އެކި ގޮންޖެހުންތަކާއެކު ވެސް އެސްޓީއޯ އިން ރާއްޖެއަށް އެތެރެކުރާ ބޭހުގެ ބާވަތްތަކުގެ ސަޕްލައި އިތުރުކުރެވިފައިވާކަމަށް ޞިއްޙަތާ ބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމުގައި ޞިއްޙީ ދާއިރާގެ ކުރިއެރުމަށް ސަރުކާރުން ކުރައްވަމުން ގެންދަވާ މަސައްކަތްތަކާ ގުޅޭގޮތުން ވާހަކަފުޅުދައްކަވަމުންނެވެ.
ބޭސް ލިބުން ދަތިވާ މައްސަލަ ހައްލުކުރުމަށް ގިނަ މަސައްކަތްތަކެއް ސަރުކާރުން މިހާރު ކުރަމުންދާކަމަށާއި މިކަމާއި ގުޅިގެން އަޅުއްވަމުންދާ ފިޔަވަޅުތަކުގެ ސަބަބުން ބޮޑެތި ލުއިތަކާއި ކުރިއެރުން ލިބެމުންދާކަމަން ފާހަގަކުރައްވާ ވަޒީރު ވިދާޅުވީ، ބޭހުގެ މައްސަލަ ޙައްލުވެގެން އަންނައިރު ރާއްޖޭގެ އެޕްރޫވްޑް ޑްރަގް ލިސްޓުވެސް އިތުރުކުރެވި ބޭނުންވާ ޒަރޫރީ ބޭހުގެ ލިސްޓުވެސް ފުޅާވެގެންދާނެ ކަމަށެވެ.
ބޭހުގެ މައްސަލަ ހައްލުކުރުމަށް ސަރުކާރުން އެކި މަސައްކަތްތައް ކުރަމުންދާއިރު އެކި ގޮންޖެހުންތަކާއި ކުރިމަތިލާންޖެހޭ ކަން ފާހަގަކުރައްވާ މިނިސްޓަރ ވިދާޅުވީ ރައްޔިތުންގެ ފަރާތުން އަންނަ ޝަކުވާތައްވެސް ވަރަށް ގާތުން ބަލަމުންދާކަމަށެވެ. ހަމަ އެހެންމެ، ސަރުކާރުން މިހާރު ކުރަމުންދާ މަސައްކަތުގެ ނަތީޖާވެސް ފެންނަމުންދާކަމަށް މިނިސްޓަރ ވިދާޅުވިއެވެ.
ރާއްޖެއަށް އެތެރެކުރާ ބޭހުގެ ސަޕްލައި ހަރުދަނާކޮށްފައިވާއިރު، ބޭސް އެތެކުރާ މިންވަރު އެތައް ގުނައެއް އިތުރުކުރެވިފައިވާކަން ވަޒީރުގެ ވާހަކަފުޅުގައި ވަނީ ފާހަގަކުރައްވާފައެވެ. އެގޮތުުން، މީގެ ކުރިން އެސްޓީއޯއިން އެތެރެކުރަމުންދިޔައީ 200 އެއްހާ ބޭސްކަމަށާއި މިހާރު 800 އާއި 900 ދެމެދުގެ ބޭސް އެތެރެކުރެވޭކަމަށް ވަޒީރު ވިދާޅުވިއެވެ. މީގެ އިތުރުން، އުޞޫލުތައް ހަރުދަނާކޮށް ޓްރީޓްމަންޓުގެ ގައިޑްލައިންތައް ހަރުދަނާކުރެވުމާއެކު، މިދިޔަ އަހަރު މުޅިން އަލަށް 40 ޓްރީޓްމަންޓުގެ ގައިޑްލައިން އެކުލަވާލާފާއިވާކަމަށް މިނިސްޓަރ މަޢުލޫމާތިދެއްވިއެވެ.