ކޮންމެ ދިވެހި ރައްޔިތެއްގެ އަޒުމަކަށް ވާންވީ، ޤައުމުގެ ތަރައްޤީގެ ކަންކަމުގައި އެކަތިގަނޑަކަށްވުން ކަމުގައި ރައީސް ޑރ. މުޙައްމަދު މުޢިއްޒު ވިދާޅުވިއެވެ.
ރޭ ހއ. ހޯރަފުށީ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވަނީ ޤައުމަށް އަންނަ ކޮންމެ ތަރައްޤީއަކީ ތިބާއަށް ލިބޭ އުފަލަކާއި ފަޚްރެއް ކަމުގައި ޤަބޫލުކުރެއްވުމަށް އެދިވަޑައިގެން، ކޮންމެ ރައްޔިތަކީވެސް ޤައުމު ދެކެ ލޯބިވާ، ޤައުމު އިސްކުރާ، ޤައުމީ މީހަކަށް ވުމަށް ގޮވާލައްވައިފައެވެ.
ރައީސް ވިދާޅުވީ ޙަޤީޤީ މާނައިގައި ޤައުމު ކުރިއަރައި ދާނީ، މި ފަދައިން ޤައުމީ ލޯތްބާއެކު ގުޅި، ލާމެހިގެންދާ ހިސާބުން ކަމަށާއި، ފުރިހަމަ ކާމިޔާބީތަކެއް ލިބެން އޮތީ، އެ ހަމަޖެހުމާއި އެއްބައިވަންތަކަން ޤާއިމުކުރެވިގެން ކަމަށެވެ.
މީގެ އިތުރުން މިއަދާ ހަމައަށް އައިއިރުވެސް ޤައުމުގައި ހަމަޖެހުން އޮތްކަން ފާހަގަކުރައްވައި، އެކަން އެގޮތުގައި ދެމި އޮތުމަށް އެދިވަޑައިގަންނަވާ ކަމުގައި ރައީސް ވިދާޅުވިއެވެ.
އަދި ދިވެހި ރައްޔިތުންގެ އެއްބާރުލެއްވުމާއެކު، ކުރިއަށް އޮތް ދުވަސްތަކުގައި ވަށާޖެހޭ ތަރައްޤީއެއް ހޯއްދަވައިދެއްވޭނެކަމުގެ ޔަޤީންކަން އެބައޮތް ކަމަށާއި، ކަންކަމާ މެދު ވިސްނާ ވިސްނުން ތަރައްޤީވާންޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސްގެ ވާހަކަފުޅުގައި އިތުރަށް ވިދާޅުވީ ޤައުމު ތަރައްޤީ ކުރުމުގައި އެކަތިގަނޑަކަށް ވުމަކީ، ދިވެއްސަކަށް ވީތީ، ދިވެހި ޤައުމުދެކެ ފަޚްރުވެރިވާ ހާލު ކުރަންޖެހޭ ކަމެއް ކަމަށާއި، ދެން ހުރި ޚިޔާލުތައް އަންނަންވީ އޭގެ ފަހަތަށް ކަމަށެވެ.
ޤާނޫނު އަސާސީއިން ކަށަވަރުކޮށްދޭ ޙައްޤުތަކަކީ ކޮންމެ ރައްޔިތަކަށްވެސް ލިބިގެންވާ ޙައްޤެއް ކަމަށާއި، އަދުގެ ސަރުކާރުން ފުރިހަމަ ޔަޤީންކަމާއެކު އެ ޙައްޤުތައް ފޯރުކޮށްދެއްވާނެ ކަމުގައި ވިދާޅުވެ، ރައީސް ވަނީ ޤާނޫނުން މަނާ ނުކުރާ ކޮންމެ ކަމެއް ކުރުމުގެ ފުރުޞަތު ކޮންމެ ރައްޔިތަކަށްވެސް ދެއްވާނެ ކަމަށާއި، ޤާނޫނުގެ ބޭރުން ކަމެއް ކުރުމަކީ އެއްވެސް މީހަކަށް އޮތް ޙައްޤެއް ނޫންކަން ހަނދުމަކޮށްދެއްވައިފައެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން، އަޅުގަނޑުމެންގެ ތެރޭގައި އެކުވެރިކަމާއި އެއްބައިވަންތަކަން ޤާއިމުކުރުމަކީ އަޅުގަނޑުމެންގެ އަތްމަތީގައި އޮތް، ފަރުދީ ޒިންމާއެއްގެ ގޮތުގައި ދުށުމަށް އިލްތިމާސްކުރެއްވިއެވެ.
މި ލިޔުން ކިޔާލުމުން
