ލުބުނާނުގެ ބިގާ ވާދީގައި ހިމެނޭ އަވަށަކަށް އިޒްރޭލުގެ އަސްކަރިއްޔާއިން ވަރުގަދަ ހަމަލާތަކެއް ދީފި ކަމަށް އެ ސަރަހައްދުގެ ޚަބަރު ފަތުރާ ވަސީލަތްތަކުން ރިޕޯޓުކޮށްފިއެވެ. މި ހަމަލާތައް ދީފައިވަނީ، ލުބުނާނުގެ ހިޒްބުﷲ ޖަމާއަތުގެ ހަތިޔާރު އަތުލުމަށް ބާރުއަޅައި، އިޒްރޭލުން އެގައުމަށް ދެމުންދާ ހަމަލާތައް އިތުރަށް ވަރުގަދަކުރަމުންދާ ދަނޑިވަޅެއްގައެވެ.
އިޒްރޭލު ސިފައިންގެ ތަރުޖަމާނު އަވިޗޭ އަދުރާއީ ބުރާސްފަތި ދުވަހު މީސްމީޑިއާގައި ކުރި ޕޯސްޓެއްގައި، ސުހްމޫރު އަވަށުގެ ރައްޔިތުން އެމީހުންގެ ގެދޮރު ދޫކޮށް ދިއުމަށް ވަނީ އަންގާފައެވެ. އޭނާ ބުނިގޮތުގައި، އެ އަވަށުގައި ހުރި "ހިޒްބުﷲގެ އަސްކަރީ މަރުކަޒެއް" ހިމެނޭ އިމާރާތަކަށް ހަމަލާދިނުމަށް ވަނީ ރާވާފައެވެ.
އޭގެ ފަހުން އިޒްރޭލުގެ އަސްކަރިއްޔާއިން ބުނެފައިވަނީ، ލުބުނާނުގެ އެކި ސަރަހައްދުތަކުގައިވާ ހިޒްބުﷲގެ އަމާޒުތަކަށް ހަމަލާދީފައިވާ ކަމަށެވެ. ނަމަވެސް އެއީ ސީދާ ކޮން ސަރަހައްދުތަކެއް ކަމެއް ހާމަކޮށްފައެއް ނުވެއެވެ. ހިޒްބުﷲ އާ ގުޅުން އޮންނަ އަލް-މަނާރު ޓީވީން ރިޕޯޓުކޮށްފައިވާ ގޮތުގައި، އިޒްރޭލުގެ ހަމަލާތައް އަމާޒުވީ ސުހްމޫރުގައި ހުރި މީހުން ދިރިއުޅޭ ދެ އިމާރާތަކަށެވެ.
2024 ވަނަ އަހަރުގެ ފަހުކޮޅު ހިޒްބުﷲ އާއެކު ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އައި ނަމަވެސް، އިޒްރޭލުން ދަނީ މެދުކެނޑުމެއްނެތި ލުބުނާނަށް ހަމަލާދެމުންނެވެ. އިޒްރޭލާއި އެގައުމުގެ އެންމެ ގާތް ބައިވެރިޔާ އެމެރިކާއިން، ހިޒްބުﷲގެ ހަތިޔާރު އަތުލުމަށް ލުބުނާނު ސަރުކާރަށް ބާރުއަޅަމުންދާތީ، ފާއިތުވި މަސްތަކުގައި މި ހަމަލާތައް ވަނީ އިތުރަށް ވަރުގަދަވެފައެވެ.
ހަމަ އެދުވަހުގެ ފަހުގެ ވަގުތެއްގައި، އިޒްރޭލުން ވަނީ ސުހްމޫރުގެ ހުޅަނގުން އޮންނަ މަޝްޣަރާ އަވަށުގެ މީހުންނަށް ވެސް އެ ސަރަހައްދު ދޫކޮށް ދިއުމަށް އިންޒާރުދީފައެވެ. އެއީ އެ ސަރަހައްދުގައި ހުރި ހިޒްބުﷲގެ މަރުކަޒުތަކަށް ހަމަލާދިނުމަށް ކަމަށް ބުނެއެވެ.
ލުބުނާނުގެ އަސްކަރިއްޔާއިން މިދިޔަ ހަފުތާގައި ބުނެފައިވަނީ، ލިޓާނީ ކޯރާއި އިޒްރޭލުގެ ބޯޑަރާ ދެމެދު އޮންނަ ދެކުނުގެ ސަރަހައްދުގައި ހުރި، ރަސްމީ އިދާރާތަކަށް ނިސްބަތްނުވާ ހުރިހާ ހަތިޔާރެއް ސަރުކާރުގެ ބާރުގެ ދަށަށް ގެނައުމަށް މަސައްކަތް ކުރަމުންދާ ކަމަށެވެ. އަދި ޖަނަވަރީ 8 ވަނަ ދުވަހު އަސްކަރިއްޔާއިން ބުނީ، ދެކުނުގެ ސަރަހައްދުތަކުގެ ހަތިޔާރުގެ ކަންކަން މިހާރު ވަނީ އަމަލީގޮތުން ސަރުކާރުގެ ފުރިހަމަ ބާރުގެ ދަށަށް ގެނެވިފައި ކަމަށެވެ. ނަމަވެސް އެ ބަޔާނުގައި ހިޒްބުﷲގެ ނަމެއް ބޭނުންކޮށްފައެއް ނުވެއެވެ.
މީގެ އިތުރުން، ލުބުނާނުގެ ކެބިނެޓުން ވަނީ ގައުމުގެ އެހެން ސަރަހައްދުތަކުން ހަތިޔާރު އަތުލާނެ ގޮތުގެ ތަފްސީލީ ރިޕޯޓެއް އަންނަ މަހުގެ ކުރީކޮޅު ހުށަހެޅުމަށް އަސްކަރިއްޔާއަށް އަންގާފައެވެ.
ނަމަވެސް، ހިޒްބުﷲގެ އިސް އޮފިޝަލަކު ވަނީ، މުޅި ގައުމުގައި ހުރި އެ ޖަމާއަތުގެ ހަތިޔާރުތައް އަތުލުމަށް މަސައްކަތް ކޮށްފިނަމަ، ގައުމުގައި ބޮޑު ހަމަނުޖެހުމެއް އުފެދި، ދާޚިލީ ހަނގުރާމައަކަށް މަގުފަހިވެދާނެ ކަމަށް ބުނެ ސަރުކާރަށް އިންޒާރު ދީފައެވެ.