޑް-19 ގެ ބަލިމަޑުކަމާ ދެކޮޅަށް ޓްރަމްޕާއި ކުރީގެ ރައީސް ޖޯ ބައިޑަންގެ ސަރުކާރުން އެޅި ފިޔަވަޅުތަކަށް ނެގި ބޮޑެތި ލޯނުތަކާއި، ދެ ރައީސުންގެ މާލީ ސިޔާސަތުތަކުގެ ސަބަބުންނެވެ. ޓްރަމްޕްގެ ދެ ދައުރުގައި ޖުމްލަ 11.6 ޓްރިލިއަން ޑޮލަރުގެ ދަރަނި އިތުރުވެފައިވާއިރު، ބައިޑަންގެ ދައުރުގައި 8.4 ޓްރިލިއަން ޑޮލަރު ދަރަންޏަށް އިތުރުވިއެވެ.
މި މާލީ ހާލަތާ ގުޅިގެން ވަކި ފަރާތަކަށް ނުޖެހޭ 'ކޮމިޓީ ފޯ އަ ރެސްޕޮންސިބަލް ފެޑެރަލް ބަޖެޓް' ގެ ރައީސާ މާޔާ މެކްގިނީސް ވިދާޅުވީ، "ސާޅީސް ޓްރިލިއަން ޑޮލަރުގެ ދަރަންޏަކީ ހަމައެކަނި ސަރުކާރުގެ ހިސާބު ކަރުދާސްތަކުގައި އޮންނަ އެއްޗެއް ނޫން؛ އޭގެ އަސަރު މުޅި އިގްތިސާދަށް ފޯރައި، ކޮންމެވެސް ގޮތަކުން އާންމު ރައްޔިތުންގެ ޖީބުތަކާ ހަމައަށް ވެސް ދާނެ،" ކަމަށެވެ. އަދި ލޯނު ނަގާ މިންވަރު އިތުރުވާ ވަރަކަށް އިންފްލޭޝަން ގޯސްވެ، ބަޖެޓުގެ އެހެން ކަންކަމަށް ހުރަސްއެޅި، ގައުމުގެ ނާޒުކުކަން އިތުރުވާނެ ކަމަށްވެސް އޭނާ ފާހަގަކުރެއްވިއެވެ.
މާލީ ބާޒާރުގައި ދިގު މުއްދަތުގެ ބޮންޑުތަކުގެ ޔީލްޑް މައްޗަށް ގޮސްފައިވާއިރު، ޓްރެޜަރީ ސެކްރެޓަރީ ސްކޮޓް ބެސެންޓް ވަނީ ދިގު މުއްދަތުގެ ޓްރެޜަރީތައް އަނބުރާ ގަންނަ މިންވަރު މަދުވެގެން 4 ބިލިއަން ޑޮލަރަށް އިތުރުކުރައްވާނެކަން އިއުލާނު ކުރައްވާފައެވެ. ނަމަވެސް ބޮންޑް މާކެޓްގެ ހަލަބޮލިކަމާ ގުޅޭގޮތުން ވައިޓް ހައުސްގައި ވާހަކަދައްކަވަމުން ރައީސް ޓްރަމްޕް ވަނީ އިންޓްރެސްޓް ރޭޓްތައް ދަށްކުރުމަށް ގޮވާލައްވައި، އެމެރިކާއަކީ ވަރުގަދަ ޤައުމެއް ކަމަށް ވިދާޅުވެފައެވެ.