ނ. ވެލިދޫގައި ސީ އެމްބިއުލާންސްގެ ޚިދުމަތް މިއަދު އިފްތިތާޙްކޮށްފިއެވެ.
މިކަމަށްޓަކައި ނ. ވެލިދޫގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން، ޝަރަފުވެރި މެހުމާނު ޑެޕިއުޓީ މިނިސްޓަރ އޮފް ޑިފެންސް ފާޠިމަތު މިޒްނާ ޢަލީ ފާހަގަކުރެއްވި ގޮތުގައި މި ޤާއިމްކުރެވުނު ސީ އެމްބިއުލާންސް ޚިދުމަތަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް ފަސްޓް" ސިޔާސަތުގެ ދަށުން، ދިވެހި ރައްޔިތުންގެ ޞިއްޙަތާއި ދުޅަހެޔޮކަން އިތުރުކުރުމަށް ކުރެވޭ މަސައްކަތުގައި ޙާސިލްކުރެވުނު މުހިންމު ލަނޑުދަނޑިއެކެވެ.
މިއަދު ނ. ވެލިދޫގައި ޤާއިމްކުރެވުނު ސީ އެމްބިއުލާންސް ޚިދުމަތުގެ އިތުރުން، މިއަހަރު ދިވެހި ދަޢުލަތުން ޚަރަދުކުރައްވައިގެން މުޅިން އައު 9 ސީ އެމްބިއުލާންސް ހޯއްދަވާ އަތޮޅުތެރޭގެ 9 ރަށެއްގައި މުޅިން އަލަށް ސީ އެމްބިއުލާންސްގެ ޚިދުމަތް ޤާއިމްކޮށް މިހާރު ޚިދުމަތް މެދުކެނޑިފައިވާ 3 ރަށެއްގައި އަލުން ސީ އެމްބިއުލާންސްގެ ޚިދުމަތް ފެށުމަށް ހަމަޖެހިފައިވާ ކަމަށް ޑިފެންސް މިނިސްޓްރީން މައުލޫމާތުދެއެވެ. އަދި މިހާރު ބޭނުންކުރާ ސީ އެމްބިއުލާންސް ފްލީޓް އަޕްގްރޭޑް ކުރުމުގެ މަސައްކަތްތައްވެސް ކުރެވެމުން ދާކަމަށް މިނިސްޓްރީން މައުލޫމާތުދެއެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނ. ވެލިދޫ ރައްޔިތުންނާ 23 ޖުލައި 2025 ގައި ބައްދަލުކުރައްވައި، އެމަނިކުފާނު ރަށުގެ ރައްޔިތުންނަށް ވަޢުދުވެ ވަޑައިގެންނެވި ގޮތަށް މިއަދު ފެށުނު ޚިދުމަތެކެވެ.