އެސްޓޯނިއާ އަށް ކުރެއްވި ދަތުރަކީ ވަރަށް ތާރީޚީ އަދި ވަރަށް ކާމިޔާބު ދަތުރެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމް އަށް ދެއްވި އިންޓަވިއުއެއްގައި ރައީސް ވިދާޅުވީ، މި ދަތުރު ތާރީޚީ ދަތުރަކަށް ވަނީ މިއީ ރާއްޖޭގެ ރައީސަކު އެސްޓޯނިއާއަށް ވަޑައިގެންނެވި ފުރަތަމަ ފަހަރު ކަމުގައި ވާތީ ކަމަށެވެ.
"ވަރަށް ކާމިޔާބު ދަތުރެއް. ސަބަބަކީ އަޅުގަނޑުމެން ބޭނުންވީ އަޅުގަނޑު އިޢުލާންކޮށްފައި އަދި މެނިފެސްޓޯގައި ހިމަނާފައި އޮތް ވިޝަން، ރާއްޖެއަކީ ޑީޖިޓަލައިޒްޑް ޤައުމަކަށް ހެދުމަށް ކުރެވޭ މަސައްކަތުގައި، އެ މައިދާނުގައި މި ދުނިޔޭގެ އެންމެ ކާމިޔާބު ހޯދާފައިވާ ޤައުމަށް އައިސް އެ ޤައުމުގެ ކަންކަން އެބޭފުޅުން ބައްޓަންކޮށްފައިވާ ގޮތް ދަސްކޮށް، އެކަމުގައި އަޅުގަނޑުމެންނަށް ކުރިއަށްދެވޭނެ ގޮތްތަކާމެދު މަޝްވަރާކޮށް، އެހީތެރިކަން ހޯދޭނެ ގޮތްތަކާމެދު މަޝްވަރާކޮށް ކުރިއަށްދެވޭނެ ގޮތްތައް ހޯދުން"، އެމަނިކުފާނު ވިދާޅުވިއެވެ.
މީގެ އިތުރުން ރައީސް ވިދާޅުވީ މި ދަތުރުގައި މަސައްކަތްކުރެއްވީ އެ މަޤުޞަދު ހާސިލުކުރުމަށްޓަކައި ކަމަށާއި، އެ ޤައުމުގެ ރައީސާއި ސަރުކާރުގެ ފަރާތުން އަދި ރަސްމީ އިދާރާތަކުން ވަރަށް ބޮޑު އެހީތެރިކަމެއް ދެއްވެވި ކަމަށެވެ.
"ޑިޖިޓަލައިޒޭޝަނާ ބެހޭ ހުރިހާ ކަމެއް މި ޤައުމުގައި މި ވޭތުވެދިޔަ އަހަރުތަކުގައި ކިހިނެއްކަން ކާމިޔާބުކަމާއެކީގައި ހާސިލުކޮށްފައިވަނީ. އަދި ދިމާވި އެކި ކަހަލަ ދަތިތަކާއި އެކަންކަމުން އަރައިގަންނަން ކަންކަން ކުރި ގޮތާއި، އަދި އެހެން ދާއިރާތަކުންވެސް ކުރިއެރުން ހޯދާފައިވާ ގޮތް ވަރަށް ރަނގަޅަށް އޮޅުންފިލައިގެންދިޔަ"، ރައީސް ވިދާޅުވިއެވެ.
ޖަނަވަރީ މަހުގެ 13 އިން 16 އަށް އެސްޓޯނިއާއަށް ރައީސް ކުރެއްވި މި ދަތުރުފުޅަކީ، އެސްޓޯނިއާގެ ރައީސް ޑރ. އަލާރް ކަރިސްގެ ދަޢުވަތަކަށް ކުރައްވާ ދަތުރުފުޅެކެވެ.
މި ލިޔުން ކިޔާލުމުން
