ހއ. ދިއްދޫ އަށް ދެން ވަޑައިގަންނަވާނީ އެ ރަށު އެއާޕޯޓަށް ޖައްސާ މަތިންދާ ބޯޓުގައި، އެ އެއާޕޯޓު ހުޅުއްވައިދެއްވުމަށް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދިއްދޫ ރައްޔިތުންނާ ރޭ މުޚާޠަބު ކުރައްވައި ދެއްކެވި ވާހަކަފުޅުގައި ރައީސް ވަނީ އަދުގެ ސަރުކާރުން ގެންގުޅޭ ސަރަޙައްދީ ތަރައްޤީގެ ވިސްނުމުގައި، ދިއްދޫގައި އެއާޕޯޓެއް އެޅުމަކީ ކޮންމެހެން ކުރަންޖެހޭ ކަމެއް ކަމަށާއި، މާތް ﷲގެ އިރާދަފުޅާއެކު އެކަން ކޮށްދެއްވާނެ ކަމުގެ ޔަޤީންކަން ދެއްވައިފައެވެ.
މީގެ އިތުރުން، ދިއްދޫގައި އެއާޕޯޓު ތަރައްޤީ ކުރުމުގެ ޢަމަލީ މަސައްކަތްތައް ފެށުމަށް މިހާރުވެސް ގިނަ މަސައްކަތްތަކެއް ތަރުތީބު ކުރެވިފައިވާކަން ފާހަގަކުރައްވައި ރައީސް ވިދާޅުވީ، އެމް.ޓީ.ސީ.ސީއާއި، ބޭރުގެ ފަރާތަކާއެކު ފްރޭމްވަރކް އެއްބަސްވުމެއް އެކުލަވައިލެވި، ޢަމަލީ މަސައްކަތްތައް ފެށުމާ ހަމައަށް މިހާރު ދަތުރުކުރެވިފައިވާ ކަމަށެވެ. އެގޮތުން ވަރަށް އަވަހަށް ޢަމަލީ ސިފައެއްގައި، ބިން ހިއްކުމުގެ މަސައްކަތާއެކު ފައްޓަވައި، އެކަން ނިންމަވައި، ދެއްވަން ކުރަންހުރި ހުރިހައި ކަމެއް ބާރު ދުވެލީގައި ފައްޓަވައި ދެއްވާނެ ކަމުގައި ރައީސް ވިދާޅުވިއެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ތަރައްޤީއަކީ އެންމެންނަށް ހަމަހަމަކޮށް ގެނެސްދެވޭ އެއްޗެއް ކަމަށާއި، އެ މަނިކުފާނުގެ ކުރިފުޅުމަތީގައި އެންމެންނަކީވެސް ހަމަހަމަ ބައެއް ކަމަށެވެ. އެ މަނިކުފާނަށް ސިޔާސީ ފިކުރު މުހިންމެއް ނޫން ކަމަށާއި، ހުރިހާ ރައްޔިތުން ހަމަހަމަކަމުގައިވެސް ވިދާޅުވިއެވެ. ރައީސް ވިދާޅުވީ ޤައުމަށް، އަދި ރަށަކަށް ގެނެވޭ ތަރައްޤީއަކީ ސިޔާސީ ކަމެއް ނޫން ކަމަށާއި، އެއީ މުސްތަޤުބަލަށްޓަކައި ކުރެވޭ ސީރިއަސް މަސައްކަތެއް ކަމަށެވެ.
މީގެ އިތުރުން ރައީސް ވަނީ އަދުގެ ސަރުކާރަކީ ނަތީޖާ ނެރެދޭނެ ސަރުކާރެއް ކަމުގައި ވިދާޅުވެ، ގުޅިލާމެހިފައިވާ، ވަށާޖެހޭ ތަރައްޤީ، ރަށަށް ގެނެސްދެއްވާނެ ކަމުގައި ވިދާޅުވެފައެވެ. އެގޮތުން ހއ. ދިއްދޫގެ ބަނދަރުގެ މައްސަލައަށް ޙައްލު ހޯއްދަވައި ދެއްވާނެ ކަމުގެ ޔަޤީންކަން އެމަނިކުފާނު ދެއްވިއެވެ. އަދި ބޯހިޔާވަހިކަމުގެ ދާއިރާއާއި މަސްވެރިކަމުގެ ދާއިރާއިންވެސް މަޝްރޫޢުތައް ހިންގަވައިދެއްވާނެ ކަމަށާއި، ދިއްދޫގައި ކުނިމެނޭޖު ކުރުމުގެ ކަންކަން، ވެމްކޯގެ ދަށުން، މި އަހަރުގެ ރަމަޟާން މަސް ފެށުމުގެ ކުރިން ހަމަޖެހިގެންދާނެ ކަމުގެ ޔަޤީންކަންވެސް ރައީސުލްޖުމްހޫރިއްޔާ ވަނީ ދެއްވާފައެވެ.
މީގެ އިތުރުން، ބައިނަލްއަޤުވާމީ ފެންވަރުގެ ފުޓުބޯޅަ ދަނޑެއް އެޅުމުގެ މަސައްކަތް މި އަހަރު ތެރޭގައި ބާރު ދުވެލީގައި ކުރިއަށް ގެންގޮސްދެއްވާނެ ކަމަށާއި، ދިއްދޫގެ ހޮސްޕިޓަލުގެ ތަރައްޤީއަށްޓަކައިވެސް މަސައްކަތްތަކެއް ކޮށްދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
ދިއްދޫގެ ތަރައްޤީއަށް ކުރެވޭ މަސައްކަތްތަކަކީ ސަރަޙައްދީ ތަރައްޤީއާ ގުޅިފައިވާ ކަމެއްކަމުގައިވެސް ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.
މި ލިޔުން ކިޔާލުމުން
