ރާއްޖޭގެ ފަތުރުވެރިކަން ޕްރޮމޯޓުކުރުމަށް އެމްއެމްޕީއާރުސީ އާއި އިނގިރޭސިވިލާތުގެ ލިވަޕޫލް ފުޓްބޯޅަ ކްލަބާއެކު ވެފައިވާ އެއްބަސްވުމުގެ ދަށުން، އެ ކްލަބުގެ އެންފީލްޑް ސްޓޭޑިއަމްގައި ރާއްޖެ ޕްރޮމޯޓް ފަށައިފިއެވެ.
މި ކެމްޕޭން ރަސްމީކޮށް ލޯންޗުކޮށްފައިވަނީ ރޭ ލިވަޕޫލް އާއި އެވަޓަން ބައްދަލުކުރި މެޗުގައެވެ. މެޗު ކުޅުނު ވަގުތު ސްޓޭޑިއަމްގެ ލެޑް ބޯޑުތަކުގައި ރާއްޖޭގެ ޓޫރިޒަމް ބްރޭންޑު ވިޒިޓް މޯލްޑިވްސް އާއި ރާއްޖޭގެ މަންޒަރުތައް ދައްކާލިއެވެ.
މި ކެމްޕޭން ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެ ވަޑައިގަތެވެ. އަދި ޓޫރިޒަމް މިނިސްޓަރު ޠާރިޤު އިބްރާހިމް އާއި ސްޕޯޓްސް މިނިސްޓަރު އަބްދުﷲ ރާފިއު ގެ އިތުރުން އެމްއެމްޕީއާރުސީގެ މެނޭޖިން ޑިރެކްޓަރު އިބްރާހިމް ޝިއުރީ ވެސް ވަނީ މި ރަސްމިއްޔާތުގައި ބައިވެރިވެ ވަޑައިގެންފައެވެ.
މި ކެމްޕޭނުގެ ސަބަބުން ލައްކައަކަށް ވުރެ ގިނަ ފަތުރުވެރިން ރާއްޖެ ޒިޔާރަތްކުރާނެ ކަމަށް ލަފާކޮށްފައި ވާއިރު އާމްދަނީގެ ގޮތުގައި އިތުރު 100 މިލިއަން ޑޮލަރު ލިބޭނެ ކަމަށް އެމްއެމްޕީއާރުސީ އިން ވަނީ ހާމަކޮށްފައެވެ. ލިވަޕޫލްގެ ސަޕޯޓަރުންގެ ތެރެއިން އެންމެ 2 އިންސައްތަ މީހުން ރާއްޖެ ޒިޔާރަތްކުރި ނަމަވެސް މި ކެމްޕޭނުގެ ޓާގެޓު ހާސިލްވާނެ ކަމަށް އެމްއެމްޕީއާރުސީން ބުނެފައިވެއެވެ.
އެމްއެމްޕީއާރުސީން މިހާރު ވަނީ ލިވަޕޫލްގައި ރާއްޖެ ޕްރޮމޯޓު ކުރުމަށް އައުޓްޑޯ ކެމްޕޭނެއް ވެސް ފަށާފައެވެ. ތިން މަސް ދުވަހުގެ މުއްދަތަށް ކުރިއަށްދާ މި ކެމްޕޭނުގެ ދަށުން 100 އަށް ވުރެ ގިނަ ޓެކްސީގައި އަދި ލަންޑަނުގެ ބަސްތަކުގައި ވެސް ރާއްޖޭގެ އިޝްތިހާރުތައް ހަރުކުރާނެއެވެ.
އަދި މި ކެމްޕޭނުގެ ދަށުން ލިވަޕޫލްގެ ފޭނުންގެ މެދުގައި ހޮވާލެވޭ ފަރާތަކަށް ރާއްޖޭގައި ފަސް ރޭ ހޭދަކުރުމުގެ ފުރުސަތު ދޭ ހާއްސަ ލަކީޑްރޯއެއް ވެސް މި މަހުގެ ނިޔަލަށް ކުރިއަށް ގެންދިއުމަށް ވަނީ ނިންމާފައެވެ.
މި ލިޔުން ކިޔާލުމުން
