ސަރުކާރުގެ ބައެއް ވުޒާރާތައް އެއްކޮށްލައި، ވުޒާރާތަކަށާއި ކެބިނެޓަށް ބައެއް ބަދަލުތައް ގެނެސް، ޢައްޔަނުކުރެވުނު ހަތަރު ވަޒީރުންނަށް ރައްޔިތުންގެ މަޖިލީހުން ރުހުން ދީފިއެވެ.
މިދިޔަ ޑިސެންބަރު މަހުގެ 26 ވަނަ ދުވަހު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ވަޒީރުންގެ މަޖިލީހަށް ބަދަލުތަކެއް ގެންނަވައި، ބައެއް މިނިސްޓްރީތަކުގެ ނަން ބަދަލުކުރައްވައިފިއެވެ. މިގޮތުން މިނިސްޓަރ އޮފް ފިނޭންސްގެ މަޤާމުގައި ހުންނެވި މޫސާ ޒަމީރު، މިނިސްޓަރ އޮފް ފިނޭންސް އެންޑް ޕްލޭނިންގ ކަމަށް ވަނީ ޢައްޔަނުކުރައްވައިފައެވެ.
މީގެ އިތުރުން ހައުސިންގ މިނިސްޓަރަކަށް ކުރިން ހުންނެވި ޑރ. ޢަލީ ޙައިދަރު އަޙްމަދު ވަނީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ މަޤާމަށް ޢައްޔަނުކުރައްވައިފައެވެ. އަދި ހަޔަރ އެޑިޔުކޭޝަން މިނިސްޓަރުގެ މަޤާމުގައި ކުރިން ހުންނެވި ޑރ. މަރްޔަމް މާރިޔާ ވަނީ މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ކަމަށް ޢައްޔަނުކުރައްވައިފައެވެ.
މީގެ އިތުރުން ކުރިން މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ މަޤާމުގައި ހުންނެވި ޑރ. ޢަބްދުﷲ މުއްޠަލިބް ވަނީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ކަމަށް ޢައްޔަނުކުރައްވައިފައެވެ.
މި ބޭފުޅުންނަށް ރުހުން ދޭން ފެންނަ ކަމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން އިއްޔެ ވަނީ ފާސްކޮށްފައެވެ.
ދައުރުން ބޭރުން މިއަދު ބޭއްވި މަޖިލީހުގެ ޖަލްސާގައި ކޮމިޓީގެ ރިޕޯޓު ހުށަހަޅާފައިވާއިރު، ވަޒީރު މޫސާ ޒަމީރަށް ރުހުން ދޭން ފެންނަ ކަމަށް 69 މެންބަރުންގެ އިއްތިފާޤުން ވަނީ ފާސްވެފައެވެ. ވަޒީރު ހައިދަރަށް ރުހުން ދެއްވީ 63 މެންބަރުން ކަމަށްވާއިރު، 6 މެންބަރަކު ވަނީ ނުފެންނަ ކަމަށް ވޯޓު ދެއްވައިފައެވެ. އަދި ވަޒީރު ޑރ. މާރިޔާ އާއި ޑރ. މުއްޠަލިބަށް ރުހުން ދޭން ފެންނަ ކަމަށް ފާސްވީ އެކަމަށްޓަކައި ނެގި ވޯޓުގައި ބައިވެރިވެވަޑައިގެންނެވި 70 މެންބަރުންގެ އިއްތިފާޤުންނެވެ.
މި ލިޔުން ކިޔާލުމުން
