ދާޚިލީ ސަލާމަތާއި ފަންނިއްޔާތާ ބެހޭ ވަޒީރު، ޢަލީ އިޙްސާން މަޤާމުން އެކަހެރި ކުރުމަށް އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ގޮވާލައިފިއެވެ.
އެމްޑީޕީން ނެރުނު ބަޔާނެއްގައި ބުނެފައިވަނީ ޕީޕަލްސް ނޭޝަނަލް ކޮންގްރެސް (ޕީ.އެން.ސީ) އަށް މެންބަރުން އިތުރުކުރުމަށް ހިންގި ހަރަކާތުގައި ޞައްޙަ ނޫން ފޯމުތައް އިލެކްޝަންސް ކޮމިޝަން (އީސީ) އަށް ހުށަހަޅާފައިވާކަން އެ ކޮމިޝަންގެ ބަހުންނާއި، ޕީއެންސީގެ އަމިއްލަ އިއުތިރާފުން ޝައްކެއް ނެތް މިންވަރަށް އޮޅުންފިލާފައިވާ ކަމަށާއި، މިކަން ހިނގައި ދިޔައީ އެކިފަރާތްތަކުން ހުށަހަޅާ ފޯމުތަކުގެ ސައްހަކަން ކަށަވަރުކުރުމުގެ ޤާބިލުކަން އެޕާޓީގައި ނެތުމުގެ ސަބަބުން ކަމަށް ޕީއެންސީން ބުނިނަމަވެސް، މިއީ ގަސްތުގައި ރާވައިގެން ހިންގާފައިވާ ޖަރީމާއެއްކަން ހާމަވެފައިވާ ކަމަށެވެ.
"ދިވެހިރައްޔިތުންގެ ޒާތީ މައުލޫމާތުން ވައްކަންކުރުމުގެ މި ބޮޑު ޖަރީމާ ހިންގުމުގައި ހޯމްލޭންޑް، ސެކިއުރިޓީ އެންޑް ޓެކްނޮލޮޖީ މިނިސްޓަރު ޢަލީ އިޙްސާން އިސް ދައުރެއް އަދާކޮށްފައިވާތީ މިޕާޓީގެ ފަރާތުން މިނިސްޓަރުގެ އެ ހުތުރު އަމަލު ކުށްވެރިކުރަން. ވަޒީރުންނަކީ ގާނޫނުއަސާސީއާއި ރައްޔިތުންގެ ހައްގުތަކަށް ރައްކާތެރިވުމަށް މާތްﷲ ގަންދީ ހުވައެއްކޮށްގެން އެ މަގާމާ ހަވާލުވާ ބައެއް ކަމަށްވާއިރު، އެކިއެކި ހިދުމަތްތަކަށް އެދިގެން ދިވެހި ސަރުކާރަށް ލިޔެކިޔުން ހުށަހަޅާ ދިވެހި ރައްޔިތުންގެ ޒާތީ މައުލޫމާތުން ވައްކަންކުރުމުގައި މިނިސްޓަރު އިޙްސާންގެ ބައިވެރިވުން އޮތްކަމީ އެ ވަޒީރު ކުރެއްވި ހުވަޔާވެސް ޚިލާފު ޢަމަލެއް"، އެމްޑީޕީގެ ބަޔާނުގައި ވެއެވެ.
މީގެ އިތުރުން، މިހާރު އާންމުވެފައިވާ ފޮޓޯތަކުން ފެންނަ ގޮތުގައި، ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމުގެ މުޅި އިޖުރާއަތު ހިނގައިދިޔައީ ވަޒީރު އިޙްސާންގެ ސީދާ ބެއްލެވުމުގެ ދަށުން ކަމަށް އެމްޑީޕީން ބުނެއެވެ.
"މިނިސްޓަރު އިޙްސާން ހިންގަވާފައިވާ މި މުޑުދާރު އަމަލުގެ މައްސަލަ ތަހުގީގުކުރުމަށް ދިވެހި ފުލުހުންގެ ޚިދުމަތަށް ގޮވާލަން. މިނިސްޓަރު އިޙްސާނަކީ ފުލުހުންގެ އިދާރާގެ ކަންކަން ބެލެހެއްޓުން ހަވާލުވެފައިވާ ވަޒީރު ކަމަށްވާއިރު، އޭނާ އެ މަޤާމުގައި ހުރެއްޖެނަމަ މިމައްސަލައިގެ އިންސާފުވެރި ތަޙުޤީޤެއްކުރުމަކީ މުސްތަހީލު ކަމަކަށްވާތީ، މި މައްސަލައިގައި އިންސާފުވެރި ތަހުގީގެއް ކަށަވަރުކުރުމަށްޓަކައި، މިނިސްޓަރު އިޙްސާން މަޤާމުން އެކަހެރިކުރުމަށް ވެސް ސަރުކާރަށް ގޮވާލަން. އަދި މި ޢަމަލަކީ ދައުލަތުގެ ވަސީލަތްތައް ބޭނުންކޮށްގެން ނާޖާއިޒް މަންފާއެއް ހޯދައި ދިނުމުގެ އަމަލަކަށްވާތީ މިމައްސަލައިގެ ފުރިހަމަ ތަޙުޤީޤެއް ކުރުމަށް އެންޓި ކޮރަޕްޝަން ކޮމިޝަނަށްވެސް ގޮވާލަން"، އެ ބަޔާނުގައި ވެއެވެ.
މީގެ އިތުރުން އެމްޑީޕީން ވަނީ ދިވެހި ރައްޔިތުން ސަރުކާރުގެ ކަމާބެހޭ އިދާރާތަކުން ޚިދުމަތްތައް ހޯދަނީ އެ ރައްޔިތުންގެ ޒާތީ މައުލޫމާތުތައް އިތުރު ފަރާތަކަށް ހާމަނުވާނޭކަމުގެ ކަށަވަރުކަމާއެކު ނަމަވެސް، ޕާޓީގެ މެންބަރުންގެ ދަފުތަރު އިތުރުކުރުމަށްޓަކައި ދިވެހި ރައްޔިތުންގެ ޒާތީ މައުލޫމާތުން ވައްކަންކުރުމަކީ އިންތިހާއަށް ނާތަހުޒީބު، އަދި ޚިޔާނާތުގެ ޢަމަލެއް ކަމަށާއި، މިއީ ސަރުކާރާމެދު ރައްޔިތުންގެ މެދުގައި އޮންނަންވާ އިތުބާރު ގެއްލިގެންދާފަދަ ޢަމަލަކަށްވާތީ ކަމަށޤ ބުނެ، މިފަދަ ކަންކަން އިތުރަށް ނުހިނގާނޭކަން ކަށަވަރުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ އިދާރާތަކަށް ގޮވާލައިފައެވެ.
އަދި މިހާރު ޕީއެންސީގެ ދަފުތަރުގައި ހިމެނުމަށް އީސީ އަށް ހުށަހަޅާފައިވާ ގިނަ ފޯމުތަކަކީ ޞައްޙަ ނޫން ފޯމުތަކެއްކަން ސާފުވެފައިވާތީ މިމައްސަލަ ބަލައި، އެކަމުގައި ގޮތެއް ނިމުމުގެ ކުރިން އެއިން އެއްވެސް ފޯމެއް ރަޖިސްޓްރީ ނުކުރުމަށް އެ ޕާޓީން ވަނީ އީސީ އަށްވެސް ގޮވާލައިފައެވެ.
ސަރުކާރުގެ ރަސްމީ ލިޔެކިޔުމާއި، ޑޭޓާބޭސްތަކުން މައުލޫމާތު ވަގަށް ނަގައިގެން ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެމްބަޝިޕް ފޯމު އެކިއެކި މީހުންގެ ނަމުގައި ވަގަށް ފުރާފައިވާ ކަމަށް ތުހުމަތުކުރެވޭ މައްސަލައިގައި ދާޚިލީ ވަޒީރުގެ މަގާމުން ޢަލީ އިޙްސާން އިސްތިއުފާ ދިނުމަށް ދަ ޑިމޮކްރެޓްސް އިންވެސް ވަނީ ގޮވާލައިފައެވެ.
މި ލިޔުން ކިޔާލުމުން
